Gikan sa Among mga Magbabasa
Katistis Buot kong ipahayag ang akong apresasyon sa artikulong “Sagulig Katistis ang Imong Kinabuhi.” (Mayo 22, 1994) Ako tigpalain gayod kanunay, nga sagad pungtanon. Sa dihang natun-an ko nga isagol ang katistis sa akong kinabuhi, nausab ang mga butang. Ang katawa sa pagkatinuod mao “ang kinalaktorang gilay-on tali sa duha ka tawo.”
A. Q. G., Brazil
Kanser Sa dili pa dugay akong gihatagan ug kopya ang doktor sa akong inahan sa inyong Abril 8, 1944, nga isyu bahin sa “Kanser sa Suso—Gikahadlokan sa Tanang Babaye.” Sa panid 10 inyong gihubit ang hydrazine sulfate ingong “dili-makahilo nga droga.” Ang doktor nagpakita kanamog medikal nga basahon nga nagtala niini ingong makahilo gayod.
D. M., Pransiya
Sanglit ang pagkamakahilo niini nga kemikal maoy dayag lantugionon pa, kami nasayop sa pagtawag sa droga nga dili-makahilo. Usa ka Rusong panukiduki nga pagtuon miangkon nga kini napamatud-ang makahilo gayod kon ihatag sa dakong dosis sa mga ilaga ug sa mga taligatos sa laboratoryo. Hinunoa, sa usa ka klinikal nga pagtuon nga gihimo sa UCLA Medical Center bahin sa mga tawong mga pasyente sa kanser, ang pagkamakahilo sa hydrazine gitaho ingong “kasarangan” nga may 71 porsiento sa mga pasyente ang nagtaho nga walay makahilong mga epekto. Walay duhaduha dako pang panukiduki ang pagahimoon sa dili pa bug-os nga masusi ang mga risgo ug posibleng mga kaayohan niini nga droga.—ED.
Opera Ako kanunayng naghunahuna nga maayo kaayo ang inyong mga artikulo, ug gibati ko kanunay nga sila gisulat ilabina alang kanako. Apan wala ko palandonga nga mosulat kamo bahin sa butang nga akong gikalipayan pag-ayo, ang opera. Dili ako makahunong sa paghilak sa nakita ko ang artikulong “Usa ka Gabii sa Opera.” (Hulyo 8, 1994) Salamat kaayo.
S. S., Romania
Sugilanon ni Addie Ang artikulong “Ulahi Nang Nakaplagan ni Addie ang Tubag Apan Dili Sobra ka Ulahi” (Hulyo 22, 1994) talagsaon gayod kaayo! Kadto samag nagbasag usa ka nobela, gawas lang nga kadto usa ka tinuod nga sugilanon. Ako natandog sa dihang nasayran ko nga ang leksiyon sa iyang sugilanon mao nga ang labing epektibong paagi sa pagtabang sa atong mga silingan maoy pinaagi sa pagsangyaw!
D. L., Italya
Mao pay pagbasa nako sa sugilanon sa kinabuhi ni Addie Clinton Few, ug sa unang higayon sa 19 ka tuig sa akong pagbasa sa Pagmata!, ako misulat sa pagpasalamat kaninyo! Ako usab itom ug nag-antos sa mga tunok sa sosyal nga inhustisya sa tibuok kong kinabuhi. Apan nakakat-on ako nga si Jehova nagatagad gayod sa dili maayong kahimtang sa mga tawong lain ug kolor ug nga ang iyang gisaad nga bag-ong kalibotan magatul-id sa tanang sayop.
L. N., Tinipong Bansa
Ang artikulo nagpakita sa iyang kautokan ug katistis nga gilakipan sa iyang pagkamapainubsanon. Siya maayong moasoy ug sugilanon! Nakaplagan kong makapatandog ang iyang paniklop. Nagsakay ako sa bus nga hilom nga nagkatawa ug naghilak pagkatapos.
D. M., Tinipong Bansa
Sobrang Timbang Ako nakadayeg sa artikulong “Mga Batan-on Nangutana . . . Nganong Tambok Kaayo Ako?” (Abril 22, 1994) Ako naglagot kanunay sa akong timbang, apan ang artikulo nag-ingon nga si Jehova wala magtan-aw sa panagway sa gawas apan sa kon unsa ang anaa sa imong kasingkasing. Salamat.
N. C., Tinipong Bansa
Bisag ako dili kaayo tambok, usahay mangandoy ako nga mahisama niadtong mga modelo. Usahay ako maguol ug mohilak na lamang. Ang inyong artikulo nagtabang kanako nga makitang dili lamang ako ang mibatig sama niini, ug kana makapahupay.
R. M., Tinipong Bansa
Dili ako tambok, apan ako tigson nga babaye nga lapad ug mga abaga. Ako sulogsulogon sa akong mga ig-agaw ug magulang nga mga lalaki. Giapresyar ko ang inyong punto nga bisag ako tingali tigson, kana wala magpasabot nga ako kinahanglang magpamenos ug timbang.
M. T., Tinipong Bansa