Gikan sa Among mga Magbabasa

Mga Paglingawlingaw Uyon ako nga adunay daghang luwas nga mga paagi nga maglingawlingaw ang mga batan-on, sumala sa gihisgotan sa artikulong “Mga Batan-on Nangutana . . . Sa Unsang Paagi Makalipaylipay Ako?” (Septiyembre 22, 1996) Kami makaadto sa usa ka museyo o zoo o magpiknik o magsalosalo pa. Bisan pa kadtong mga kabos kanamo makalipaylipay pinaagi sa pagdapit sa ubang mga batan-on sa among mga balay aron magdula o alang sa usa ka pagkaon.

V. A., Brazil

Bayanihong Iring Kinahanglang ipahibalo ko kaninyo kon unsa ka dako ang akong pag-apresyar sa artikulong “Ang Pagbati sa Inahan Alang sa Iyang mga Anak,” nga napatik sa Septiyembre 22, 1996, nga isyu. Ako nagpuyo sa usa ka nasod diin ang seksuwal nga mga buhat dili kontrolado ug diin ang daghang batan-ong babaye dili magpanuko nga magpatagak sa gisabak. Nagtuo ako nga ang inahang iring nga ginganlag Scarlett maoy usa ka maayong sulondan sa usa ka mahunahunaong inahan.

E. B., Mali

Ako nahinam sa pagbasa sa estorya ni Scarlett, kinsa nagpakitag bug-os nga kaway-kahadlok sa pagluwas sa iyang mga anak gikan sa nasunog nga garahe. Siya nakapahingangha kanako ingong usa ka iring nga gikan niana daghag hikat-onan ang daghang tawo. Sa akong hunahuna maoy talagsaon nga kamo nagapatik sa ingong mga artikulo.

D. W., Alemanya

Ang inyong makapalipay nga estorya bahin ni Scarlett ug sa iyang mga anak mao ang labing epektibong artikulo bahin sa aborsiyon nga sukad akong nabasa.

J. G., Tinipong Bansa

Wala ako makapugong sa paghilak sa dihang nabasa nako ang artikulo. Gusto ko kanunay ang mga hayop sa tanang matang ug mapasalamaton sa mga leksiyon nga ginatudlo ni Jehova pinaagi kanila. Ako sa akong kasingkasing maguol nga mahibalong ang “intelihenteng” mga tawo dili magpakitag samang pagmahal ug pagtagad sa ilang mga anak.

C. C., Tinipong Bansa

Tinnitus Salamat kaayo tungod sa artikulong “Tinnitus​—Kabanha nga Antoson sa Kinabuhi?” (Septiyembre 22, 1996) Ako nag-antos niini sulod na sa unom ka tuig. Ako nahadlok nga ako may sakit nga dili na mamaayo tungod kay walay doktor ang nakasulti kanako sa tukma kon unsay tawag sa akong sakit. Ang pagbasa sa inyong artikulo nakapakalma kanako. Karon ako nagapanlimbasog sa pag-antos niini samtang ako nagpaabot sa bag-ong kalibotan sa Diyos, diin wala nay magmasakiton.​—Isaias 33:24.

C. F., Italya

Nagsugod ako sa pagkaagom niining sulirana halos napulo na ka tuig kanhi. Makalilisang ang paghanduraw nga ako kanunayng makabati sa maong kabanha! Apan karong adlawa, ako nakakat-on sa pag-antos sa akong banha nga dalunggan. Ako nagatan-aw sa unahan sa panahon sa dihang, salamat kang Jehova, ako makabati na usab ug KAHILOM!

J. S., Czech Republic

Ako nag-antos sa tinnitus sulod sa miaging duha ug tunga ka tuig ug nakaagi sa tanang matang sa medikal nga mga pagsusi, lakip ang CT scan sa utok. Ang kabalaka ug tensiyon maoy mga sulirang makapaluya sa akong kinabuhi. Tungod kay nakabasa sa inyong artikulo, ako nakakat-on sa pag-antos sa sakit.

M. G. T. F., Sri Lanka

Ang akong bana may sakit nga tinnitus. Siya nag-antos usab sa major depression. Kining impormasyona nakatabang kanako nga magbaton ug dugang empatiya kaniya. Usahay, ang kabanha makapapikal kaayo kaniya, ug pagaadmitihon ko nga ako dili sama ka mabination sa angay unta kanako. Tim-os kong giapresyar ang makataronganong paagi sa pagkasulat niining artikuloha. Nakatino ako nga kini motabang sa daghang kapikas niadtong adunay tinnitus nga mas magmasinabtanon.

L. F., Tinipong Bansa