Usa ka Kalibotan nga Walay Krimen—Sa Unsang Paagi?

ANG pagpakig-away batok sa organisadong krimen nagakahitabo sa tibuok-kalibotan. “Adunay talagsaong kauswagan batok sa Mafia sa mubo lang kaayong panahon,” nag-ingon ang U.S.News & World Report, “nga sa dakong bahin maoy tungod sa usa ka balaod, ang Racketeer Influenced and Corrupt Organizations Act, o RICO.” Kini nagtugot nga mapahamtangan ug silot ang kriminal nga mga organisasyon pinasukad sa sumbanan sa ginahimong mga raket, dili lamang sa indibiduwal nga mga buhat. Kini uban sa impormasyong nahipos gikan sa sekretong mga koneksiyon nga gitaod diha sa telepono ug gikan sa mga membro sa gang nga manunumbong nga naghangyo nga hatagan ug gaan-gaan nga silot nakatabang sa kalamposan sa pagpakiggubat batok sa Mafia sa Tinipong Bansa.

Sa Italya usab gigukod pag-ayo sa mga awtoridad ang mga gang. Sa mga lugar sama sa Sicily, Sardinia, ug Calabria, diin malig-on kaayo ang organisadong krimen, ang mga yunit sa armi gipadala sa pagpatrolya sa publikong mga tinukod ug sa importanteng mga dapit aron mapukgo ang mga pag-atake sa kriminal nga mga elemento. Gilantaw kini sa gobyerno nga samag sibil nga gubat. Uban sa pagkapriso sa banggiitang mga lider sa kriminal nga mga sindikato ug sa sentensiya nga nadawat sa primero ministro kanhi tungod sa iyang ginaingong mga koneksiyon sa Mafia, ang Italya nakakita ug pipila ka mga resulta.

Sa Hapon gigukod sa gobyerno ang yakuza sa dihang gipatuman niini ang Balaod Batok-sa-Organisadong Krimen niadtong Marso 1, 1992. Ubos niining balaora, sa dihang maorganisar ang kriminal nga organisasyon, kini gidid-an sa 11 ka buhat sa mapintas nga pagpamugos, lakip sa pagpangayog kuwarta agig suhol aron dili mopiyait, pagpakigbahin sa mga raket alang konohay sa proteksiyon, ug pagpataliwala sa paghusay sa mga kaso nga may bayad. Pinaagi sa pagpatuman niining balaora, ang gobyerno nagtinguha sa pagpukgo sa tanang tuboran sa kita sa gang. Ang balaod nakaapektog dako sa kriminal nga mga organisasyon. Ang ubang mga grupo nabungkag, ug usa ka boss sa krimen naghikog​—tingali tungod sa estriktong pagpatuman sa balaod.

Sa pagkamatuod, ang mga gobyerno ug mga ahensiya nga nagapatuman-sa-balaod nakigbisog pag-ayo batok sa organisadong krimen. Bisan pa, ang Mainichi Daily News, sa dihang nagtaho bahin sa komperensiya sa mga huwes ug mga opisyal sa kapolisan gikan sa tibuok kalibotan nga gihimo niadtong 1994, nag-ingon: “Ang organisadong krimen nahimong mas malig-on ug mas sapian sa halos tanang bahin sa kalibotan, nga nakatumpig mga 1 ka trilyong dolyares sa usa ka tuig nga ingreso.” Ikasubo, ang mga paningkamot sa tawo sa pagwagtang sa kriminal nga mga sindikato gikan sa nawong sa yuta limitado. Usa ka katarongan niini mao nga diha sa kadaghanang kaso ang hustisya hinay kaayo ug dili segurado. Alang sa kadaghanang tawo, ang balaod sagad daw pabor sa kriminal, dili sa biktima. Ang Bibliya nag-ingon duolan sa 3,000 ka tuig kanhi: “Tungod kay ang hukom batok sa daotang buhat wala man ipakanaog dihadiha, busa ang kasingkasing sa anak nga mga lalaki sa tawo bug-os nga magtinguha sa pagbuhat ug daotan.”​—Ecclesiastes 8:11.

Paggula Gikan sa Kriminal nga mga Organisasyon

Dugang pa sa paggukod sa organisadong krimen gikan sa gawas, ang mga gobyerno misulay sa pagtabang niadtong anaa sa sulod sa paggula sa mga sindikato sa krimen. Ang maong lihok dili sayon. Sumala sa usa ka karaang panultihon, “ang bugtong paagi sa paggawas sa Mafia maoy pinaagig lungon.” Aron makaundang ang usa ka membro sa organisasyon sa yakuza, siya kinahanglang magbayad ug dakong kantidad nga salapi o magpaputol sa iyang gamayng tudlo o bahin niini. Dugang sa kahadlok nga nalangkit sa pagtapos sa mga koneksiyon sa tinagong organisasyon sa mga kriminal, kinahanglang atubangon sa usa ka membro sa gang kanhi ang kamatuoran sa pagkinabuhi sa matul-id nga kinabuhi. Ang iyang mga aplikasyon sa trabaho sagad pagaayran. Apan, sa ubang nasod, adunay mga hot line ang kapolisan aron matabangan ang mga membro sa gang nga naningkamot nga makalingkawas ug naglisod sa pagkakitag desenteng mga trabaho.

Aron masagubang ang mga kalisod gikan sa pamilya sa gang ug sa pagpihig sa katilingban, ang membro sa gang nagkinahanglag malig-ong panukmod sa pagbag-o. Unsay makatukmod kaniya? Mahimong gugma alang sa iyang pamilya, pagpangandoy ug malinawong kinabuhi, o tinguha sa pagbuhat sa matarong. Ang kinakusgang panukmod, hinunoa, maayong pagkailustrar sa sugilanon ni Yasuo Kataoka sa mosunod nga artikulo.

Si Yasuo Kataoka maoy larawan sa ginatos kinsa bug-os nakabag-o sa ilang mga kinabuhi. Ang samag-mananap nga mga hiyas nga ilang gipakita kanhi gipulihan sa bag-ong personalidad nga “gilalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:24) Karon, ang mga tawo nga samag mga lobo nagpuyong malinawon uban sa mga malumog-buut, samag-karnerong mga lungsoranon, ug sila nagatabang pa sa uban!​—Isaias 11:6.

Bulag Gikan sa Espiritu sa Kalibotan

Ingon sa gihisgotan sa nag-unang artikulo, dili lamang ang kriminal nga mga sindikato ang nailalom sa dili-makitang awtoridad ni Satanas nga Yawa kondili ang tibuok kalibotan. Ang mga tawo wala gani makaamgo niana, apan giorganisar ni Satanas ang kalibotan aron sa pag-alagad sa iyang kriminal nga mga katuyoan. Sama nga ang kriminal nga mga sindikato nagtaganag bahandi ug mini nga mga sistema sa pamilya, siya ang nagdula sa papel sa buotang agalon pinaagi sa pagtagana sa mga tawo ug mga bahandi, mga kalingawan, ug pagbating suod. Bisan pag ikaw tingali wala makaamgo niana, ikaw tingali nalimbongan sa iyang daotang mga laraw. (Roma 1:28-32) Ang Bibliya nagtug-an kanato nga ang “pakighigala sa kalibotan maoy pakigdumot sa Diyos.” (Santiago 4:4) Peligrong makighigala niining kalibotana, nga ubos sa satanasnong impluwensiya. Ang Maglalalang sa uniberso adunay usa ka panon sa mga manulonda ubos ni Jesu-Kristo nga andam sa pagsikop kang Satanas ug sa iyang mga demonyo aron mahinloan ang kalibotan sa ilang daotang impluwensiya.​—Pinadayag 11:18; 16:14, 16; 20:1-3.

Nan sa unsang paagi makagawas ka ilalom sa impluwensiya sa kalibotan ni Satanas? Dili pinaagi sa pagkinabuhing mag-inusara kondili pinaagi sa pagbulag gikan sa mga tinamdan ug mga panghunahuna nga nangibabaw sa kalibotan karong adlawa. Aron mahimo kana, kinahanglang makigbisog ka batok sa mga taktika ni Satanas nga nagapanghadlok ug isalikway ang mga pangpasibot nga iyang gitanyag aron padayon niyang makontrolar ang mga tawo. (Efeso 6:11, 12) Kini nagkinahanglag mga pagsakripisyo, apan makalingkawas ka sama sa uban kon ikaw desidido ug kon imong pahimuslan ang tabang nga gitanyag sa mga Saksi ni Jehova.

Unsay mosunod unya sa buhat sa Diyos sa paghinlo niining magubot nga kalibotan sa krimen? “Labot sa mga anak sa mga daotan, sila pagaputlon gayod,” nag-ingon ang Bibliya, ug kini nagpadayon: “Ang mga matarong magapanunod sa yuta, ug sila magapuyo diha niini sa walay kataposan.” (Salmo 37:28, 29) Nan, wala na unyay katarongang mokurog niadtong kinsa adunay samag-mananap nga mga hiyas, kay sila gibag-o na pinaagi “sa kahibalo ni Jehova,” nga magapuno sa yuta.​—Isaias 11:9; Ezequiel 34:28.

Karong adlawa ang maong kausaban nahimong tinuod, ingon sa gipakita sa mosunod nga sugilanon sa kinabuhi sa usa ka membro niadto sa yakuza sa Hapon.

[Hulagway sa panid 10]

Diha sa bag-ong kalibotan sa Diyos, ang tanan magapahimulos sa buhat sa ilang mga kamot