Gikan sa Among mga Magbabasa
PMS Kinahanglan kong ipahayag ang akong sinserong pasalamat kaninyo tungod sa pagpatik sa artikulong “‘Premenstrual Syndrome’—Tumotumo o Tinuod?” (Agosto 8, 1995) Akong giampo ang ingong artikulo, sanglit wala nako masabti kon nganong nabatonan nako ang maong makapaguol nga mga pagbati matag bulan. Sa pagbasa sa artikulo, nahupayan ako pag-ayo; karon akong naamgohan nga ang akong suliran dili diay gumikan sa espirituwal nga kaluya.
Y. E., Jamaica
Nag-antos ako sa PMS sukad pa sa akong mahinumdoman, apan kanunay nako kining isipon nga usa lamang ka butang nga kinahanglang sagubangon nako. Kining artikuloha nakatabang kanako sa pagkaamgo nga ang PMS maoy usa ka tinuod nga suliran, usa nga takos hisgotan.
Y. M., Inglaterra
Sulod sa mga 12 ka tuig, ang akong PMS nagpahinabo ug tinuod nga kagul-anan sa akong anak ug akong bana. Kining artikuloha nagsaysay gayod sa hingpit sa akong mga simtomas! Ang ilabinang nakapalipay kanako mao ang reaksiyon sa akong dili-Saksing bana, kinsa kasagarang hinawayon kaayo sa Pagmata! Nagpakita siya ug dakong interes sa artikulo ug miingon, ‘Nalipay ako nga atong nabatonan kining artikuloha.’
K. O., Hapon
Panapaw Daghang salamat sa artikulong “Ang Hunahuna sa Bibliya: Panapaw—Magpasaylo o Dili Magpasaylo?” (Agosto 8, 1995) Human sa katuigan sa pagdagmal, ako nakigdiborsiyo nga binase sa Kasulatan sa akong bana. Bisan pa niana, ang pipila ka tawo nagpabati kanakong sad-an sa paghimo niana, ug kinahanglang pakigbisogan ko kining maong pagbati sulod sa daghang katuigan. Naghunahuna gani ako nga si Jehova nagsalikway kanako. Apan, kining artikuloha nagpahayag ug daghan sa akong mga pagbati, ug nakapadasig kini kanako pag-ayo.
A. K., Republika sa Czech
Aprikanhong mga Maskara Ang inyong artikulong “Ang Kahulogan Luyo sa Maskara” (Agosto 8, 1995) maoy labing malamdagon. Inyong gipahayag sa unod niana nga ang matuod nga mga Kristohanon dili magtipig sa maong mga maskara. Apan komosta na man ang mga maskara nga gigama ingong mga sobenir lamang o wala gayod gamita alang sa relihiyosong mga katuyoan?
J. A., Tinipong Bansa
Ang among artikulo naghisgot sa tino sa mga maskara nga gihimo alang sa bakak nga relihiyosong mga katuyoan. Among giila nga “adunay dakong kalainan tali sa mga maskara nga gigamit sa pagsimba ug sa mga sinundog nga gikulit alang sa mga turista.” Sa kanasoran sa Kasadpan, ang maong komersiyal nga pagkahimong mga maskara lagmit wala gayoy relihiyosong kahulogan apan lagmit isipon sa kadaghanan ingong adorno. Ang matag Kristohanon sa ingon kinahanglang mohimog personal nga desisyon kon ipasundayag ba ang maong mga maskara, nga maghunahuna sa epekto sa paghimo niana diha sa mga konsensiya sa uban. (1 Corinto 10:29)—ED.
Rhinoceros Buot kong ipahayag ang akong apresasyon ug pagdayeg sa inyong katakos sa paghimo sa dili-hinungdanong impormasyon nga makalingaw—bisan alang sa usa nga sama kanako nga wala gayod magbasa sukad alang sa kalingawan. Bag-o pa nakong nabasa “Ang Hayop Luyo Nianang Bililhong mga Sungay.” (Agosto 8, 1995) Sagad magsugod ako pagbasa ug mga artikulong sama niini tungod kay naobligar lamang. Hinunoa, sa kataposan ako kanunayng natingala nga makalingaw kaayo kining basahon!
J. M., Tinipong Bansa
Sugilanon ni Celeste Jones Nagabasa ako sa inyong mga magasin sulod sa 17 ka tuig. Human mabasa ang kasinatian ni Celeste Jones diha sa artikulong “Kon sa Unsang Paagi Ako Nakabenepisyo sa Pag-atiman sa Diyos” (Hunyo 22, 1995), kinahanglang magsulat ako ug ipahayag ang akong apresasyon.
M. M., Colombia
Si Celeste Jones namatay niadtong Oktubre 27, 1995. Una siya mamatay nakadawat siya ug daghang sulat gikan sa mga magbabasa sa tibuok kalibotan nga nagpasalamat kaniya sa pagpakig-ambit sa iyang kasinatian.—ED.