Gikan sa Among mga Magbabasa
Pagpaniid sa Kalibotan Ang inyong mga magasin nahimong labi pang makaiikag. Gihisgotan niini ang tanang matang sa mga ulohan—bag-ong mga hitabo, mga esport, siyensiya, ug uban pa. Ang “Pagpaniid sa Kalibotan” makaiikag gayod kaayo. Nagtuo ako nga kon ang balita sa TV gipasukad pa niining bahina, mas makaiikag pa gayod kini.
R. S., Italya
Giapresyar ko gayod ang mga ulohan nga ginahisgotan sa “Pagpaniid sa Kalibotan.” Ang usa nga dako gayod ug kahulogan alang nako mao ang Abril 22, 1995, nga isyu. Ang ulohan maoy “Unsay Nagpahimo sa mga Magtutudlo nga Popular?” Ang artikulo nag-ingon nga dili kaayo gusto sa mga estudyante ang mga magtutudlo nga dili kaayo tighatag ug homwork, apan gusto nila ang mga magtutudlo nga buotan, matinagdanon, ug makataronganon. Tinuod kana! Daghan kaayo akog mga kasinatian uban sa mga magtutudlo nga paboran ang mga estudyante nga popular sa pagpaningkamot nga mapopular. Apan sa ulahi, ang ingon niini nga mga magtutudlo dili magpabiling popular. Salamat pag-usab niining bililhong impormasyon.
L. K., Tinipong Bansa
Bakak nga mga Panagna Salamat sa seryal nga “Bakak nga mga Panagna o Tinuod nga Tagna—Unsaon Nimo Pag-ila sa Kalainan?” (Hunyo 22, 1995) Bisan tuod adlaw-adlaw akong nagtuon sa Bibliya sulod sa 42 ka tuig ug naningkamot sa pagsabot sa impormasyon bahin sa ilhanan sa kataposang mga adlaw, akong ikaingon nga ang matin-aw nga sumaryo nga inyong gihatag sa tanang teksto niining ulohana nakatabang gayod kanako. Gihimo ninyo kining ulohana nga mas sayon nga hinumdoman. Maayo kaayo kadto nga espirituwal nga pagkaon!
M. B., Tinipong Bansa
Pagpangawat Ako 13 anyos, ug ang akong problema mao ang pagpangawat. Mangawat akog kuwarta, o moadto ako sa tindahan ug mangawat ug bubble gum. Buot kong mohunong, apan walay nakatabang hangtod nga nadawat nako ang Hunyo 22, 1995, nga Pagmata! ug mipakli sa artikulong “Mga Batan-on Nangutana . . . Pagpangawat—Nganong Dili?” Natandog gayod ako niini. Kini nagtabang kanako sa pag-ampo kang Jehova ug nahibalo nga siya mopasaylo kanako sa madagayaon gayod. Buot ko nga makadangat sa Gingharian sa Diyos, ug ako nasayod nga ang mga tawong mangawat dili makadangat didto. Salamat sa pagpatik niining artikuloha.
J. A., Canada
Ako 23 anyos ug ako napriso sa pagpangawat. Nagsugod kining tanan tungod sa pagpamugos sa isigkaingon. Gusto nila nga binuangan ko ang usa ka tawo, ug sukad niadto misamot ang kahimtang. Tinuod kaayo ang artikulo. Nanghinaot lang ako nga mamati ang mga batan-on sa tambag sa dili pa ulahi kaayo. Nianang paagiha, malikayan nila ang lugar nga akong gidangatan—sa prisohan.
M. S., Tinipong Bansa
Kasaysayan sa Kinabuhi Mao pay pagkatapos nako pagbasa sa artikulong “Kon sa Unsang Paagi Ako Nakabenepisyo sa Pag-atiman sa Diyos.” (Hunyo 22, 1995) Nagbasa kon giunsa pagmaltrato sa mga membro sa pamilya si Celeste Jones—ug nagpabilin gihapon sa iyang pagtuo ug milahutay—gisaaran nako ang akong kaugalingon nga maningkamot gayod ako nga dili na gayod moreklamo bahin sa akong mga suliran sa panglawas.
J. P., Tinipong Bansa
Ingong usa ka tawo nga di-kaayo baldado sama kang Celeste Jones, aduna akoy diyutayng kahibalo bahin sa kaisog nga gikinahanglan aron siya makapabiling malig-on. Linain nga pasalamat sa tanan nga mitabang kang Celeste ug naghatag kaniya sa gikinahanglang pag-atiman sa iyang ministeryo.
W. R., Canada
Ako natandog sa artikulo. Kini nagpalig-on sa akong pagtuo ug nagtabang kanako sa pagkaamgo nga ang labing epektibong paagi sa pagtabang sa atong mga silingan mao ang paggamit sa tanang posibleng mga paagi sa pagsangyaw kanila.
P. H. P., Nigeria
Ako natandog kaayo ug nadasig sa kasinatian ni Celeste. Ako nagkatigulang na ug nakasinati sa tanang mga kaul-ol ug mga kasakit nga dala sa pagkatigulang, apan ang iyang kasinatian naghatag kanako ug dugang kalig-on sa pagsagubang.
M. R., Jamaica