Gikan sa Among mga Magbabasa
Industriya sa Tabako Ang seryal nga “Nagapatayg Milyonmilyon Aron Mokitag Milyonmilyon” (Mayo 22, 1995) impormatibo ug intelihenteng pagkasulat. Ang dibuho sa hapin (“Kalabera nga May Sigarilyo”) ni Vincent van Gogh makahahadlok! Tingali kining hulagwaya lamang igo na sa pagpahunong sa pipila ka tawo sa pagtabako o labing menos sa pagsanta sa pipila sa pagsugod.
M. B., Tinipong Bansa
Sanglit ako nagtrabaho sa American Cancer Society, ako naghinamhinam gayod sa pagbasa niining mga artikuloha. Nagpadala akog usa ka kopya ngadto sa babaye nga maoy nangulo sa lokal nga kapunongan sa usa ka walay-tabako nga pundok. Siya nakadayeg sa kalidad sa pagkasulat ug panukiduki ug mihangyog 35 ka kopya alang sa iyang mga kauban.
J. O., Tinipong Bansa
Kami sa akong bana miundang na sa pagpanabako hapit tulo na ka bulan, apan hidlawon gihapon ako sa mga sigarilyo. Unya gibasa ko kining artikuloha, ug kini nagpaamgo kanako nga ang pipila ka sambog sa sigarilyo makahilo kaayo nga gidili ang paglabay niini diha sa labayanag basura! Kini nagpalig-on kanako sa pagdumot sa daotan.
L. T., Habagatang Aprika
Nag-antos sa Lupus Salamat kaayo sa impormasyon bahin sa lupus sa artikulong “Karon si Mia na Lamang ug si Jehova.” (Pebrero 22, 1995) Ako 18 anyos, ug nag-antos ako niining sakita sulod na sa mga duha ka tuig. Makapadasig nga masayod nga ang pag-antos ginasagubang sa ubang mga igsoong lalaki ug babaye sa nagkalainlaing bahin sa kalibotan ug sa pagkakita kon sa unsang paagi ang atong Maglalalang sa kanunay mahigugmaong nagpaluyo kanato.
J. A. Y., Italya
Problemang mga Ginikanan Nag-ampo ako ug usa ka artikulo sama sa “Mga Batan-on Nangutana . . . Komosta Kon Magkulang ang Akong mga Ginikanan?” (Mayo 22, 1995) Pagkadako sa akong kasubo ug kasakit sa dihang ang akong inahan gipalagpot sa Kristohanong kongregasyon! Hapit akong moundang sa pagpayunir, bug-os panahong pag-ebanghelyo. Ang artikulo nagpalig-on kanako nga ‘panlimbasogan ang akong kaugalingong kaluwasan uban ang kahadlok ug pagpangurog’ imbes nga mabalaka pag-ayo bahin sa relasyon ni Mama uban kang Jehova. (Filipos 2:12) Salamat kaayo kaninyo.
J. P., Pilipinas
Usa ako ka bawtismadong Kristohanon, apan nalisdan kaayo ako sa pagtahod sa akong amahan nga mopauli sa balay nga hubog kada adlaw. Samtang nagbasa niining artikuloha, wala ako makapugong sa paghilak. Karon nga nabasa na nako kini, mikunhod ug dako ang akong negatibong mga pagbati ug paghunahuna ngadto sa akong amahan, ug mas miarang-arang na ang akong gibati.
N. M., Hapon
Kristohanong Siyensiya Ang artikulong “Mga Seminar sa Pagpalambo sa mga Relasyon sa mga Doktor ug mga Saksi ni Jehova” (Marso 22, 1995) may komento bahin sa Kristohanong Siyensiya nga paagi sa pagtambal. Aron matukod ang pagsinabtanay taliwala sa atong mga pagtuo, buot nakong pasaligan ang inyong mga magbabasa nga sa pagsalig sa espirituwal nga pagpang-ayo, ginapabilhan ug ginaprotektahan sa Kristohanong mga Siyentipiko ang tawhanong kinabuhi samtang nagtuo kami sa gipakita ni Jesu-Kristo kanato nga maoy pagabuhaton. Ang rekord sa napamatud-ang mga pagpang-ayo nga gipatik sa among mga basahon kapin na sa usa ka siglo nagpakita nga ang pagsimba sa Diyos, dili ang pagkamartir, maoy among motibo. Ang espirituwal, moral, ug pisikal nga kaayohan mao gayod ang mosangpot.
M. V. W., Manedyer, Committees on Publication, The First Church of Christ, Siyentipiko, Tinipong Bansa
Salamat alang niini nga mga komento. Ang tuyo namo sa pagkutlo sa mga pulong sa usa ka medikal nga doktor mao ang pagpasiugda sa kamatuoran nga ang mga Saksi ni Jehova modawat ug medikal nga pagtambal. Samtang gitahod namo ang mga katungod sa uban sa pagtuo sa buot nila, si Jesu-Kristo aktuwal nga miingon nga “ang mga tawong anaa sa kahimsog wala manginahanglan ug mananambal, kundili ang mga nagmasakiton.” (Mateo 9:12) Ug sa dihang gihisgotan ni Pablo ang ‘subsob nga pagkasakit’ ni Timoteo, wala niya irekomendar ang espirituwal nga pagpang-ayo kondili nagtanyag ug kasagarang medikal nga pagtambal. (1 Timoteo 5:23) Ang hunahuna sa Bibliya sa medikal nga pagtambal sa ingon nagkasumpaki sa mga pagtulon-an sa Kristohanong Siyensiya.—ED.