Usa ka Biyahe Pinaagig Bus Ngadto sa Sentro sa Australia
Sinulat sa koresponsal sa Pagmata! sa Australia
NAKALAWIG ka na ba sa punog-buaya nga suba? Nalingaw ka na ba sa pag-awit panahon sa nahayagag-bituon nga gabii, gatosan ka milya gikan sa sibilisasyon? Nakapakig-ambit ka na ba sa Kristohanong mga tigom samtang nagbiyaheg 100 kilometros matag oras subay sa haywey? Ang maong mga kasinatian maoy pananglitan lamang niadtong natagamtam sa gatosan ka delegado gikan sa lainlaing dapit nga nagbiyahe pinaagig bus ngadto sa distritong kombensiyon sa mga Saksi ni Jehova sa Alice Springs sa napagba nga sentro sa Australia.
“Ang pulong ‘safari’ maoy haom,” miingon ang usa ka delegado, “tungod kay kami natulog sa gawas sa mga toldang makatulgag duha-ka-tawo. Sa pag-abot namo sa Alice Springs, among napabarog ang among mga tolda nga wala dangtig tulo ka minutos! Halos susama kadto sa pagtan-aw ug video nga kusog-gipaabante: Ang mga bus mohunong, ug sa walay-sulod nga parke kalit nga motuybo ang dinosenang gagmayng mga tolda.”
Maayong Pag-abot sa “Ang Alice”
Ang Alice Springs (“Ang Alice” alang sa mga molupyo didto) maoy mauswagong lunhawng dapit nga gipalibotan sa pulang disyerto. Kana may molupyo nga 23,000 ug nahimutang sa habagatan sa geograpikong sentro sa kontinente sa Australia. Kana karon maoy sentro sa mga turista nga naggamit sa Aborihinal nga mga lumad sa Australia ug sa ilang talagsaong arte ingon nga nangibabawng tema.
Hinuon, alang sa mga Saksi, ang kinamaayohang bahin sa tibuok nga biyahe mao ang tulo-ka-adlawng kombensiyon mismo. Alang sa pila kanila, kadto maoy kahigayonan sa daghang malipayong reunyon. Ang usa ka tasa sa mainit nga tsa maoy usa ka ilhanan sa pagkamaabiabihon niadtong anaa sa hilit nga bahin sa Australia, ug ang kombensiyon nagpabuhi niining kostumbreha pinaagi sa talagsaon niining billy-tea-and-damper nga mga toldang painitan. Ang tsa nga billy maoy tsa nga gilaga ibabaw sa daob diha sa nangitom-sa-anuos nga latang ginganlag billy. Usahay ang nagbukal nga tubig kutawon pinaagi sa sanga sa kahoyng eucalyptus, o gum samtang ang mga dahon sa tsa ibubo sa billy. Ang gamayng sanga sa eucalyptus nga gibutang ibabaw sa billy nagsilbing pugong aron dili makasulod ang aso sa tsa.
Ang damper maoy yanong matang sa tinapay. Ang gikinahanglan lang nga sagol mao ang harinang gisagolag-igpapatubo ug tubig ug asin. Samtang init pa, hiwaon ang damper ngadto sa baga nga mga hiwa ug dayon pahiran ug daghang mantekilya ug luspad-ug-kolor nga molasses. Ang billy-tea-and-damper nga tolda maoy usa sa labing popular nga mga dapit tagboanan diha sa lagwerta sa kombensiyon.
Matinumanong Pag-alagad Bisag Nahilit
Ang Kongregasyon sa Alice Springs nalangkoban sa 72 ka Saksi ug nag-atiman sa mga 200,000 kilometro kuwadrado. Ang Darwin maoy duolan sa 1,800 kilometros paingon sa amihanan, ug ang Adelaide duolan sa 1,600 kilometros ngadto sa habagatan. Ang nagaduawng mga delegado natingala sa pagkakita nga direkta kon unsa ka mahagiton ang pagkinabuhi sa hilit nga mga dapit tungod sa sobrang gilay-on, sa kanunayng kainit, sa abog, ug sa pagkanahilit.
Usa ka talagsaong pananglitan mao ang nagminag-uranyo nga lungsod sa Jabiru. Usa lang ka Saksi ang nagpuyo dinhi, ug ang gipuy-an niya maoy 260 ka kilometros gikan sa kinadul-ang kongregasyon. Bisan pa, ang pagkanahilit wala makapaluya kaniya sa espirituwal. Ang iyang presensiya diha sa kombensiyon maoy pagdasig sa daghan pang uban. Usab, gikan sa hilit nga Aborihinal nga komunidad sa Jilkmingan, sa tumoy sa Arnhem Land sa Amihanang Teritoryo, ang upat ka estudyante sa Bibliya mibiyahe aron malakip sa 26 nga nabawtismohan niining kombensiyona.
Mga Delegado Nagpasidlak sa Ilang Kahayag
Kay natapos ang kombensiyon, ang tanang bus mipaingon sa amihanan ngadto sa ibabawng tumoy sa kontinente sa Australia. Ang kinamaayohang bahin niining linaing biyahe mao ang paglawig sa sakayan diha sa presko, tin-aw nga katubigan sa Katherine Gorge padulong sa ilado-kaayong Kakadu National Park. Kini naghatag sa mga pumapanaw sa ilang unang pagtan-aw sa mga buaya diha sa lasang. Madanihon, apan makahahadlok ug diyutay! Unya, human sa usa ka makalingaw nga gabii sa Darwin, ang kabiserang siyudad sa Amihanang Teritoryo, ang sunod nga paghunong sa biyahe maoy didto sa Mataranka Station, nga ilado sa nalinyahag-palmira, sama-sa-kristal-ka-tin-aw nga init nga mga tubod ug danaw.
Hinuon, ang panan-aw-tan-aw wala magpagawas sa espirituwal nga mga kalihokan. Ang mga bus nahimong mabalhinbalhin nga mga Kingdom Hall. Ang usa ka teksto gikan sa Kasulatan ug ang naimprintang mga komento gihisgotan matag adlaw, ug ang naandang senemanang mga tigom sa kongregasyon gihimo diha sa dalan. Ang usa ka drayber sa bus nga dili Saksi nadani kaayo nga, sa iyang kaugalingong inisyatibo, mipalit siya ug extension cord, mikropono, ug plag aron ikonektar ngadto sa trompa sa bus aron nga kadtong nagkomento niining maong panaghisgot mabating mas tin-aw pa.
Panahon sa biyahe, usa ka edarang pumapanaw nagkasakit pag-ayo nga kinahanglan siyang dad-on sa lokal nga ospital. Usa ka higala nagpabilin uban kaniya, apan ang mga bus kinahanglang mopadayon sa biyahe. Duha ka adlaw sa ulahi, tapos sa iyang pagkaayo, siya ug ang iyang kauban masulob-on ug nahigawad pag-ayo tungod kay wala makakuyog sa nahibiling bahin sa biyahe. Apan ang Kristohanong gugma nag-iban sa ilang kasubo.
Duha ka lokal nga Saksi nga mga piloto nakamatikod sa kahimtang. Unya ang mga butang dali rang nahitabo. Sa wala madugay silang upat misakay sa gamay nga ayroplano, nga mipadulong sa lungsod sa Port Augusta aron moapas sa mga bus. Usa ka pumapanaw mahinuklogong mituaw: “Kami napuno sa gugma ug pagpabili alang sa kahibulongang panag-igsoonay nga nahisakopan nato!” Apan dili kay kini lang. Pag-abot sa ayroplano, ang pila ka kaubang delegado miboluntaryo sa pagpakig-ambit sa pag-amot sa pinansiyal nga paagi aron bayran ang gasto sa mga piloto! Ang drayber sa bus dayag nga natandog niining pasundayag sa inigsoong pagbati, nga nag-ingong wala pa siya makakitag sama niini kaniadto.
“Sa pagpalandong sa tulo ka semanang nagugol diha sa biyahe sa Alice Springs,” nag-ingon ang usa ka pumapanaw, “akong nakaplagan kana nga maoy labing makapadasig ug makapalig-on-sa-pagtuo nga kasinatian nga akong nabatonan sukad. Nilabaw sa tanan ang espiritu sa panaghiusa nga natagamtam namong tanan. Dili igsapayan kon asa kami moadto—ang tinuod nga bahandi mao ang among panaghiusa sa hunahuna ug espiritu!”
[Mapa sa panid 18]
(Alang sa aktuwal nga pagkahan-ay, tan-awa ang publikasyon)
Mga rota sa biyahe paingon ug gikan sa Alice Springs nga kombensiyon
Kasadpang Australia
Amihanang Teritoryo
Queensland
New South Wales
Habagatang Australia
Victoria
Tasmania
Darwin
Perth
Alice Springs
Brisbane
Sydney
Adelaide
Melbourne
Hobart
Uluru (Ayers Rock)
Port Augusta
Kakadu National Park
[Hulagway sa panid 16, 17]
Ang mga Aborihinal lakip niadtong nagpaabot sa bawtismo sa distritong kombensiyon sa Alice Springs
[Hulagway sa panid 17]
Daob uban sa billy nga tsa ug damper
[Hulagway sa panid 17]
Buaya nga nagbulad sa adlaw sa Kakadu National Park
[Mga hulagway sa panid 18]
Uluru (Ayers Rock) 470 kilometros habagatang-kasadpan sa Alice Springs
Kinaiyanhong eksena sa Kakadu National Park sa Amihanang Teritoryo