Mga Seminar sa Pagpalambo sa mga Relasyon sa mga Doktor ug mga Saksi ni Jehova
ANG mga Kristohanon gidid-an sa kasugoan sa Diyos sa pagpasulod ug dugo sa lawas sa bisan unsa nga paagi. (Buhat 15:28, 29) Ang pagsunod niana nga kasugoan usahay misangpot ug mga di-pagsinabtanay nga miresulta sa mga Kristohanon nga hinikawan sa mabatonan ug epektibong kapiliang medikal nga pagtambal sa ilang mga suliran sa panglawas.
Aron matukod ang mas maayong pagsabot ug sa pagtabang sa mga doktor nga itagana ang pagtambal nga walay paggamit ug dugo, ang mga Saksi ni Jehova nakaugmad ug usa ka matinabangong serbisyo sa pagpakiglabot. Gitukod sa Nagamandong Lawas sa mga Saksi ni Jehova ang Hospital Information Services (HIS) sa Brooklyn, New York, aron magbansay ug piniling Saksi nga mga ansiano nga mag-alagad diha sa Hospital Liaison Committees (HLCs). Ang medikal nga panukiduki gihimo ug ang mga resulta gipresentar diha sa mga seminar alang sa HLCs. Sa baylo, kining impormasyona gipresentar ngadto sa mga doktor ug sa mga sentro sa pag-atiman sa panglawas. Lain pa, ang pagpakigsayod sa ubang eksperyensiyadong mga doktor mahimong pagahikayon sa paningkamot nga malikayan ang panagbangi.
Nagmalamposon ba kining programaha? Nakatabang ba gayod ang impormasyong gipresentar? Unsay pagsanong sa mga doktor niini? Ang mosunod nga mga impresyon nga gitaho sa usa ka medikal nga doktor nga mitambong sa usa ka dili pa dugayng seminar sa HLC maoy matulon-anon ug mapasaligon.
“Naglaom ako nga makakaplag ka niining mga impresyona nga prangka ug mapuslanon.
“Una sa tanan, pasultiha ako kaninyo nga usa kadto ka pribilehiyo nga hangyoon nga motambong sa ikaduhang Hospital Liaison Committee Seminar nga gipresentar sa kawaning mga membro sa Hospital Information Services nga miabot gikan sa punoang mga buhatan sa mga Saksi ni Jehova sa New York. Ang akong mga pagdahom niining tigoma dili lamang kay naabot kondili nanobra pa. Ang pangbukas nga pakigpulong sa tsirman nagpadayag sa katibuk-ang kinaiyahan sa duha-ka-adlaw nga sesyon. Gipasiugda niya nga ang HLC dili lamang usa ka mekanismo sa pagsanong sa mga panginahanglan sa masakitong mga Saksi panahon sa ilang pag-estar sa ospital. Ang komite nagtaganag usa ka bulawanong kahigayonan nga ibutyag ang daghang sayop nga mga hunahuna bahin sa mga Saksi nga kasagarang gituohan sa publiko ug sa mga doktor, mga administrador sa ospital, ug ubang medikal nga mga kawani.
“Kini nakahatag kadan-agan sa kadaghanan niining mga tawhana sa pagkasayod nga ang mga Saksi ni Jehova dili gayod sama sa mga Christian Scientist sa ilang medikal nga mga pagtulon-an. Ang mga Saksi wala magpatuman sa ‘katungod nga mamatay’ o magpakamartir sila. Ang isyu bahin sa dugo dili usab usa ka lagda sa organisasyon kondili hinunoa usa ka kinasingkasing personal nga pagtuo. Ang maong mga pagpadayag nagpasiugda sa edukasyonal nga mga katuyoan sa HLC. Oo, bisag daw katingalahan, bisan ang mga doktor maedukar ug daghan pag makat-onan bahin sa dili-dugo nga medikal nga mga kapilian. Ako kanunayng nahibulong sa gisangkaron ug sa giladmon sa panukiduki nga gitagana niini nga kahikayan, nga ang kadaghanan maoy bag-o gayod alang kanako. Ug ang edukasyonal nga mga kalihokan sa HLC wala matapos dinhi. Sila nagaabot pa ngadto sa mga administrador sa ospital, sa sosyal nga mga serbisyo, ug bisan sa legal ug panghukmanan nga mga opisyal.
“Ang mga komite naningkamot sa hilabihan sa pagpangita, pagkontak, ug pagpangayog tabang sa mga doktor nga mapaluyohon sa mga pagtulon-an sa Saksi. Siyempre, kini nagaabot saylo pa sa komunidad sa mga doktor, sanglit ginatukod sa HLC ang maayong mga relasyon uban sa mga ospital, mga kawani sa pag-atiman sa panglawas, mga abogado, ug ingon man usab sa mga huwes. Tingali ang labing nangibabawng mensahe nga igapahayag mao nga ang mga Saksi ni Jehova maoy makataronganong mga tawo, dili mga panatiko, ug naghangyo lamang sa dalawatong mga kahulip sa dugo. . . . Adunay dagkong mga kapeligrohan sa paggamit ug dugo, ug ang HLC dayag nga nagtuman sa katuyoan sa pagyagyag niini nga mga kapeligrohan ug nagpasiugda ngadto sa medikal nga komunidad sa posibleng mga risgo sa dugo ug sa mga produkto sa dugo.
“Ako kanunay nga nahingangha sa impormasyon nga gitagana ngadto sa HLC pinaagi sa Hospital Information Services ug sa Watch Tower Society. Apan sama sa ipamatuod sa tanang batid nga trabahante, halos ang tanang trabaho mahimong molampos kon sangkapan ug hustong mga gamit. . . . Makaiikag nga pamation ang mahitungod sa mga kahikayan nga ginapalakaw na karon sa pagsanong dayon sa madali ug epektibo ngadto sa halos tanang medikal nga emerhensiya. Ang matag membro sa HLC gibansay nga makabatog hinungdanong impormasyon bahin sa katawhan, aron matimbangtimbang dayon ang tinamdan sa mga doktor ug mga ospital, ug aron matino sa tukmang paagi ang kaseryoso sa emerhensiya ug sa posibleng hulga sa legal nga aksiyon sa ospital sama sa mga sugo sa korte alang sa pagdugang ug dugo.
“Gisusi namo ang mga paagi aron matin-aw ang mga panginahanglan ug kagustohan sa mga pasyenteng Saksi, kon sa unsang paagi pakiglabotan ang dili-magtutuong mga paryente, bisan ang paagi sa pag-ilis sa mga doktor ug sa pagbalhin sa pasyente ngadto sa kapiliang medikal nga mga pasilidad nga mas masanongon sa mga panginahanglan sa Saksi. Ang pagpakiglabot sa HLC sa palumagian sa balita gipasiugda, ug gilatid ang mga giya, nga sa makausa pa nagpasiugda sa pangunang tumong nga ang mga Saksi dili modumili sa tanang medikal nga pag-atiman, ang dugo lamang. Kini mahimong pagaisipon nga halos katumbas sa usa ka debotadong Katoliko nga modumili sa aborsiyon apan dili sa tanang operasyon.
“Ang mga membro sa liaison nga komite nabansay sa pagtubag sa daghang kasagarang mga pangutana nga isukna sa mga ospital ug mga doktor, usahay bisan sa mga Saksi mismo. Mahimong maglakip kini sa mga isyu sama sa pagkadalawaton sa mga immunoglobulin o albumin, ang paggamit sa cryoprecipitate o sa medikal nga mga teknik sama sa hemodilution, extracorporeal circulation, sa cell saver, o hemodialysis.
“Nakapahimulos ako sa makaiikag nga pagpakighisgot labot sa legal nga mga butang nga nalangkit sa pagsabot ug sa paggamit sa balaod sa pagdepensa sa mga Saksi ug sa ilang relihiyosong mga pagtuo. Ang mga desisyon sa hukmanan nga nahimong pundasyon sa pagpanalipod sa mga katungod sa mga Saksi sa kaugalingong paghukom bahin sa pagpatambal mao ang pasukaranan sa makaiikag nga panaghisgot. Alang sa uban, ang buluhaton sa Hospital Liaison Committee daw paghinobra na, gani wala kinahanglana; apan ang tinuod, kini nga sistema sa nagasuportar nga mga serbisyo hinungdanon. Matag adlaw makita ko ang mga pasyenteng Saksi nga dili sinati sa kahimtang sa ospital ug tingali walay kasayoran bahin sa daghang dili-dugong medikal nga mga kapilian. Dugang pa, pipila lamang gayod ang masinati sa sukod sa mga doktor nga andam motabang nga nailhan sa komite o sa espesipikong legal nga mga katungod ug mga tulubagon ug pagaatubangon sa matag usa kanato sa pagpangitag dili-dugong medikal nga pagtambal.
“Tugoti akong motipas sa makadiyut aron dayegon ang mga paningkamot sa HIS. Ingong usa ka interventional cardiologist, nakita ko nga diyutay ra kaayo ang panahon sa pagbasa sa daghang basahon nga hinungdanon sa akong laing giespesyalisar, unsa pa kaha ang mas halapad nga natad sa internal medicine. Usa ka imposibleng buluhaton ang pagpangita diha sa hilabihan ka daghang medikal nga literatura kadtong maong mga reperensiya nga tingali nagpunting sa pila ka espesipiko kaayong mga solusyon sa mga suliran nga maatubang diha sa dili-dugo nga pagtambal sa akong mga pasyente. Sa makausa pa natabangan ako sa Sosyedad sa pagtaganag usa ka batobalani sa pagpangita sa dagom sa hinungdanong panukiduki gikan nianang sanglitanang pundok sa mga artikulo sa basahon.
“Ang padayong pagbag-o sa mga impormasyon gikan sa Brooklyn nakatabang kanako sa pag-abay sa labing bag-ong mga kaugmaran nga makaapektar sa akong pagpanambal. Kini mas labawng malukpanon ug dili-pugsanon sa bisan unsang basahon sa medisina nga makita diha sa kompiyuter nga akong nahibaloan. Siyempre, maingon gayod niana, sanglit kinabuhi ang nalangkit.”—Sinulat ni Dr. Stephen E. Pope, usa ka espesyalista sa kasingkasing duol sa San Francisco Bay, sa California, T.B.A.
[Kahon sa panid 20]
• Sa Tinipong Bansa, mga 18,000 ka doktor ang malipay sa pagkooperar pinaagig pagtaganag dili-dugong medikal nga pag-atiman sa mga Saksi ni Jehova. Sa tibuok yuta ang gidaghanon maoy 50,000.
• Sa Tinipong Bansa, adunay 45 ka medikal nga mga sentro diin mabatonan ang mga programa sa dili-dugong medisina ug operasyon. Sa tibuok yuta ang gidaghanon maoy 80.