May “Fritillary” Ka ba sa Imong Tanaman?

KON aduna ka niana, mahimuot ka sa katahom niana. Unsa may fritillary? Usa kini sa linibong lainlaing mga matang sa mga alibangbang nga nagpatahom sa atong kalibotan ug usa sa kapin sa 750 ka espisye nga makaplagan sa Tinipong Bansa ug Canada. Ang gipakita dinhi, nga usa ka great spangled, giletratohan sa usa ka tanaman sa tabunok nga banika sa estado sa Virginia. Ang great spangled nagpakita ug kolor plata nga mga gilakgilak sa ilalom sa pako sa likod. Ang hardinero tinuyong nagpugas diha sa usa ka luna sa tanaman ug ihalas nga mga bulak nga mitag-as ug nagdani sa mga alibangbang​—dihay dalag nga mga rudbeckia ug morado nga phlox.

Kon buot nimong modani ug mga alibangbang sa imong tanaman, sulayi ang pagpatubo ug ihalas nga mga bulak. Tingali makapalit ka ug usa ka putos nga liso sa ihalas nga mga bulak nga mahimong buloknon sama sa mga kolor diha sa paleta sa usa ka pintor aron madani nimo kining matahom nga mga alibangbang. Kon ikaw nagpuyo sa usa ka haom nga dapit sa kalibotan, ang sagbot nga buddleia makadani pag-ayo sa mga alibangbang. Dayon kuhaa ang usa ka kamera ug largabista, ug magkalingaw!