Ang Kalisdanan ni Maggy ug Akong Panalangin

Ang Martes, Mayo 2, 1995, mao ang adlaw nga natawo ang akong anak babaye ug ang akong asawa namatay. Ikasubo, si Maggy wala gayod makakita sa nawong sa iyang anak. Karon ang akong paglaom mao ang pagpailaila ni Tamara sa iyang inahan inigkabanhaw niya.

TAPOS nga kami nagminyo sulod sa 16 ka tuig, ang akong asawa, si Maggy, giingnan sa iyang doktor nga siya may kanser sa suso ug mabuhi na lamang ug pipila ka bulan. Kana maoy lima ka tuig kanhi. Salamat na lang, si Maggy nakahimo sa pagkinabuhing normal sulod niadtong kataposang mga tuig sa iyang kinabuhi. Maoy sa hinapos lamang nga ang kasakit halos dili maagwanta.

Tungod sa pagkaylap sa iyang kanser, ang mga doktor nag-ingon nga diyutay ra ang purohan nga momabdos siya. Busa mahanduraw ninyo ang among kakurat sa dihang panahon sa usa ka rutinang pagsusi pinaagig ultrasound aron sa pagsusi sa pagkaylap sa kanseron nga mga tumor, nakita nila ang usa ka bata sa iyang tagoangkan! Kadto usa ka babaye. Upat ka bulan ug tunga ang tiyan ni Maggy. Natugob siya sa kalipay sa kalaoman nga mahimong inahan sulod sa unang higayon.

Gihimo ni Maggy ang tanan kutob sa iyang mahimo aron maseguro niya nga ang bata matawo nga himsog. Nag-amping siya sa iyang pagkaon, ug bisan sulod sa kataposang duha ka semana sa iyang kinabuhi, sa dihang hilabihan ang kasakit, moinom lamang siya ug mga painkiller kon dili na niya maagwanta ang kasakit.

Gipanalanginan ug Himsog nga Bata

Sa Sabado, Abril 29, gikulbaan si Maggy ug miingon: “Sa akong hunahuna mamatay na ako.” Nagpabilin ako uban kaniya sa tibuok hinapos-semana. Human tawga ang doktor sa Lunes, gidala dayon nako siya sa ospital sa Montreal, Canada, nga dili layo sa among balay sa St. Jérôme.

Sa mga 5:30 sa misunod nga buntag, usa ka nars ang miagi sa pultahan sa lawak ni Maggy ug nakamatikod nga naglisod siya. Dayag, siya giatake sa kasingkasing. Usa ka doktor ang gipatawag dayon gikan sa sikbit nga lawak. Bisan tuod namatay si Maggy, ang medikal nga tem nakahimo sa pagluwas sa among anak. Natawo si Tamara nga kulang ug duha ka bulan ug tunga ug mitimbang lamang ug 1.1 kilo.

Sanglit kubos ang ihap sa dugo ni Tamara, ang mga doktor buot nga moabono ug dugo. Apan, sila giawhag nga mogamit hinuon sa ginama nga hormone nga erythropoietin. Gigamit nila kadto, ug sa dihang ang paggamit sa maong produkto napamatud-ang malamposon sa pagpausbaw sa iyang ihap sa dugo, usa ka nars ang miingon: “Nganong dili nila gamiton kana sa tanang bata?”

Si Tamara may laing mga suliran nga nalangkit sa ahat nga pagkatawo, apan kining tanan nasulbad. Sa pagkatinuod, sa dihang si Dr. Watters, usa ka neurologo, nagsusi kaniya sa ulahi, iyang giingnan ang nars: “Sa akong hunahuna dili mao kining bataa ang imong ipasusi; normal kaayo siyang tan-awon.”

Pag-atubang sa Kamatayon ug Pagsagubang Pagkahuman Niana

Ang pagtan-aw kang Maggy nga mamatay malisod alang kanako. Mibati akong wala gayoy mahimo. Lisod kaayong maghisgot bahin sa kamatayon ni Maggy. Apan, gihimo nako kana sa dihang ang akong Kristohanong mga igsoong lalaki ug babaye miadto sa ospital. Ang kasakit hinayhinay nga nawala sa sige nako kanang hisgotan. Kon mabasahan nako ang usa ka artikulo sa Bantayanang Torre ug Pagmata! nga sa linain nag-apektar kanako, ako kanang ilain sa usa ka gamayng personal nga seksiyon sa akong librarya ug kuhaon kana ug basahon kana kon bation nako ang panginahanglan.

Ang laing hagit mao ang pagpauli sa balay nga walay tawo. Lisod kaayong sagubangon ang kamingaw. Kining pagbatia motumaw gihapon, bisan pag nakabenepisyo ako gikan sa makapalig-ong Kristohanong pag-ubanay. Si Maggy ug ako kanunayng magkauban sa pagbuhat sa tanang butang kaniadto, ug among gihisgotan ang suliran nga akong mabatonan sa pag-inusara. Buot niyang magminyo ako pag-usab. Apan, dili ingon niana ka yano ang mga butang.

Pagpaluyo Gikan sa mga Isigka-Kristohanon

Wala ko masayod kon unsay akong mahimo kon wala pa ang pagpaluyo sa Hospital Liaison Committee (HLC) sa mga Saksi ni Jehova. Sa buntag nga namatay si Maggy, usa ka eksperyensiyadong Saksi gikan sa HLC ang didto sa ospital ug nagtagana kanako sa tabang nga akong gikinahanglan.

Ang kawani sa ospital nakadayeg sa tabang nga akong nadawat gikan sa among Kristohanong kongregasyon sa St. Jérôme maingon man sa ubang mga kongregasyon sa maong dapit. Sa gabii nga gipahibalo ang kamatayon ni Maggy sa among Kristohanong tigom, kapin sa 20 ka minahal nga mga higala ang misanong pinaagi sa pagtanyag sa ilang tabang. Ang pagpaluyo makapatandog gayod.

Ang mga higala nagluto ug pagkaon alang kanako; ang freezer compartment sa akong repridyeretor maoy puno sulod sa pipila ka bulan. Ang akong pamilya ug Kristohanong mga igsoong lalaki ug babaye nag-atiman gani sa pagpamalit ug mga sinina alang sa akong anak babaye. Gidad-an nila ako ug daghan kaayong butang nga wala na akoy igong kasudlan nianang tanan.

Mga Kalipay Karon ug Palaaboton

Gitabangan ako ni Tamara nga dili maghunahuna pag-ayo sa kamatayon ni Maggy. Bug-os niyang naangkon ang akong pagmahal. Kada adlaw sa dihang ako siyang timbayahon ug masadyaong “maayong buntag,” mopahiyom siya pag-ayo, mosugod sa “pagsulti,” ug mowarawara sa iyang mga kamot ug motindaktindak sa mga tiil, nga nalipay kaayo.

Ingon nga usa ka apisyonado sa astronomiya, ako naglaom nga akong sabakon si Tamara ug pasud-ongon siya pinaagi sa akong teleskopyo sa langitnong mga kahibulongan sa atong Dakong Magbubuhat, si Jehova. Ang pagpalandong sa walay-kataposang kinabuhi sa Paraiso sa yuta maoy usa ka tinuod nga tuboran sa kahupayan. Ug ang pagkahibalo nga mao kini ang palaaboton ni Tamara naghatag kanako ug dugang kalipay.​—Salmo 37:9-11, 29.

Sa paghandom sa mga hitabo sa milabayng lima ka tuig, mahubit ko kinig maayo ingong makaguol ug malipayon. Daghan kog nakat-onan bahin sa akong kaugalingon ug bahin sa kinabuhi mismo. Ako dulot nga nagapaabot sa umalabot sa dihang, sumala sa pagbatbat sa Bibliya, “wala na unyay kamatayon, ni pagbangutan ni pagtiyabaw ni may kasakit pa.”​—Pinadayag 21:3, 4.

Unya, sa pagkabanhaw, si Maggy makaginhawa na ug lawom nga walay kasakit. Labaw sa tanan, ang akong hugot nga paglaom ug tinguha mao ang pagkaatua didto aron ipailaila si Tamara kang Maggy, aron iyang makita ang batang babaye nga kaniya daghan kaayo siyag nahimo.​—Sumala sa giasoy ni Lorne Wilkins.

[Hulagway sa panid 26]

Uban sa akong asawa

[Hulagway sa panid 26]

Among anak, si Tamara