Mas Malipayon ba ang Pamilyahanong Kinabuhi nga Walay TV?
NIADTONG Pebrero niining tuiga, ang The Wall Street Journal nasudlan ug artikulo: “Nagkinabuhing Walay TV: Pipila ka Pamilya Miuswag nga Walay TV.” Ang mantalaan nagtaho: “Alang sa maihap rang pamilyang Amerikanhon nga nangundang na sa pagtan-awg TV, ang kinabuhi nga walay telebisyon nagpadayon—nga mas malipayon.”
Ang epekto sa telebisyon diha sa pamilya gihisgotan usab ning bag-o pa sa usa ka panagtipon sa pagsaulog sa ika-40ng anibersaryo sa unang walay-upat-ka-minutong-milya, nga gidagan ni Roger Bannister. Sumala kang Jim Ryun, ang kampeyon sa usa ka milyang lumba niadtong katuigang 1960, ang ulohan mibangon panahon sa panihapon uban kang Roger sa wala pa ang 1968 nga Olympics.
“Kami sa akong asawa, si Anne, nagsabot nang magpakasal niadtong panahona,” miingon si Ryun, ‘mao nga si Roger miingon kanamo nga nakadiskobre siyag usa ka butang nga nagpauswag gayod sa kalidad sa iyang pamilyahanong kinabuhi. Siyempre pa, ikag kaayo kaming naminaw. Matud niya nga ang iyang gihimo mao ang pagwala sa telebisyon diha sa balay, mao nga kadto nakahatag kanila ug dugang panahon ingong usa ka pamilya nga magkauban, sa pag-estoryahanay, ug sa pagbasa.”
Si Ryun miasoy: “Ang iyang giingon may dakong epekto kanamo. Kami nakaamgo nga, ‘Wala gayod kami magkinahanglag TV.’”
Daghang tawo ang nakahinapos ug ingon niana. Ngano? Tungod sa makalamat nga epekto sa TV, ilabina sa batan-on. Matud sa usa ka inahan sa Maryland, T.B.A., sa dihang nagpatutoy sa iyang batang babaye sa atubangan sa TV, ang bata “kalit nga miliso sa iyang ulo palayo gikan kanako ug mitutok sa iskren. Kami nakahinapos nga kon nahimo niya kana sa maong edad, unsa pa kaha kon siya mogulang-gulang na?” Busa gidispatsar sa pamilya ang ilang TV.
Kon dili nimo wad-on sa bug-os ang TV, dili ba ang kontroladong paggamit niini sa labing menos makataronganon? Si Karen Stevenson, ang unang itom nga babaye nga nakadawat ug Rhodes Scholarship sa pagtungha sa Oxford University sa Inglaterra, miingon labot sa sayong bahin sa iyang kinabuhi: “Gidili ang pagtan-aw ug telebisyon sulod sa semana. Kon dunay usa ka salida nga gusto namong tan-awon . . . , kinahanglang mananghid kami kang [mama] bahin niini sa una pa sa Dominggo ug magplano alang niana.”
Komosta na man ang pagtan-awg TV sa inyong pamilya? Nakita ba nimo ang bili sa paglimite niana, o gani pagwala niana, sa usa ka panahon?