Mga Kombensiyon sa Romania Gihimo Bisan pa sa Pagsupak
ANG “Mga Mensahero sa Diyosnong Pakigdait” Internasyonal nga Kombensiyon sa mga Saksi ni Jehova naeskedyul nga pagahimoon sa Bucharest, Romania, gikan sa Hulyo 19 hangtod sa 21, 1996. Mga 40,000 ka delegado, lakip ang libolibo gikan sa langyawng mga nasod, nagplano sa pagduaw niining maanindot nga kaulohan sa Uropa nga may duha ka milyong tawo. Ang Nasodnong Estadyum, nga may kalingkorang kapasidad nga 60,000, gireserba alang sa okasyon. Apan unya, niadtong Hunyo 24, ang mga opisyal sa Romania nga nakadawat ug sayop nga impormasyon nagkanselar sa permiso sa paghimo ug kombensiyon.
Ang mga Saksi ni Jehova naningkamot ug maayo nga mabakwi ang mando sa pagkanselar sa ilang kombensiyon, apan walay nahimo. Busa, kinahanglang usbon ang mga kahikayan aron ang linibong langyawng mga delegado nga gidapit gikan sa daghang nasod sa Uropa, Amerika del Norte, ug sa Hapon makatambong sa usa ka kombensiyon sa Budapest, Hungaria, gikan sa Hulyo 12 hangtod 14. Ang kataposang-gutlo nga mga kausaban miresultag dakong gasto, kahasol, ug pagkawala sa kadasig sa daghan.
Apan unsay mahikay alang sa lokal nga mga delegado sa Romania? Ang mga opisyal sa mga siyudad sa Cluj-Napoca ug Brasov gikontak, ug sa ulahi posible nga maghimog mga kombensiyon didto, gikan sa Hulyo 19 hangtod 21. Ugaling, daghang taga-Romania ang wala makaadto sa Cluj-Napoca o sa Brasov. Busa, duha ka dugang kombensiyon ang gihimo sa Septiyembre 13 hangtod sa 15, usa sa Baia-Mare ug ang lain sa Bucharest.
Nganong gikanselar ang orihinal nga kombensiyon sa Bucharest? Ug unsay nagtukmod sa pipila ka opisyal sa ulahi sa pagbag-o sa ilang panglantaw, aron ang mga kombensiyon mahimo sa Romania, lakip na ang usa sa Bucharest?
Kinsay Diha sa Likod sa Pagsupak?
Sa panahon sa internasyonal nga kombensiyon sa Budapest, ang mantalaan sa Hungaria nga Színes Vasárnap miingon bahin sa mga Saksi ni Jehova: “Ang Bucharest mao ang dapit nga giplano nila sa sinugdan aron himoon ang ilang tinuig internasyonal nga panagkatigom, apan tungod sa pagsupak sa Ortodoksong mga Kristohanon, wala hatagig permiso sa mga opisyal sa Romania ang mga Saksi ni Jehova sa paghimo niana.” Nga ang simbahan maoy diha sa likod sa pagsupak nahimong kaylap nga nahibaloan. Pananglitan, ang Times Union, usa ka mantalaan sa Albany, New York, T.B.A., nagtaho: “Ang Ortodoksong Patriarka nga si Teoctist nagpasidaan sa Ortodoksong mga magtutuo nga magbantay batok sa gitawag niyang ‘erehes’ nga mga pagtulon-an sa mga Saksi ni Jehova.”
Tinuod ba ang mga taho bahin sa pagsupak sa klero sa kombensiyon? Aw, sa Hunyo, sa tibuok siyudad—diha sa mga propiedad sa simbahan, diha sa mga pader ug mga kilid sa mga tinukod, ug diha sa mga subwey—ang mga molupyo sa Bucharest nagsugod na sa pagkakitag mga poster nga nagpakaulaw sa mga Saksi ni Jehova. Ang usa nga nag-ulohang “ALANG SA TANANG MGA TAGA-ROMANIA!” nangutana: “Ang Romania ba karon nagkinahanglan ug internasyonal nga kombensiyon sa mga Jehovite . . . sa Hulyo 19-21? Mga Kristohanon—atong babagan kining satanasnong kombensiyon!”
Ang lain, nga may ulohang “Pamati sa KAPELIGROHAN SA JEHOVITE!” nag-ingon: “Ang mga Saksi ni Jehova nakig-away batok sa Kristiyanidad . . . Sila nagtinguha sa pagbahinbahin sa atong katawhan ug pagpahinabog panag-away sa relihiyon. . . . KAMONG TANANG TAGA-ROMANIA, makig-away batok niini nga kombensiyon!”
“HANGYO SA PAGLIHOK” mao ang ulohan sa lain pang poster. “Ang Orthodox Brotherhood sa Romania . . . naghangyo sa tanang Ortodoksong magtutuo sa usa ka miting sa pagprotesta, nga pagahimoon sa Dominggo, Hunyo 30.” Ang poster naghinapos: “Atong hangyoon ang mga awtoridad nga ikanselar kining kombensiyona. UMARI ARON ATONG KADEPENSAHAN ANG PAGTUO SA ATONG MGA KATIGULANGAN. Hinaot ang Diyos motabang kanato!”
Ang klero mipatik ug miapod-apod pa ganig usa ka tract nga nangangkon nga ang mga Saksi ni Jehova maoy “usa ka politikanhong organisasyon sa komunistang pundok.” Apan kini usa usab ka dakong sayop, ug tingali ang kadaghanang taga-Romania nahibalo gayod niini. Sila nahibalo nga ang mga Saksi ni Jehova gilutos ug sagad gibilanggo sa mga Komunista sa katuigang nanglabay.
Sa Unsang Paagi Naapektahan ang mga Tinamdan
Ang mga opinyon sa sulod ug gawas sa Romania kalit nga nanungha sa pagkontra sa dinasig-sa-simbahang mga pag-atake, ug ang mga opisyal sa kagamhanan nakasabot nga ang paghatag sa mga Saksi ni Jehova sa mga pribilehiyo nga gihatag sa uban maoy angayan lamang. Ang Flagrant, usa ka mantalaan sa Bucharest, nagtag-an: “Ang kiling sa pagsupak, pagkamabatokon, ug kayugot batok niining unang internasyonal nga kombensiyon adunay baliktad nga epekto. Imbes ayran sa mga tawo ang mga Saksi, ang aksiyon nagpukaw sa ilang interes, kamausisaon, pagkamatugoton, ug simpatiya.”
Pagkatinuod niining tag-ana! Daghang membro sa Ortodoksong Simbahan misulat o nanawag sa sangang buhatan sa mga Saksi ni Jehova sa Bucharest ug nagpahayag ug kapikal sa mga aksiyon sa ilang klero. Ang may-kasayorang mga tawo nahibalo nga ang mga Saksi ni Jehova dili gayod mao ang matang sa mga tawo nga gilarawan sa Ortodoksong Simbahan sa Romania.
Si Marius Milla, nga nagsulat diha sa mantalaan sa Romania nga Timishoara, sa Hulyo 6, 1996, miingon: “Ako kombinsido nga 99 porsiyento niadtong miakusar pag-ayo sa mga Jehovite wala gayoy igong kaikag sa pagpakigsulti kanila o sa pagtambong sa usa sa ilang mga tigom.” Siya midugang: “Labi pa untang makapadasig kon kita, ang Ortodoksong mga magtutuo, mas magmabalak-on sa troso diha sa atong kaugalingong mata ug itugyan ang puling diha sa mata sa atong silingan ngadto sa mas maayong paghukom sa Diyos.”—Mateo 7:3-5.
Unya si G. Milla mikutlo sa pakigpulong nga gihatag sa iladong unang-siglong magbabalaod nga si Gamaliel ngadto sa relihiyosong mga lider nga misupak sa mga sumusunod ni Jesus: “Ayaw panghilabot niining mga tawhana, hinuon pasagdi kini sila; (tungod kay, kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila;) kay kon dili, basin kamo hikaplagan sa tinuod nga mga mag-aaway batok sa Diyos.” (Buhat 5:38, 39) Sa pagtapos, si Milla misulat: “Ang atong tinamdan maoy batok sa demokrasya, dili kasulatanhon, ug batok sa katilingban.”
Wala magdugay, ang pagsaway sa pagkanselar sa kombensiyon misugod sa pagpangabot gikan sa ubang bahin sa Uropa ug gikan sa Tinipong Bansa. Ang Helsinki Committee sa Romania nagpatik ug balita nga nagsaway “sa publikong baroganan ni Patriarka Teoctist, ang hawas sa Ortodoksong Simbahan sa Romania, batok sa ‘mga Saksi ni Jehova.’”
Si Hillary Clinton, asawa sa presidente sa T.B., naatol nga miduaw sa Romania niadtong panahona. Ang embahador sa T.B. ngadto sa Romania, si Alfred Moses, nagpatin-aw kon nganong si Gng. Clinton wala mosulod sa ika-18ng siglong Kretzulescu nga Simbahan ingon sa iyang giplano: “Ang relihiyosong kagawasan maoy usa ka prinsipyo nga gibaod sa Konstitusyon sa Tinipong Bansa sa Amerika, ingon man sa Konstitusyon sa Romania. Ang makitang mga poster sa propiedad sa simbahan nga nagpakitag kakulang sa relihiyosong pagkamatugoton maoy sukwahi sa diwa sa demokratikanhong pluralismo ug sa mga katuyoan ni Gng. Clinton sa pagduaw sa Romania.”
Ebidensiya sa Pagpaluyo sa Diyos
Ang mga Saksi ni Jehova nakahimo na niadto ug mga kombensiyon sa siyudad sa Cluj-Napoca, ug ang mga opisyal didto sa makausa pa miabiabi kanila sa dihang sila gidid-an sa paggamit sa Nasodnong Estadyum sa Bucharest. Apan usa ka semana na lamang sa dili pa mosugod ang naeskedyul nga kombensiyon nga gipirmahan ang kontrata sa estadyum sa Cluj-Napoca. “Sa unsang paagi posibleng maorganisar ang ingon niana ka dakong kombensiyon sa mubo kaayong panahon?” usa ka reporter ang buot masayod.
“Kami maoy usa ka nahiusang organisasyon,” siya gisultihan. “Kami naanad na sa paghimog mga kombensiyon. Apan labaw sa tanan, si Jehova nga among Diyos maoy nagpaluyo kanamo.”
Sa pagkatinuod, maoy uban sa tabang ug pagpaluyo ni Jehova nga dako gayod ang nalampos sa ingon niana ka mubong panahon. Handurawa ang kapin sa 20,000 ka tawo nga nagkatigom sulod sa tulo ka adlaw nianang mubo kaayong pahibalo! Ang kinatas-ang tumatambong maoy 22,004, ug 799 ang nabawtismohan. Ang mantalaang Adevărul de Cluj nagtaho human sa kombensiyon: “Ang impresyon nga gihatag niining mga tawhana mao nga sila kanunayng mapahiyomon ug nga sila sinsero sa tanan nilang ginahimo. Ang ilang panaghiusa maoy dalayegon . . . Gipakita nila ang talagsaong disiplina diha sa paagi sa ilang paggawi sa kaugalingon ug sa pagkatalagsaon mahinlo.”
Ang nahitabo sa Brasov maoy ilabinang dalayegon, sanglit ang pag-uyon sa paghimog kombensiyon gihatag pipila ka adlaw lamang sa wala pa magsugod ang naeskedyul nga kombensiyon! Bisan pa niana, 7,500 ang nakuhang mga sak-anan sa pribadong mga balay. Sa dihang nakigsulti ang usa ka Saksi sa iyang mga silingan, sila nagpasaka ug 30 ka delegado. Ug usa ka kongregasyon sa mga Saksi ni Jehova sa Brasov nagpasaka ug 500 ka delegado uban kanila. Ang ubang mga delegado gipahiluna diha sa mga tolda duol sa nataran sa kombensiyon; ug sa dihang miulan, ang maabiabihong mga tawo sa duol nga mga tinukod nga apartment nanganaog ug nagdapit kanila nga modayon sa ilang kaugalingong mga apartment.—Itandi ang Buhat 28:2.
Ang kalihokan sa mga Saksi ni Jehova gidili sa kinabag-ang Ortodoksong Bulgaria, nga kasikbit sa Romania sa habagatan. Sa dihang ang mga bus nga puno sa mga Saksi sa Bulgaria nagpaingon sa Bucharest, ang pipila ka mga opisyal sa aduwana dayag nga nahibalo na bahin sa kausaban sa mga dapit sa kombensiyon. Sa Brasov ang gidaghanong 1,056 nga taga-Bulgaria nagpahimulos sa enterong programa sa ilang kaugalingong pinulongan. Tanantanan, 12,862 ang mitambong sa kombensiyon sa Brasov, ug 832—66 kanila maoy taga-Bulgaria—ang nabawtismohan.
Sa Septiyembre posible ang pag-organisar sa mas gagmayng mga kombensiyon sa Baia-Mare ug Bucharest alang niadtong wala makatambong sa Cluj-Napoca ug Brasov. Dihay giusang mga tumatambong nga 5,340 niining duha ka dugang nga mga kombensiyon, ug 48 ang nabawtismohan. Busa sa “Mga Mensahero sa Diyosnong Pakigdait” nga mga kombensiyon sa miaging ting-init sa Romania, ang total nga 40,206 ang mitambong ug 1,679 ang nabawtismohan. Sa pagkatinuod, ang panalangin ni Jehova anaa niadtong naningkamot sa pag-alagad kaniya sa Romania!
Usa ka hawas sa mga Saksi ni Jehova sa Bucharest miingon: “Sulod sa tulo ka semana, nakabaton kami ug publisidad nga katumbas sa tulo ka tuig nga pagsangyaw sa tibuok nasod. Ang estratehiya nga gituohan sa Ortodoksong Simbahan sa Romania nga makapugong kanamo sa pagkatinuod misangpot alang sa kauswagan sa maayong balita.”
[Hulagway sa panid 24]
Ang Bucharest maoy usa ka maanindot, modernong siyudad
[Hulagway sa panid 25]
Mga poster nga nagpakaulaw sa mga Saksi ni Jehova
[Hulagway sa panid 26]
Mga kandidato sa bawtismo sa Bucharest
[Hulagway sa panid 26]
Sa Brasov, diin ang pag-aprobar sa paghimog kombensiyon gihatag pipila ka adlaw lamang nga abante
[Hulagway sa panid 26]
May kinatas-ang tumatambong nga 22,004 sa kombensiyon sa Cluj-Napoca