Gikan sa Among mga Magbabasa
Lisod Pitulon nga Kabataan Maoy uban sa kinasingkasing nga pasalamat nga akong nabasa ang Nobyembre 22, 1994, nga mga artikulong “Pagsabot sa Lisod Pitulon nga Kabataan.” Ang akong anak lalaki may ADHD (Attention Deficit Hyperactivity Disorder). Sulod sa katuigan akong gisukna ang akong kaugalingon kon unsay akong nahimong kasaypanan nga nakabaton ug lisod kaayong pitulong batang lalaki. Ako nagtuon sa Bibliya uban kaniya ug nag-atiman sa tanan niyang mga panginahanglan, apan matag adlaw mahadlok akong pukawon siya sa buntag ug kuhaon siya sa ulahi gikan sa tunghaan. Hinaot unta nga ang impormasyon makatabang niadtong tanan nga may kontak sa kabataan nga adunay ADHD.
E. W., Tinipong Bansa
Aduna akoy lisod kaayong pitulon nga diyes-anyos nga anak lalaki. Usahay mobati akong walay-mahimo, magul-anon, nag-inusara, ug wala masabti. Daghan kaayong salamat sa paghatag kanako ug paglaom—ug daghang praktikal nga mga sugyot.
H. S., Habagatang Aprika
Mihilak ako pag-ayo samtang nagbasa sa mga artikulo. Ang akong anak lalaki adunay ADD (Attention Deficit Disorder). Lisod kaayo ang kinabuhi alang niining mga bataa. Bisan pa niana, sila takos ug angayan sa dignidad ug, labaw sa tanan, gugma.
B. W., Tinipong Bansa
Unom ka bulan kanhi among nadiskobrehan nga ang among anak lalaki nag-antos sa ADHD. Sa edad nga duha ka tuig, siya lihok kaayo ug may pagkamadaoton, dili makapuyo sa Kristohanong mga tigom, manukmod sa uban, magdagandagan, ug kanunay masamdan ang iyang kaugalingon. Ang uban nagpalayo kanamo, ug bisan ang suod nga mga higala dili makapugong usahay nga makakomento ug sakit. Salamat sa pagbatbat sa mga suliran diha sa masinabutong paagi.
R. F., Alemanya
Ako nag-edad ug 15 anyos ug adunay ADHD. Makapahupay kaayo ang pagkasayod nga si Jehova nakasabot kanamo ug makatabang kanamo. Regular akong nagainom ug tambal, ug nakatabang kaayo kini. Mas makatunong na ako sa akong pagtagad sa akong buluhaton sa tunghaan, buluhaton sa balay, ug sa pagtuon sa Bibliya. Akong gipabilhan pag-ayo ang mga artikulo tungod kay gipakita ninyo sa uban nga kining sulirana mahitabo gayod ug dili lang usa ka urog.
S. K., Tinipong Bansa
Kining mga artikuloha nakatabang kanamong duha sa pagwagtang sa among mga pagbati nga nakulangan ingong mga ginikanan. Ang maayog-tuyo nga mga higala misugyot nga ang akong anak lalaki, nga nag-antos sa ADHD, pinatuyangan lamang o “kinahanglan lang nga bunalan.” Ang mga artikulo mahimong makatabang nianang mga tawhana sa pagsabot sa suliran sa daghang ginikanan.
T. G., Tinipong Bansa
Pagmugnag mga Trabaho Salamat sa artikulong “Pagmugnag mga Trabaho Diha sa Nagakaugmad nga Kanasoran.” (Oktubre 22, 1994) Sa pagkakaron ako nagatungha ug nagplanong magpayunir (bug-os-panahong magwawali) iniggraduwar nako. Ang kinadak-ang suliran mao ang pagpangitag trabaho. Hangtod karon buot nako ug trabaho nga kanunay lang maglingkod diin dili kaayo ako mahago sa pisikal, apan ako mibatig kaulaw sa akong kaugalingon sa dihang akong nasayran kon sa unsang paagi ang akong Kristohanong mga igsoong lalaki sa nagakaugmad nga mga nasod nagabuhat sa bisan unsang trabaho nga ilang mahimo. Karon ako motrabaho sa bisan unsang trabaho nga motugot kanako sa pagpayunir.
Y. T., Hapon
1914 Bag-o pa nakong nabasa ang inyong mga artikulong “1914—Mga Buto sa Pusil nga Nakapagubot Gihapon sa Atong Kalibotan.” (Nobyembre 8, 1994) Buot kong moingon nga wala pa gayod ako makabasa ug impormasyon nga labihan ka tin-aw ug ka yano bahin sa maong kontrobersiyal nga ulohan. Ang mga eskuylahan sa akong nasod dili kaayo mohisgot bahin sa kasaysayan sa mga gubat sa kalibotan, apan ang pagbaton ug pagsabot niining ulohana dakog ikatabang sa pagsabot sa mga hitabo sa kalibotan.
W. S., Venezuela
Crossword Puzzles Buot kong isulti nga nalingaw ako pag-ayo sa inyong mga crossword puzzle, ilabina kadtong sa Disyembre 8, 1994, nga isyu. Gidasig ako niini sa pagtuki pa ug dugang sa Bibliya. Ang mga timailhan gisulat sa paagi nga motukmod kanako sa pagtan-aw sa gihisgotan nga kasulatan—bisan tuod nahibaloan na tingali nako ang tubag. Salamat nianang maayo ug makalingawng mga puzzle!
D. S., Tinipong Bansa