Naglisod ang mga Eskuylahan

Ang mga ginikanan magpaeskuyla sa ilang mga anak aron makakat-on ug labaw pa kay sa pagbasa, pagsulat, ug aritmetika. Sila nagdahom nga itagana sa mga eskuylahan ang mabug-osong edukasyon, nga magsangkap sa mga batan-on nga motubong mga hamtong nga ikapasigarbo sa mga ginikanan. Apan sagad nga dili matuman ang ilang gidahom. Ngano? Kay naglisod ang mga eskuylahan sa tibuok kalibotan.

SA DAGHANG nasod ang kakulang sa salapi ug sa mga magtutudlo nagpameligro sa edukasyon sa kabataan. Pananglitan, sa tibuok Tinipong Bansa, ang pag-us-os sa panalapi sa bag-ohay pang katuigan nagpugos sa pila ka eskuylahan sa pag-ilis lang sa mga hapin sa ‘daang mga teksbok inay pagpalit ug bag-o, nga pasagdang mangahup-ak ang plaster sa kisame, sa pagwagtang sa mga klase sa arte ug mga programa sa paugnat sa kusog o isports, o sa paghunong sa akademikong pagtudlo sa daghang adlaw,’ mipahayag ang magasing Time.

Sa Aprika, ang pondo alang sa edukasyon susamang kulang. Sumala sa Daily Times sa Lagos, ang nasod sa Nigeria adunay proporsiyon nga 1 lang ka magtutudlo alang sa matag 70 ka estudyante, “uban sa dakong posibilidad nga ang usa sa matag tulo ka magtutudlo dili kuwalipikado.” Sa Habagatang Aprika​—dugang pa sa kakulang sa mga magtutudlo​—ang sobrag-estudyanteng mga lawak-klasehanan ug politikanhong kagubot nakaamot sa gitawag sa South African Panorama nga “ang kaguliyang diha sa mga eskuylahan sa mga itom.”

Siyempre, ang eskuylahan nga adunay igong gidaghanon sa kuwalipikadong mga magtutudlo ug igong kasangkapan dili mogarantiya sa edukasyonal nga kalamposan. Pananglitan, sa Austria, duolag un-tersiya sa mga tag-14-anyos gikataho nga dili makamao sa yanong aritmetika o makabasa sa tukmang paagi. Sa Britanya, ang porsiento sa mga estudyante nga pasado sa matematika, siyensiya, ug nasodnong pinulongan “iwit kaayo kay nianang sa Alemanya, Pransiya ug Hapon,” mipahayag ang The Times sa London.

Sa Tinipong Bansa, ang mga magtutudlo nangreklamo nga bisan pag ang mga estudyante tag-as ug mga grado sa mga pasulit, daghan ang dili makasulat ug maayong komposisyon, makasulbar ug mga problema sa matematika, o makagamag sumaryo sa hinungdanong mga punto sa lainlaing mga leksiyon o mga dokumento. Busa, ang mga awtoridad sa edukasyon sa tibuok kalibotan nagatuon pag-usab nga walay-kamadapigon sa kurikulum ug sa mga metodo nga gigamit sa eskuylahan aron timbangtimbangon ang pag-uswag sa usa ka estudyante.

Kapintasan Diha sa mga Eskuylahan

Ang mga taho nagpadayag sa makahadlok ug nagatubo nga sukod sa kapintasan diha sa mga eskuylahan. Sa Alemanya, ang usa ka komperensiya sa mga magtutudlo gisultihan nga 15 porsiento sa mga bata sa eskuylahan “andam sa mental ug emosyonal nga paagi sa paghimog kapintasan​—ug 5 porsiento dili magapanuko nga mobuhat bisan sa mga buhat nga mabangison kaayo, pananglitan ilang patiran ang tawo nga dili-makadepensa nga nahilukapa sa salog.”​—Frankfurter Allgemeine Zeitung.

Ang indibiduwal nga mga kaso sa pagkabangis kaayo nakapukaw ug dakong kabalaka. Ang paglugos sa usa ka 15-anyos nga dalagita pinaagi sa upat ka batan-ong lalaki sa kasilyas sa usa ka hayskul sa Paris mitukmod sa mga estudyante sa pagdemonstrar sa publiko aron mangayog mas maayong kahikayan sa proteksiyon sa eskuylahan. Ang mga ginikanan nabalaka bahin sa pagtubo sa seksuwal nga mga sala, pangilad, ug emosyonal nga pagpamintas. Kanang mga kasoha dili lamang nagakahitabo sa Uropa kondili nagakahimong kasagaran na sa tibuok kalibotan.

Ang Ministri sa Edukasyon sa Hapon nagtaho sa pagsulbong sa kapintasan nga naglangkit sa mga estudyanteng tersero ug kuwarto-anyo sa hayskul. Ang mantalaang The Star sa Habagatang Aprika, ubos sa pangunang-ulohang “Mga Estudyanteng Nagdaladalag Pusil Nagmando sa mga Eskuylahan,” nagtandi sa esena sa daghang klasehanan sa Soweto ngadto sa iya sa “ang Dili-Sibilisadong Kasadpan” sa Tinipong Bansa panahon sa ika-19ng siglo. Bisan ang dungog sa kamapintason sa Siyudad sa New York nahidangat, sumala pa sa The Guardian sa London, “sa bag-ong tayuktok uban sa pahibalo sa usa ka kompaniya sa seguridad mahitungod sa mga hangyo nga mopalit ug mga bisteng dili madutlan ug bala alang sa mga batang nagtungha.”

Ang Britanya usab nadaot sa pagdagsang sa kapintasan diha sa eskuylahan. “Sa miaging 10 ka tuig,” matud sa usa ka opisyal sa unyon sa mga magtutudlo, “nakita namo ang nagatubong kiling sa paggamit ug armas. Nag-us-os usab ang edad sa mga bata ug dili lang mga lalaki ang naggamit ug armas, apan hasta mga babaye.”

Nan, dili katingad-ang gihukom sa pila ka ginikanan nga kuhaon ang ilang mga anak gikan sa eskuylahan ug tudloan sila diha sa balay.a Kadtong nag-isip nga dili kini praktikal sagad mabalaka bahin sa daotang epekto sa eskuylahan diha sa ilang mga anak, ug sila naghunahuna kon sa unsang paagi kini mapukgo. Unsa ang mahimo sa mga ginikanan sa pagtabang sa ilang mga anak sa pagsagubang sa mga suliran nga mahibalag sa eskuylahan? Ug sa unsang paagi ang mga ginikanan makatabang sa mga magtutudlo aron matino nga makapahimulos sa labing maayo ang mga bata sa eskuylahan? Ang mosunod nga mga artikulo mohatag ug mga tubag nianang mga pangutanaha.

[Footnote]