Pasko—Ang mga Sinugdanan Niini
SINULAT SA KORESPONSAL SA PAGMATA! SA ITALYA
TULO ka adlaw lamang una sa Pasko 1993, si Papa Juan Paulo II miila nga ang pagsaulog sa Pasko wala mapasikad sa Bibliya. Bahin sa petsang Disyembre 25, ang papa miangkon: “Nianang adlawa sa karaang pagano, ang adlawng natawhan sa ‘Dili-Mabuntog nga Adlaw’ gisaulog aron motukma sa solstice sa tingtugnaw.” Nan, sa unsang paagi nagsugod ang Pasko? Ang papa mipadayon: “Daw makataronganon ug kinaiyanhon sa mga Kristohanon nga ilisan ang maong piyesta sa pagsaulog sa bugtong ug matuod nga Adlaw, si Jesu-Kristo.”
“Sa laing pagkasulti,” misulat ang magsusulat nga si Nello Ajello sa La Repubblica, “may usa nga nagdeklarar nga si Jesus natawo sa usa ka hinanduraw, tinumotumo, bakak nga petsa.” Kanus-a nahitabo kining maong tumotumo? Usa ka balita nga gipagula gikan sa Batikano nag-ingon: “Ang piyesta sa Pasko mitungha sa unang higayon sa 354 [K.P.].”
Komosta ang Enero 6, Epiphany, nga naghandom sa pag-abot sa mga Mago aron sa pagduaw sa bag-ong natawong Jesus? “Daghang pamatuod motultol kanato sa pagtuo nga ang pagpili sa Enero 6, sama nianang sa Disyembre 25 alang sa Romanhong pangilin nga nagsaulog sa pagkatawo ni Jesus, naimpluwensiyahan usab sa usa ka paganong anibersaryo,” mipadayon ang balita. “Sa Alexandria, sa pagkatinuod, sa gabii tali sa Enero 5 ug 6, ang mga pagano nagsaulog sa adlaw sa diyos nga Aeon (diyos sa panahon ug pagkawalay kataposan). . . . Daw buot himoong Kristohanon sa Iglesya kining maong piyesta.”
Si Jesus wala gayod mag-awtorisar sa iyang mga sumusunod sa pagsagol sa matuod nga pagsimba sa paganong mga kustombre. Hinunoa, giingnan niya sila nga itudlo ang “tanang butang nga akong gisugo kaninyo.” (Mateo 28:19, 20) Dugang pa, sa dihang giatubang sa relihiyosong mga lider sa iyang adlaw, si Jesus nangutana kanila: “Ngano man nga kamo nagalapas sa sugo sa Diyos tungod sa inyong tradisyon?” (Mateo 15:3, New International Version) Ang samang pangutana mahimong ikapangutana sa mga Kristohanon kunohay kinsa nagpadayon sa paganong mga kustombre karong adlawa.