Gikan sa Among mga Magbabasa
Pagdumala sa Panalapi Nagpasalamat ako pag-ayo sa seryeng “Unsaon Nimo Pagdumala ang Imong Panalapi?” (Disyembre 22, 1996) Gastador ako kaayo ug dunay gamayng pagpugong-sa-kaugalingon. Apan, human mabasa ang mga artikulo, akong gikontrolar ang akong mga paggasto. Karon kon ang akong mga mata motinguhag usa ka butang, akong pangutan-on ang akong kaugalingon kon gikinahanglan ko ba gayod ang akong nakita.
J. B., Brazil
Walay trabaho ang akong bana sulod na sa lima ka bulan, ug kami dunay tulo ka anak nga gibuhi. Busa akong gipadapat ang pipila ka sugyot nga gihisgotan sa mga artikulo. Nagbaton akog kuwaderno, nagbadlis niini, ug naghimog usa ka badyet. Niining paagiha napaigo namo ang among kuwarta sa miaging tulo ka bulan ug duna pay gamayng nabilin alang sa wala damhang mga okasyon. Epektibo gayod ang pagbadyet!
L. S., Republika sa Czech
Pag-atubang sa mga Pagsulay Natukmod ako sa pagkomento bahin sa artikulong “Gipalig-on sa Pag-atubang sa mga Pagsulay sa Unahan.” (Disyembre 22, 1996) Natandog ako sa paagi nga si Edward Michalec milahutay sa pipila sa kinalisdang mga kahimtang. Ang iyang gugma kang Jehova, sa iyang isigkatawo, ug sa kamatuoran tataw nga nagpadayag sa iyang matinumanong paggawi ug mapailobong paglahutay.
K. B., Tinipong Bansa
Ang Kalisdanan ni Maggy Salamat sa pagpatik sa artikulong “Ang Kalisdanan ni Maggy ug Akong Panalangin.” (Disyembre 22, 1996) Naglisod kog pugong sa akong paghilak samtang akong gibasa ang bahin sa sakripisyong gihimo niining inahana sulod sa kataposang mga adlaw sa iyang kinabuhi aron ang iyang anak babaye mahimugso nga himsog. Ako usab nga gipabilhan ang komento sa iyang bana nga ang iyang kasakit anam-anam nga nakuhaan sa dihang iyang hisgotan ang pagkawala sa iyang asawa—usa ka topiko nga lagmit atong likayan sa dihang makigsulti sa kaparyentehan sa namatay. Naglaom ko nga makaila si Maggy sa pagkabanhaw.
L. S. C., Espanya
Ang artikulo nagpasundayag kon sa unsang paagi kita sa kongregasyon makapakita sa tinuod nga pagtagad sa usag usa. Ang kaubang mga Kristohanon naghatag sa bana ni Maggy ug mga pagkaon sa daghang mga bulan ug mihatag usab kaniyag mga sapot alang sa iyang anak. Usa gayod ka leksiyon alang kanato nga mohimog labaw pa kay sa mopadala lamang ug kard o motawag sa telepono!
P. L., Tinipong Bansa
Buot ko kamong pasalamatan sa tibuok kong kasingkasing tungod niini nga artikulo. Ang akong asawa namatay sa aksidente sa trapiko tulo ka semana human sa pagkamatay ni Maggy, nga nagbilin kanako ug walo ka anak. Akong nasabtan ang kasakit nga nabati ug padayon pang gibati ni Lorne Wilkins. Salamat sa pagpatik sa ingon nianang mga kasinatian alang kanamo. Sa pagkamatuod pagpaluyo ug pagpadasig kini alang sa tanan nga makaagi sa maong mga kalisdanan.
B. B., Pransiya
Pagbalhin sa Labing Suod nga Higala Buot kong ipahayag ang akong dulot nga pagpabili sa artikulong “Mga Batan-on Nangutana . . . Nganong Mibalhin ang Akong Labing Suod nga Higala?” (Disyembre 22, 1996) Miabot kini sa hustong panahon. Sa dili madugay, usa sa akong mga higala ang mobalhin; siya ug ang iyang bana moalagad sa kongregasyon diin dunay panginahanglan sa dugang pang magwawali. Bisan pag nalipay ko para niya, nasayod ko nga mingawon gayod ko pag-ayo niya. Salamat sa inyong maayo kaayong tambag.
R. A., Italya
Dili ninyo mahanduraw kon sa unsang paagi ang artikulo nakatandog kanako sa dihang ang among magtatan-aw sa sirkito, nga nagapanawng ministro, mibiya kanamo sa pag-alagad sa usa ka bag-ong dapit. Nahingawa siya pag-ayo sa akong espirituwal ug emosyonal nga mga panginahanglan. Sama sa giilustrar sa hulagway sa artikulo, ang pagpanamilit maoy usa ka sakit nga kasinatian. Pagkatukma sa panahon sa inyong mga sugyot sa pagtabang kanako nga masagubang ang kamingaw.
J. D., Nigeria