Gikan sa Among mga Magbabasa
Kolokabildo Salamat sa artikulong “Ang Kolokabildo Maoy Usa ka Arte.” (Abril 8, 1995) Nakigbisog ako sa pagkamaulawon sulod sa dugayng panahon. Apan karon ako nakaamgo nga dili lang kay ako ra ang tawo nga aduna niining sulirana. Akong ipadapat ang inyong mga sugyot.
A. L., Tinipong Bansa
Ang inyong sugyot nga basahon ang mga artikulo sa Ang Bantayanang Torre ug Pagmata! misaler gayod. Matingala ka kon unsa ka daghan ang ikaestorya kon buhaton mo kana!
V. M. J., Tinipong Bansa
Kampo Konsentrasyon Usa ka kaila nako ang mibasa sa artikulong “Ang Akong Pagdumot Nailisan ug Gugma.” (Enero 8, 1995) Siya miangkon nga kasukwahi sa giingon sa artikulo, walay karatula nga “Arbeit Macht Frei” (Ang Trabaho Magahatag ug Kagawasan) sa kampo sa Buchenwald.
H. J. Z., Alemanya
Palihog pasayloa ang kasaypanan. Ang karatula sa entrada sa Buchenwald makita didto hangtod karong adlawa, ug aktuwal kining mabasa nga “Jedem das Seine” (Ang Matag Usa Sumala sa Iyang mga Katakos). Ang mga kampo sa Auschwitz ug Sachsenhausen may karatulang “Arbeit Macht Frei.”—ED.
Autismo Daghang salamat sa artikulong “Autismo—Pagsagubang sa mga Hagit sa Usa ka Makalilibog nga Sakit.” (Pebrero 8, 1995) Sa kataposan, masabtan nako ang sakit nga nag-apektar sa akong anak nga babaye ug nahibalo nga dili kadto resulta sa akong gibuhat sa pagmatuto kaniya. Ang akong pag-alagad kang Jehova naghatag kanako ug kusog sa pagdumala sa iyang kahimtang.
M. H., Switzerland
Daghang patuotuo ang gikaingon nga maoy hinungdan sa autismo, sama sa usa ka tunglo gikan sa mga katigulangan o pagbayad sa kanhing mga binuhatan. Ang inyong gisulat makatabang sa pagpatungha ug mas maayong pagsabot niining sakita. Salamat sa maong edukasyonal nga mga artikulo.
M. A., Nigeria
Mga Orkid Gusto ako ug orkid! Sa pagkamatuod, ako adunay mga orkid sa akong tanaman ug koleksiyon sa mga hulagway niana. Salamat sa pagpatik sa artikulong “Pagpangitag mga Orkid sa Uropa.” (Enero 22, 1995) Hinaot nga dili kini maoy kataposang artikulo nga inyong ipatik bahin niining ulohana.
R. M., Pilipinas
Luwas nga Pagdrayb Ako nag-edad ug 45 anyos ug wala gayod tugti sa pagdrayb tungod sa patol. Tapos sa operasyon sa utok, ako gitugtan sa akong neyurologo sa pag-aplay ug lisensiya sa pagdrayb! Ang artikulong “Ikaw ba Usa ka Luwas nga Drayber?” (Pebrero 8, 1995) nakatabang kanako sa pag-apresyar sa bili sa pagbaton ug tukmang tinamdan samtang nagdrayb. Miabot kini human gayod sa pagkadawat nako ug lisensiya!
G. S., Tinipong Bansa
Sala nga Dili-Mapasaylo Salamat sa artikulong “Mga Batan-on Nangutana . . . Nakahimo ba Ako ug Sala nga Dili-Mapasaylo?” (Nobyembre 8, 1994) Nanglugmaw ang mga luha sa akong mga mata samtang nagbasa niana tungod kay ako usab nakigbisog niining mahugaw nga batasan sa masturbasyon. Gisunod nako ang mga panig-ingnan ni Marco ug Alberto, nga gihisgotan sa artikulo, diin ang matag usa kanila may kaisog nga nakigsulti sa usa ka ansiano. Nakatabang kinig dako kanako.
A. M. C., Brazil
Ang masturbasyon maoy usa sa kinalisdang pakigbugno nga mabatonan sa usa ka batan-ong Kristohanon. Makadaghan akong mibati nga miserable ug masulob-on. Ang artikulo nagdasig kanako sa pagpadayon sa pagpakigbisog aron madaog kining maong away.
F. G. M., Mexico
Nalangkit ako sa luag nga paggawi uban sa usa ka batan-ong lalaki nga ako untang minyoan; nagdaot kini sa among relasyon. Naguol ako pag-ayo ug naghilak sulod sa daghang adlaw ug mga gabii. Naghunahuna gayod ako nga dili na ako mapasaylo. Ang pagbasa niining mga artikuloha nagpasig-uli sa akong pagtuo kang Jehova ug sa iyang katakos sa pagpasaylo ug paghikalimot.
L. C., Australia