“Pagkat-on sa Leksiyon sa Pagkamatinugoton”
SAMTANG nagsingabot kita sa kataposan sa ika-20ng siglo, ang katawhan ba sa katibuk-an nakakat-on ug mga leksiyon gikan sa mabangisong kasaysayan niini sukad sa 1914? Si Federico Mayor, direktor heneral sa UNESCO (United Nations Educational, Scientific, and Cultural Organization), dili kaayo malaomon diha sa usa ka artikulong iyang gisulat alang sa The Unesco Courier. “Ang kalibotan kansang pagguho maila . . . dili makadasig ug bug-os-kasingkasing nga kasibot. Ang relihiyosong pundamentalismo, nasyonalismo, rasanhon ug etnikong pagkamadapigon, batok-semitismo: ang hangin sa kagawasan naghaling na usab sa mga kalayo sa pagdumot. . . . Ang pagkagun-ob sa daang kahikayan nagbilin ug bukas nga nataran alang sa tanang matang sa bag-ong mga inisyatibo, nga ang pipila kanila gubot kaayo—ug ang kabangis molambo sa usa ka basiyo.”
Nganong molambo man ang kabangis? Nganong ang mga tawo magdumot ug mopatay sa uban tungod lang sa kalainan sa relihiyon o etnikong kagikan? Kon kaha sa kanhi Yugoslavia, sa India, sa Amihanang Irlandia, sa Tinipong Bansa, o bisan diin sa kalibotan, usa sa mga hinungdan morag nahiluna diha sa sayop-pagkagiyang edukasyon. Inay makakat-on sa mutuwal nga kamatinugoton ug pagtahod, ang mga tawo nakakat-on sa dili pagsalig ug pagdumot gikan sa ilang mga ginikanan, gikan sa ilang mga tunghaan, ug gikan sa katilingban sa katibuk-an.
Si Federico Mayor nagpadayon: “Biyaan nato kanang kaduhaduhaang pagkamatinugoton nga motugot kanato sa pagtugot sa dili-katugotan—ang kakabos, kagutmanan ug pag-antos sa minilyong katawhan. Kon himoon nato kana, atong mahibalag ang kainit sa silaw sa adlaw sa kaluoy ug pagkamanagsoon.” Kini sila hamiling mga pagbati. Apan unsang praktikal nga mga paagi ang naglungtad nga makausob sa nangitngitang espiritu nga nagpahipi sa gitawag nato nga nahayagang kalibotan?
Kapin ug 2,500 ka tuig sa miagi, gitala ni Isaias kining mga pulong ni Jehova: “Ang tanan nimong mga anak mao unyay mga tawo nga tinudloan ni Jehova, ug modagaya ang pakigdait sa imong mga anak.” (Isaias 54:13) Sanglit “ang Diyos gugma,” nagpasabot kini nga kadtong tinuod nga nagsunod sa iyang mga prinsipyo diha sa kinabuhi makakat-on sa pakigdait, dili sa gubat; sa gugma, dili sa pagdumot; sa pagkamatinugoton, dili sa pagkadili-matinugoton.—1 Juan 4:8.
Kinsa ang nagpasiugda niining pagtulon-ana nga motultol sa katawhan ngadto sa pakigdait ug gugma ug pagkamatinugoton? Kinsa ang nagkinabuhi nga may panaghiusa walay sapayan sa ilang nasodnong kagikan? Kinsa ang nakadawat ug pagtudlo sa Bibliya nga nakapausab sa tibuok nilang panglantaw gikan sa pagkamadinumtanon ngadto sa pagkamahigugmaon? Among gisugyot nga inyong susihon ang mga pagtulon-an ug mga binuhatan sa mga Saksi ni Jehova aron masayran kon nganong sila tinuod nga adunay tibuok-kalibotang panaghiusa.—Juan 13:34, 35; 1 Corinto 13:4-8.