Gikan sa Among mga Magbabasa
Urakan nga Andrew Pagkanindot nga artikulo! (“Mga Butang nga Dili Malaglag sa Urakang Andrew,” Enero 8, 1993) Kay nakapribilehiyo sa pagbulig sa buluhaton sa hinabang, gikahimut-an ko ilabina ang mga pangutlo gikan sa lokal nga mga molupyo. Ang pito ka adlaw nga gigugol nako didto naglig-on sa akong pagsalig kang Jehova ug nagdasig kanako nga higugmaon sa dugang ug dugang pa ang akong Kristohanong kaigsoonan.
M. J., Tinipong Bansa
Paglutos sa Nazi Salamat sa artikulong “Paghupot ug Integridad sa Nazi nga Alemanya.” (Pebrero 8, 1993) Ang atong Kristohanong mga igsoong lalaki ug babaye nakaagig daghan kaayong pagsulay, apan sila nagpabiling matinumanon! Kon ugaling maagian ko ang grabeng pagsulay, panghinaoton ko nga makabaton sa kalig-on ug kamalahutayon ni Josef Rehwald ug sa iyang pamilya.
D. J., Tinipong Bansa
Karong adlawa nabasa nako ang sugilanon sa kinabuhi ni Josef Rehwald. Nanglugmaw ang mga luha sa akong mga mata samtang gipalandong ko kon sa unsang paagi paluyohan ni Jehova ang iyang mga alagad panahon sa kasakitan. Dili ako makapugong sa pagpasalamat Kaniya!
V. M., Italya
Kalingawan Ang mga artikulong “Sa Unsang Paagi Apektado sa Kalingawan ang Imong Kinabuhi?” (Nobyembre 8, 1992) maoy tukma kaayo sa panahon. Gipabilhan ko ilabina ang impormasyon mahitungod sa mga pelikula. Ako nagtrabaho sa usa ka tindahang tigpaabang ug video teyp, ug ang sineng Basic Instinct nga inyong gihisgotan sa inyong artikulo maoy usa sa labing popular nga video teyp nga giabangan gikan sa maong tindahan. Dili ako makatuo sa unsang paagi ang maong dili-maayong mga pelikula mahimong dakong negosyo!
D. M., Tinipong Bansa
Modernong Arte Sa pagbasa sa ulohang “Modernong Arte Wala Makapasar sa Pasulit” (“Pagpaniid sa Kalibotan,” Nobyembre 8, 1992), ang usa makatuo nga ang mga pintal nga acrylic dili kaayo mapuslanon. Dili kana tinuod. Sa tinuoray, kana adunay daghang bililhong bentaha kay sa ubang matang sa pintal. Pananglitan, kana dili mosagol sa oksiheno. Dugang pa, ang komersiyal nga mga canvass mogamit ug acrylic nga pintal. Ang kapeligrohan sa pagkapakpak mahitabo sa dihang ang pintal nga acrylic dili ipahid sa tukmang paagi, tingali nganha sa hugaw o may grasang mga nawong. Tingali kini ang nahitabo sa mga dibuhistang ginganlan.
J. W., Switzerland
Gipasalamatan namo ang maong pagpatin-aw.—ED.
Badlongong mga Igsoon Salamat sa artikulong nag-ulohang “Mga Batan-on Nangutana . . . Mahisama Kaha Ako sa Akong Igsoong Lalaki?” (Disyembre 22, 1992) Gipasalamatan ko pag-ayo kana. Ang akong magulang nga babaye kaniadto usa ka payunir [bug-os-panahong magsasangyaw], ug kami suod. Akong tumong nga makapayunir kauban niya, apan ang akong tumong sa wala madugay naawop. Upat ka bulan human ako mabawtismohi ingong usa sa mga Saksi ni Jehova, siya napalagpot [giekskomunikar] gikan sa kongregasyon. Pait kaayo kadto alang kanako, ilabina sa dihang mangutana ang mga higala mahitungod kaniya. Dili ko na siya ikapasigarbo. Ang artikulo nagpaamgo kanako nga ako makahimo (ug mamahimo) nga malahi!
L. S., Tinipong Bansa
Ako gilisdan sa dihang napalagpot ang akong magulang nga lalaki. Bisan pa niana, ako wala mahisama kaniya. Karon graduwado na ako sa hayskul ug makapayunir na. Ako nagtabang usab sa pagtukod ug mga Kingdom Hall sa mga Saksi ni Jehova. Gusto ko nga magkugi ug molahutay sa pagbuhat kon unsay maayo.
K. M., Hapon
Ako dunay duha ka magulang nga lalaki nga napalagpot. May panahong ako nahadlok nga magpabawtismo tungod kay naghunahuna nga basin ako mahisama kanila. Gitubag ni Jehova ang akong mga pag-ampo pinaagi sa maong artikulo. Sa Enero, ako nabawtismohan. Sa ingon ako nakapasundayag sa kadaghanan nga ako nagpahinungod sa akong kaugalingon kang Jehova, ug ako magbantay nga dili makabuhat sa samang mga sayop sa akong mga magulang nga lalaki.
R. C., Italya