Pagbulag Gikan sa Organisadong Krimen—“Usa Ako ka Yakuza”
“PAPA, inigpauli nimo, dungan ta nga manambong sa mga tigom. Saari ko, di ba?” Nadawat nako kining sulata gikan sa akong ikaduhang anak nga babaye samtang ako napriso sa ikatulong higayon. Siya regular nga nagtambong sa mga tigom sa mga Saksi ni Jehova uban sa akong asawa. Sanglit ang mga sulat gikan sa akong pamilya mao lamang ang akong bugtong tuboran sa kahupayan, ako misaad kaniya nga buhaton nako ang iyang gihangyo.
‘Nganong ako nagkinabuhi sa krimen nga nagpalayo kanako gikan sa akong pamilya?’ naghunahuna ako sa akong kaugalingon. Gipalandong ko ang mga adlaw sa dihang ako bata pa kaayo. Namatay ang akong amahan sa dihang ako 18 ka bulan lamang, busa wala gani ako mahinumdom sa iyang nawong. Ang akong inahan naminyo kaduha human niana. Ang maong mga kahimtang sa pamilya nakaapektar kaayo kanako, ug sa hayskul ako misugod sa pagpakig-uban sa mga bugoy. Ako nahimong mapintas ug sagad nalangkit sa pagpakig-away gawas sa tunghaan. Sa dihang ako diha sa ikaduhang tuig sa hayskul, ako nag-organisar ug usa ka grupo sa mga estudyante aron makig-away sa laing grupo. Tungod niini, ako gidakop ug gipadala sa koreksiyonal nga institusyon sa makadiyot.
Ako samag nagligid nga bola palugsong ngadto sa kinabuhi sa kapintasan. Wala magdugay ako nagtukod ug usa ka pundok sa mga bugoy, ug kami mag-estambayan sa opisina sa usa ka grupo sa yakuza. Sa dihang ako nag-edad ug 18, ako nahimong bug-os nga membro nianang grupoha. Sa dihang ako nag-edad ug 20, ako gidakop tungod sa nagkalainlaing buhat sa kapintasan ug gisilotan ug tulo ka tuig sa pagkapriso. Una, akong gisilbihan ang sentensiya diha sa Juvenile Prison sa Nara, apan ang akong panggawi wala moarang-arang. Busa ako gipadala sa laing prisohan, usa nga alang sa mga hamtong. Apan ako misamot ug sa kataposan gidala sa Kyoto sa usa ka prisohan sa banggiitang mga kriminal.
‘Nganong ako nagpadayon sa pagbuhat niining maong mga krimen?’ gisukna ko ang akong kaugalingon. Sa nagpalandong ako, nakaamgo ako nga kini maoy tungod sa akong binuang nga pangatarongan. Niadtong panahona, ako nagtuo nga ang maong pamatasan maoy linalaki gayod, pamatuod sa akong pagkalalaki. Sa dihang gipagawas ako sa prisohan sa edad nga 25, ang mga isigkamembro sa gang nagtamod kanako nga maayong laki. Karon nabuksan ang dalan alang kanako nga makabatog taas nga posisyon diha sa kalibotan sa krimen.
Mga Reaksiyon sa Akong Pamilya
Ako nagminyo nianang panahona, ug wala magdugay ang akong asawa ug ako nakabatog duha ka anak nga babaye. Apan, wala mabag-o ang akong kinabuhi. Ako padayong nagngadto-nganhi tali sa akong balay ug sa polis—ako nangulatag mga tawo ug nagpangilkil. Ang matag hitabo nagtabang kanako nga maangkon ang pagtamod sa akong mga isigkamembro sa gang ug ang pagsalig sa dakodako. Sa kataposan, ang akong magulang nga “igsoon” sa yakuza gituboy sa gang ug nahimong ang dakodako. Ako gituboy sa pagkahimong pangabaga kaniya.
‘Unsay gibati sa akong asawa ug mga anak sa akong paagi sa kinabuhi?’ ako naghunahuna sa akong kaugalingon. Sila tingali naulaw gayod nga adunay kriminal nga bana ug amahan. Napriso ako pag-usab sa edad nga 30 ug dayon lain na usab sa dihang ako nag-edad ug 32. Niining higayona, ang tulo-ka-tuig nga sentensiya sa pagkapriso malisod gayod alang kanako. Ang akong mga anak nga babaye wala tugoti sa pag-anha ug pagduaw kanako. Ako gimingaw sa pagpakigsulti ug paghalog kanila.
Sa panahong ako nagsugod sa pagsilbi niining kataposang tuig sa sentensiya sa pagkapriso, ang akong asawa nagsugod sa pagtuon sa Bibliya uban sa mga Saksi ni Jehova. Kada adlaw siya nagsulat kanako bahin sa kamatuoran nga iyang nakat-onan. ‘Unsa kining kamatuoran nga gihisgotan sa akong asawa?’ ako nahibulong. Gibasa ko ang tibuok Bibliya samtang diha sa prisohan. Gipalandong ko ang gisulti sa akong asawa diha sa iyang mga sulat bahin sa usa ka paglaom sa umaabot ug bahin sa katuyoan sa Diyos.
Ang paglaom sa mga tawo nga mabuhing walay kataposan sa Paraisong yuta maoy makaiikag tungod kay ang kamatayon nakahadlok gayod kanako. Ako kanunay nga naghunahuna, ‘Kon ikaw mamatay, ikaw ang pildi.’ Samtang ako nagpalandong, ako nakaamgo nga ang kahadlok sa kamatayon maoy nagtukmod kanako sa pagdaot sa uban sa dili pa nila ako madaot. Ang mga sulat usab sa akong asawa ang naghimo kanakong makasabot sa kahaw-ang sa akong tumong sa pag-asenso diha sa kalibotan sa gang.
Sa gihapon, wala ako matukmod sa pagtuon sa kamatuoran. Ang akong asawa nagpahinungod sa iyang kaugalingon kang Jehova ug nahimong usa sa iyang bawtismadong mga Saksi. Bisag sa akong sulat miuyon ako sa pag-adto sa ilang mga tigom, ako wala maghunahuna nga mahimong usa sa mga Saksi ni Jehova. Gibati nako nga daw ang akong asawa ug mga anak nga babaye nagpahilayo na kanako, nagbiya kanako.
Pagkagawas sa Prisohan
Ang adlaw sa kataposan miabot alang kanako nga makagawas. Sa ganghaan sa Prisohan sa Nagoya, daghang membro sa gang ang naglumbay sa pagsugat kanako. Diha sa dakong panon sa mga tawo, hinunoa, ako nagpangita lamang sa akong asawa ug mga anak. Sa pagkakita sa akong mga anak nga babaye, nga nanagko na sulod sa tulo ka tuig ug unom ka bulan, ako nakahilak.
Duha ka adlaw human makapauli sa balay, gituman ko ang akong gisaad sa akong ikaduhang anak nga babaye ug mitambong sa tigom sa mga Saksi ni Jehova. Ako natingala sa pagkakita sa malipayong tinamdan sa tanan nga nanambong. Ang mga Saksi mainitong miabiabi kanako, apan gibati ko ang kabakikaw. Sa dihang nasayran ko sa ulahi nga kadtong miabiabi kanako nasayod sa akong kriminal nga kahimtang, ako naglibog. Apan, gibati ko ang ilang kamainiton ug naikag sa binase-sa-Bibliya nga pakigpulong nga gihatag. Kadto maoy bahin sa mga tawo nga mabuhing walay kataposan sa Paraiso sa yuta.
Ang paghunahuna sa akong asawa ug mga anak nga babaye nga makalabang buhi ngadto sa Paraiso ug ako malaglag nakapaguol gayod kanako. Ako nagpalandong ug maayo kon unsay akong buhaton aron mabuhing walay kataposan duyog sa akong pamilya. Misugod ako sa paghunahuna nga biyaan nako ang akong kinabuhi ingong membro sa gang, ug ako nagsugod ug pagtuon sa Bibliya.
Pagbulag Gikan sa Akong Kriminal nga Kinabuhi
Mihunong ako sa pagtambong sa mga miting sa gang ug miundang sa pagpakig-uban sa yakuza. Malisod bag-ohon ang akong paagi sa panghunahuna. Ako nagmanehog dakong inimportar nga kotse aron lang malingaw niana—kadto maoy pagpasigarbo. Miabot ug tulo ka tuig nga gibaylo nako ang akong kotse ug kasarangang modelo. Ako usab may hilig nga pangitaon ang labing sayon nga paagi sa pagbuhat sa mga butang. Apan, samtang nakat-onan ko ang kamatuoran, nakita ko nga ako kinahanglang magbag-o. Apan sama sa giingon sa Jeremias 17:9, “ang kasingkasing mas malimbongon kay sa bisan unsa ug daotan.” Nasayod ako kon unsay matarong apan naglisod ako sa pagpadapat sa akong nakat-onan. Ang problema nga akong giatubang daw sama sa usa ka dakong bukid. Nahasol ako, ug daghang higayong ako naghunahuna sa pag-undang sa pagtuon ug isalikway sa hunahuna ang pagkahimong usa sa mga Saksi ni Jehova.
Unya, ang akong konduktor sa pagtuon sa Bibliya nagdapit ug nagapanaw nga magtatan-aw nga may kasinatian nga sama kanako sa paghatag ug pakigpulong diha sa among kongregasyon. Gikan sa Akita, 400 ka milya ang gilay-on, siya mibiyahe hangtod sa Suzuka sa pagdasig kanako. Human niana, sa panahong bation ko ang kaluya ug maghunahuna sa pag-undang, ako makadawat ug sulat gikan kaniya, nga nangutana kanako kon ako padayon bang nagalakaw sa dalan sa Ginoo.
Ako padayong nag-ampo kang Jehova sa pagtabang kanako nga makabulag gikan sa tanan nakong koneksiyon sa yakuza. Ako may kompiyansa nga si Jehova motubag sa akong pag-ampo. Niadtong Abril 1987, ako sa kataposan nakahimo sa pagbiya gikan sa organisasyon sa yakuza. Samtang dad-on ako sa akong kaugalingong negosyo sa laing nasod kada bulan, nga layo gikan sa akong pamilya, gibag-o ko ang akong trabaho ngadto sa pagkahimong dyanitor. Kini naghatag kanakog higayon sa tanang hapon alang sa espirituwal nga mga kalihokan. Sa unang higayon, nakadawat akog sobre sa akong suweldo. Kadto gamay ra kaayo, apan nakapalipay kaayo kini kanako.
Sa dihang ako mao ang ikaduha sa dakodako sa organisasyon sa yakuza, ako adunahan sa materyal, apan karon ako adunay espirituwal nga mga bahandi nga dili molubad. Ako nakaila kang Jehova. Ako nasayod sa iyang mga katuyoan. Ako may mga prinsipyo nga pagasundon. Ako may tinuod nga mga higala nga nagatagad. Sa kalibotan sa yakuza, ang mga membro sa gang taphaw lamang nga nagatagad, apan walay yakuza nga akong nahibaloan, wala bisag usa, ang mosakripisyo sa iyang kaugalingon alang sa kaayohan sa uban.
Niadtong Agosto 1988, akong gisimbolohan ang akong pagpahinungod kang Jehova pinaagi sa bawtismo sa tubig, ug sa pagkasunod nga bulan, ako misugod sa paggugol ug labing menos 60 ka oras sa usa ka bulan sa pagpakigsulti sa uban bahin sa maayong balita nga nakapabag-o sa akong kinabuhi. Ako nag-alagad na ingong bug-os-panahong ministro sukad niadtong Marso 1989 ug karon nahatagan ug pribilehiyo sa pag-alagad ingong ministeryal nga alagad diha sa kongregasyon.
Akong nawagtang halos ang tanan nga mga relikyas sa akong kinabuhi isip yakuza. Apan, adunay usa nga nagpabilin. Kini mao ang mga patik sa akong lawas nga nagpahinumdom kanako, ingon man sa akong pamilya ug sa uban, bahin sa akong yakuza nga kagahapon. Kas-a, ang akong kamagulangang anak nga babaye mipauli sa balay gikan sa tunghaan nga naghilak, nag-ingon nga dili na siya motungha pa tungod kay gisultihan siya sa iyang mga higala nga ako usa ka yakuza ug may mga patik. Akong napatin-awg maayo ang maong butang uban sa akong mga anak nga babaye, ug nasabtan nila ang kahimtang. Ako nagpaabot sa adlaw sa dihang ang yuta mahimong usa ka paraiso ug ang akong unod mahimong “mabag-o sama nianang unod sa batan-on.” Unya ang akong mga patik ug mga panumdoman sulod sa 20 ka tuig sa kinabuhing yakuza mahimong mga butang na sa nangagi. (Job 33:25; Pinadayag 21:4)—Sumala sa giasoy ni Yasuo Kataoka.
[Hulagway sa panid 11]
Ako nangandoy sa adlaw sa dihang ang akong mga patik mapapas
[Hulagway sa panid 13]
Sa Kingdom Hall uban sa akong pamilya