Ang Pagbati sa Inahan Uban sa Iyang mga Anak

USA lamang siya ka laag, mubog-buhok, walay-ngalang iring nga may lima ka buok miming, nga naningkamot sa pagbuhi kanila sa kabos nga kadalanan sa East New York. Nagpahiluna siya sa iyang pinuy-anan diha sa gubaon wala-na-gamitang garahe nga malagmit mahimong sinugdan sa daghang kadudahang sunog. Nangukay siya ug mga pagkaon sa basurahan sa kasilinganan aron siya makapasuso sa nagtubo niyang mga anak.

Kining tanan mausabay sa alas 6:06 sa buntag sa Marso 29, 1996. Ang kadudahang sunog kalit nga milamoy sa garahe. Ang puy-anan sa pamilya sa iring nagdilaab. Ang Ladder Company 175 misanong dayon ug sa wala madugay ang kalayo napalong. Si David Giannelli, usa sa mga bombero, nakadungog sa ngiyaw sa mga miming. Iyang nakaplagan ang tulo kanila sa gawas lamang sa tinukod, lain pang usa hapit nang makaabot sa tabok sa dalan, ug ang ikalima anaa sa aseras. Ang mga miming gagmay pa kaayo aron makaikyas sa ilang kaugalingon. Nakamatikod si Giannelli nga ang paso sa matag usa ka miming nagkagrabe, ang uban naghulat nga dugaydugay aron maluwas samtang gitagsatagsa sila ug dala sa inahang iring.

Ang asoy diha sa Daily News sa New York sa Abril 7, 1996, mihatag niining tahoa sa kahimtang ug pag-amoma sa inahan: “Nakaplagan ni Giannelli ang inahan nga nagluko sa kasakit diha sa usa ka bakanteng luna, ug ang talan-awon nakapatandog sa iyang kasingkasing. Ang tabontabon sa iyang mata nanghubag gumikan sa aso. Ang iyang lapalapa grabeng nasunog. Dihay ngilngig nga mga marka sa pagkapaso sa iyang nawong, mga dalunggan, ug mga bitiis. Si Giannelli nakakita ug karton. Malulot niyang gibutang ang inahang iring ug mga miming sa sulod. ‘Dili gani niya mabuka ang iyang mga mata,’ matod pa ni Giannelli. ‘Apan iyang gihikap silang tinagsatagsa sa iyang mga kuyamoy, nga nag-ihap kanila.’”

Sa miabot sila sa North Shore Animal League, nameligro na ang ilang kinabuhi. Ang taho nagpadayon: “Ang mga tambal nga pangontra sa kalisang gidapat. Gitaod ang tubong intravenous nga puno sa antibiotiko diha sa maisog nga iring. Ang krema nga antibiotiko mahinayng gihaplas sa iyang mga paso. Dayon gipahiluna siya sa usa ka hawla sa oksiheno aron matabangan siya sa pagginhawa samtang ang tanang kawani sa liga sa hayop mahinamong nagpaabot . . . Sulod sa 48 oras, ang bayani naulian. Nabuka ang nanghubag niyang mata ug walay nakitang kadaot ang mga doktor.”

Hunong ug pamalandong. Handurawa makadiyot kining maisog nga inahan, nga may kinaiyanhong kahadlok sa kalayo, nga misuot sa napuno-sa-aso, nasunog nga tinukod aron luwason ang iyang nanggingiyaw nga mga anak. Ang pagsulod makausa aron ipagawas ang iyang walay-mahimo gagmayng mga miming maoy di-katuohan; ang pagbuhat niana sa lima ka higayon, nga sa matag higayon nagdugang sa kasakit sa mga paso sa iyang mga tiil ug nawong, maoy di-mahanduraw! Ang isog nga hayop ginganlag Scarlett tungod kay nakita sa pagkapaso ang panit sa ilalom nga kolor eskarlata, o pula.

Sa dihang kining makapatandog nga pagbati sa inahan sa iyang mga anak gibalita sa tibuok kalibotan gikan sa North Shore Animal League, ang mga telepono nagsugod sa pagkiring. Kapin sa 6,000 ka tawo gikan sa mga halayong dapit sama sa Hapon, Netherlands, ug Habagatang Aprika nanawag nga nagpakisusi sa kahimtang ni Scarlett. Mga 1,500 mitanyag sa pagsagop kang Scarlett ug sa iyang mga anak. Usa ka miming sa ulahi namatay.

Gitandog ni Scarlett ang kasingkasing sa mga tawo sa tibuok kalibotan. Makapahinuklog kini kanimo kon ang kasingkasing sa mga minilyong inahan karong adlawa kinsa nagapatay sa ilang mga anak bisan anaa pa sa sabakan o sa pagkatawo pa lamang, pinaagi sa pag-abuso, dili ba kaha matandog sa panig-ingnan ni Scarlett sa pagbati tali sa usa ka inahan ug sa iyang mga anak.

[Picture Credit Line sa panid 24]

North Shore Animal League