Espirituwal nga Kagutom sa Romania
ANG usa ka taho sa Prensa Asosyada sa Brasov, Romania, nag-ingon nga mga 90 porsiyento sa 23 ka milyong tawo sa Romania maoy mga membro sa Ortodoksong Iglesya, nga gitugotan sa paglihok ubos sa pagmando sa Komunista. Bisan pa niana, ang Daily Record sa Siyudad sa Canon, Colorado, T.B.A., nag-ingon nga nakaplagan sa daghan karon nga ang iglesya wala makaabot sa sukdanan. Nagdala kini sa ulohang balita: “Nakaplagan sa mga Taga-Romania nga ang Ortodoksong Iglesya Walay Kalabotan sa Adlaw-Adlawng Pagkinabuhi.”
“Si Alexandru Paleologu, usa ka magsusulat ug pilosopo,” mitaho ang mantalaan niadtong Oktubre, “naghisgot ug kakulang sa pagsalig diha sa mga awtoridad sa simbahan, ug miingon nga ang pamaagi ug ang diwa sa relihiyon nagkagubot. Pananglitan, ang mga tawo manguros ug magpuasa sa gitudlo nga mga adlaw. Apan ang aborsiyon, nga giisip sa simbahan nga usa ka sala, maoy kaylap.”
Ang Daily Record nag-ingon nga daghan ang nahimong mga Saksi ni Jehova, nga naghisgot sa epekto sa programa sa pagtudlo sa Bibliya sa mga Saksi diha sa usa ka pamilya: “Ang bana ni Florentina Petrisor kaniadto maoy usa ka palahubog ug mangulata kaniya, siya nag-ingon. Apan sukad nga ang magtiayon nahimong mga Saksi ni Jehova, ang iyang pamilyahanong kinabuhi nagmalinawon.”
Si Florentina, usa ka 38-anyos nga mananahi, gikatahong “mibiya sa Ortodoksong iglesya tungod sa kapakyasan niini sa pagtudlo sa panon ug sa pagkamateryalistiko sa iyang lokal nga pari.” Ang mantalaan mipatin-aw: “Sa dihang namatay ang iyang ugangang-lalaki, si Petrisor nag-ingon nga ang iyang pamilya kinahanglang magbayad ug magpakaon sa pari aron maseguro ang maayong serbisyo sa lubong una niya mapakaon ang iyang mga anak. ‘Ako naghunahuna nga dili kadto husto,’ siya miingon.”
Mahitungod sa kampanya sa simbahan nga pagsabwag ug sayop nga impormasyon bahin sa mga Saksi, ang Daily Record nag-ingon: “Sa Romania, ang Ortodoksong iglesya, nga nakabaton pag-usab ug impluwensiya, mitabang sa pagmaniobra sa gobyerno nga ibalhin ang usa ka dakong panagtigom sa mga Saksi ni Jehova niining ting-init gikan sa kaulohan nga Bucharest ngadto sa Transylvania nga mga siyudad sa Brasov ug Cluj.”
Ang Pebrero 22, 1997, nga Pagmata! naghisgot bahin sa kampanya sa simbahan sa pag-impluwensiya sa gobyerno nga ikanselar ang internasyonal nga kombensiyon nga gieskedyul alang sa Bucharest niadtong Hulyo 1996. Mabasa nimo sa maong magasin kon sa unsang paagi dali rang nahikay ang alternatibong mga kombensiyon sa Cluj-Napoca ug Brasov ug sa unsang paagi ang total nga 34,866 nakatambong niana. Ang misangpot nga publisidad sa tibuok kalibotan maoy talagsaon. “Ang gihunahuna sa Romanianhong Ortodoksong Iglesya nga magpugong kanamo,” usa ka hawas sa Saksi miingon, “aktuwal nga nahimong alang sa pagpauswag sa maayong balita.”
[Hulagway sa panid 31]
Mga delegado nga nanag-awit sa kombensiyon sa Brasov