Tesis Mihampak Pag-usab!

SUKAD sa katuigang 1950, ang gidaghanon sa mga sakit nga tesis (TB) mius-os sa Tinipong Bansa sa gikusgong 5 porsiyento sa usa ka tuig. Apan, sukad sa 1985 dihay 18-porsiyentong pag-uswag sa gikatahong mga sakit sa TB. Ang labaw nga makapatugaw mao ang pagtungha sa bag-ong matang sa sakit nga mosukol ug tambal. Ang TB karon nagapatay sa gibanabanang tulo ka milyong tawo kada tuig. Nganong daw nagakapildi na ang pagpakigbugno sa TB?

Usa ka katarongan mao nga dili ipadayon sa daghang pasyente ang ilang tambal sa gikinahanglang gidugayon sa panahon​—sagad unom ngadto sa siyam ka bulan. Sa New York City, pananglitan, usa ka pagtuon nagbutyag nga 89 porsiyento sa usa ka grupo sa mga 200 ka pasyente nga grabe na ang TB wala makakompleto sa ilang tambal. “Kana makahahadlok,” nag-ingon si Dr. Lee Reichman, presidente sa American Lung Association, “tungod kay kadtong mga tawhana (a) dili maayo, ug (b) sila lagmit matugkan ug TB nga mosukol na sa kasagarang gigamit nga mga tambal.” Apan kining mga tawhana makaapektar dili lamang sa ilang kaugalingong panglawas. “Sa dili pag-inom sa ilang tambal,” si Dr. Reichman midugang, “sila makatakod sa laing tawo.” Walay duhaduha kini ang nakaingon sa gibanabanang otso milyones nga bag-ong mga kaso nga nahiling sa tibuok kalibotan matag tuig.

Nahibalo ang mga estudyante sa Bibliya nga ang ‘mga kamatay sa nagkalainlaing mga dapit’ maoy bahin sa ilhanan nga kita nagkinabuhi na “sa kataposang mga adlaw” niining sistema sa mga butang. (Lucas 21:11; 2 Timoteo 3:1) Unsay mosunod? Usa ka bag-ong yuta, nga niana “walay molupyo ang magaingon: ‘Ako may sakit.’” (Isaias 33:24) Oo, si Jehova nga Diyos nagasaad, dili temporaryong kahupayan, kondili permanenteng kagawasan gikan sa sakit ug kamatayon.​—Pinadayag 21:1-4.