Usa ka Bag-ong Kalibotan—Moabot ba Gayod Kini?
NIADTONG Abril 13, 1991, si George Bush, kanhi presidente sa Tinipong Bansa, mihatag ug pakigpulong sa Montgomery, Alabama, nga nag-ulohan: “Ang Posibilidad sa Usa ka Bag-ong Kalibotang Kahikayan.” Sa pagtapos, siya miingon: “Ang bag-ong kalibotan nga nagaatubang kanato . . . , kini maoy usa ka kahibulongang kalibotan sa pagdiskobre.”
Duha ka bulan sa ulahi ang The Bulletin of the Atomic Scientists miingon nga uban sa pagkahugno sa mga rehimeng Komunista sa Silangang Uropa, “usa ka bag-ong kalibotang kahikayan nga gipasukad sa pakigdait, hustisya, ug demokrasya maorag haduol na.”
Ang maong paghisgot bahin sa usa ka bag-ong kalibotan nagpadayon hangtod sa 1993. Ang The New York Times sa Enero mitaho bahin sa usa ka tratado nga nanumpa sa mga pagkunhod sa nukleyar nga mga armas. Ang peryodiko miingon: “Kana nagbutang sa Amerika ug Rusya ‘sa ganghaan sa usa ka bag-ong kalibotan sa paglaom,’ sumala sa maayong-pagkapiling mga pulong ni Presidente Bush.”
Duha ka semana human niadto ang bag-ong presidente sa T.B., si Bill Clinton, miingon diha sa iyang pakigpulong sa inagurasyon: “Karong adlawa, samtang milabay na ang daang kahikayan, ang bag-ong kalibotan mas may kagawasan apan dili kaayo malig-on.” Siya gani miangkon: “Kining bag-ong kalibotan nakapadato na sa mga kinabuhi sa milyon-milyong Amerikano.”
Busa dihay daghang panaghisgot bahin sa usa ka bag-ong kalibotan—usa ka lahi ug labing maayong kalibotan. Sumala sa usa ka ihap, sulod lamang sa usa ka mubong yugto, si George Bush nakahisgot ug 42 ka beses diha sa mga pahayag sa publiko bahin sa usa ka “Bag-ong Kalibotang Kahikayan.”
Apan ang mao bang panaghisgot talagsaon? Nadungog na ba kini niadto?
Dili Gayod Butang Bag-o
Niadtong Mayo 1919, human gayod sa Gubat sa Kalibotan I, ang Federal Council of the Churches of Christ in America mihimog usa ka miting sa Cleveland, Ohio, diin ‘ang posibilidad bahin sa usa ka bag-o ug mas maayong kalibotan’ gipahibalo. Usa ka mamumulong mipahayag: “Kini unya maoy usa ka bag-ong kalibotan diin ang prinsipyo sa kompetisyon pagapulihan sa prinsipyo sa panag-ubanay ug pakigsandurotay. Kini unya maoy usa ka bag-ong kalibotan diin ang prinsipyo sa panaghiusa maoy mopuli sa prinsipyo sa pagbahinbahin . . . Kini maoy usa unya ka kalibotan diin ang panag-igsoonay ug panaghigalaay magwagtang sa tanang pagdumtanay gawas sa gubat batok sa daotan.”
Unsay gituohan sa mga simbahan bahin niining moabot nga bag-ong kalibotan? Pinaagi ba sa Gingharian sa Diyos nga kagamhanan nga gisaad sa Bibliya? Dili. Sila naglantaw sa politikanhong organisasyon nga maoy mopatungha sa maong bag-ong kalibotan. “Kon unsay atong gihisgotan karong adlawa ingong ang Liga sa Kanasoran,” usa ka lider sa simbahan miingon, “maoy kinahanglanon kaayo ug dili malikayang resulta sa tanan natong Kristohanong pagtuo ug paningkamot sa kalibotan.” Giduso pa gani sa mga lider sa Simbahan niadtong yugtoa ang Liga sa Kanasoran ingong “ang politikanhong kapahayagan sa Gingharian sa Diyos sa yuta.”
Sa laing bahin, usa ka gamhanang lider sa Alemanya, si Adolf Hitler, misupak sa Liga sa Kanasoran ug sa katuigang 1930 nagtukod ug Third Reich (rehimeng Nazi) sa Alemanya. Siya miingon nga ang Reich molungtad ug usa ka libo ka tuig ug maoy motuman sa giingon sa Bibliya nga ang Gingharian sa Diyos lamang ang makahimo. “Ako magsugod sa mga batan-on,” si Hitler miingon. “Uban kanila makahimo ako ug usa ka bag-ong kalibotan.”
Si Hitler nagpatukod ug usa ka dakong istadyum sa Nuremberg aron ipasundayag ang gahom sa Nazi. Makahuloganon, gipatindog ang 144 ka dagkong haligi diha sa plataporma nga mga 300 metros ang gitas-on. Nganong 144 ka haligi? Ang Bibliya naghisgot bahin sa 144,000 nga magmando uban “sa Kordero” si Jesu-Kristo, ug nga ang ilang pagmando moabot ug usa ka libo ka tuig. (Pinadayag 14:1; 20:4, 6) Dayag, ang pagpatindog ug 144 ka haligi diha sa istadyum sa Nuremberg dili kay aksidente lamang nga numero, sanglit ang paggamit sa mga opisyal sa Nazi sa pinulongan ug simbolismo sa Bibliya maayong pagkadokumento.
Unsay resulta sa mga paningkamot sa mga tawo sa pagkab-ot sa gisulti sa Bibliya nga malampos pinaagi lamang sa Gingharian sa Diyos?
Kapakyasan sa mga Paningkamot sa Tawo
Gipamatud-an gayod sa kasaysayan nga ang Liga sa Kanasoran napakyas sa pagpatungha ug usa ka bag-ong kalibotan sa pakigdait. Ang maong organisasyon nahugno sa dihang ang mga nasod nalangkit sa Gubat sa Kalibotan II. Dugang pa, tapos lamang sa 12 ka tuig, ang Third Reich nalumpag. Bug-os kadto nga kapakyasan, usa ka kaulawan sa tawhanong pamilya.
Sa tibuok kasaysayan ang tawhanong mga paningkamot sa pagmugna ug usa ka malinawon bag-ong kalibotan wala gayod molampos. “Ang matag sibilisasyon nga sukad naglungtad sa ulahi bug-os nga napukan,” miingon ang kanhi Kalihim sa Estado sa T.B. nga si Henry Kissinger. “Ang kasaysayan maoy usa ka sugilanon sa mga paningkamot nga napakyas, sa mga pangandoy nga wala matuman.”
Nan, unsa man ang mahitungod sa bag-ong kalibotang kahikayan nga gipasigarbo sa mga lider sa kalibotan sa dili pa dugay? Ang mga pagbuto sa etnikong kapintasan nagbiaybiay sa mismong ideya sa maong bag-ong kalibotan. Pananglitan, niining miaging Marso 6, ang kolumnistang si William Pfaff miyubit: “Ang bag-ong kalibotang kahikayan miabot na. Kini nagaobrag maayo ug tinuod bag-o, nagabalaan sa pagsulong, pag-atake ug etnikong pagpuo ingong dalawatong internasyonal nga paggawi.”
Ang grabeng panag-away ug kabangisan nga nahitabo sukad sa pagkahugno sa Komunismo makalilisang. Bisan si George Bush, sa talibiya na sa iyang katungdanan niadtong Enero, midawat: “Ang bag-ong kalibotan, sa ngadtongadto, mahimong ingon ka peligro sa karaan.”
Katarongan Alang sa Paglaom?
Kini nagpasabot ba nga ang kahimtang wala nay paglaom? Ang bag-ong kalibotan ba usa lamang ka pangandoy? Sa tin-aw, ang mga tawo wala gayod molampos sa pagmugna ug usa ka bag-ong kalibotan. Apan komosta ang mahitungod sa saad sa Maglalalang sa pagbuhat niana? “Adunay bag-ong mga langit ug usa ka bag-ong yuta nga atong ginapaabot sumala sa iyang [Diyos] saad,” nag-ingon ang Bibliya.—2 Pedro 3:13.
Ang bag-ong mga langit nga gisaad sa Diyos maoy usa ka bag-ong pagmando ibabaw sa yuta. Kining bag-ong pagmando mao ang Gingharian sa Diyos, ang iyang langitnong kagamhanan nga maoy gitudlo ni Jesus sa katawhan nga iampo. (Mateo 6:9, 10) Kanang langitnong kagamhanan unya pagalangkoban ni Jesu-Kristo ug sa 144,000 ka kaubang magmamando, ug ang bag-ong yuta mao ang bag-ong katilingban sa katawhan. Oo, sila mabuhi diha sa usa ka mahimayaong bag-ong kalibotan nga maunongong magapaluyo sa pagmando sa Diyos.
Ang kagamhanang Gingharian sa Diyos magmando unya ibabaw sa gisaad nga bag-ong kalibotan. Busa kining bag-ong kalibotan dili hinimo sa tawo. “Ang gingharian sa Diyos wala gayod magpasabot sa aksiyon nga gihimo sa tawo o sa dominyo nga ilang gitukod,” miingon ang usa ka ensiklopedia sa Bibliya. “Ang gingharian maoy usa ka diyosnong buhat, dili kahimoan sa tawo ni kahimoan sa dedikadong mga Kristohanon.”—The Zondervan Pictorial Encyclopedia of the Bible.
Ang bag-ong kalibotan ubos sa Gingharian sa Diyos tinong moabot. Ikaw makasalig sa saad sa pag-abot niana tungod kay ang maong saad gihimo sa “Diyos, nga dili magabakak.” (Tito 1:2) Palihog tagda kon unsang matanga unya sa kalibotan ang bag-ong kalibotan sa Diyos.
[Picture Credit Line sa panid 3]
Letrato sa NASA