Gikan sa Among mga Magbabasa
Ortodoksong Iglesya Ingong usa ka Ortodoksong Kristiyano, ako nainteres sa inyong artikulong “Ang Gregong Ortodoksong Iglesya—Usa ka Relihiyong Nabahin.” (Enero 8, 1996) Sa sunod panahon nga inyong pakaulawan ang Ortodoksiya, sa pagkamatinahuron hisgoti ang mga kontribusyon niini, sama sa kon sa unsang paagi gipreserbar niini ang Kristiyanidad panahon sa Islamikong paglutos ug sa pagmando sa Sobyet. Gawas pa, ang pagbulag sa Simbahan ug Estado dili Biblikanhon. Ang mga gobyerno ba ni Haring David o Solomon bulag sa Simbahan?
M. F., Tinipong Bansa
Among gitumong ang among pagtagad sa krisis nga bag-o pang giatubang sa Ortodoksong Iglesya—usa ka butang nga gipamatud-an pag-ayo sa palaumagian sa balita sa Gresya. Kining maong krisis mao ang resulta sa kapakyasan sa iglesya sa pagtuman sa sugo ni Jesus nga mahimong “dili bahin sa kalibotan” ug magpabiling neyutral sa politika. (Juan 17:16)—ED.
Mga Atake sa Kalisang Salamat sa artikulong “Pagsagubang sa mga Atake sa Kalisang.” (Hunyo 8, 1996) Nasinati nako kining maong mga pag-atake sulod sa 14 ka tuig ug naghunahuna nga ako lang ang may sakit niini. Usahay ang pagbati moapektar pa gani nako diha sa Kingdom Hall. Bisan tuod ang akong mga suliran dili mawala, kining artikuloha nakatabang gayod kanako.
C. C., Espanya
Maoy uban sa bul-og sa mga luha nga akong gibasa ang artikulo bahin sa mga atake sa kalisang. Makatabang kini kanako sa sunod higayon nga mosugmat ang kalisang. Gibati ko nga ang artikulo maoy tubag sa akong mga pag-ampo.
M. B., Scotland
Sulod sa duolan sa 30 ka tuig, dili ako makahimo sa pagsakay sa mga tren o mga bus o mapalibotan sa mga tawo. Ang mga tigom diha sa Kingdom Hall ug ang mga kombensiyon maoy dagkong mga hagit. Busa inyong masabtan kon sa unsang paagi kining artikuloha nahimong tuboran sa dakong kadasig ug kahupayan alang kanako. Kinasingkasing akong nagpasalamat kaninyo tungod sa pagsulat mahitungod niining maong balatian diha sa makapalig-on ug makapahupay nga paagi.
Y. T., Hapon
Ako usa ka bug-os-panahong magwawali, ug nakasinati ako niining grabeng mga atake sukad niadtong 1994. Nawad-an ako sa akong kalipay ug dili gustong mobiya sa akong balay. Ako naghunahuna nga kining maong mga pagbati maoy gumikan sa kakulang sa pagtuo, apan karon ako nahibalo nga dili lang kay ako ra ang Kristohanon nga nahiagom niini.
S. A., Brazil
Waltzing Matilda Ang awit nga “Waltzing Matilda” nagpahinumdom kanako sa matahom nga mga handomanan. Salamat sa maong artikulo (Hunyo 8, 1996) nga naghatag ug nagpaluyong impormasyon bahin nianang awita. Ang pagbasa niana nagpukaw pag-usab sa akong interes sa pagbasa sa tanang artikulo sa Pagmata!
J. M., Alemanya
Mga Pamatasan sa Telepono Salamat sa ekselenteng artikulo nga “Komosta ang Imong Pamatasan sa Telepono?” (Hunyo 8, 1996) Nagtrabaho ako sa usa ka bangko nga nagtaganag serbisyo sa kliyente pinaagi sa telepono. Akong gihatag ang artikulo sa akong superbisor, ug iya akong giingnan nga iyang nakaplagan ang artikulo nga makaayo, nunot-sa-panahon, ug praktikal. Siya mihangyo kanako nga iapod-apod ang artikulo sa among 32 ka operetor sa telepono.
N. J. S., Brazil
Sanglit nakasinatig kalisdanan sa miagi maylabot sa wala-kinahanglanang mga tumatawag kinsa may kriminal nga mga motibo, dugay na namong gisunod ang sugyot sa kompaniya sa telepono nga ibutang ang awditibo kon ang tumatawag dili mopaila sa iyang kaugalingon tapos sa tulo ka matinahurong mga hangyo. Kini miresulta sa kahiubos sa pipila ka higayon sa dihang ang usa ka higala mitawag ug miingong tag-ana kinsa ni ingon sa gihisgotan sa artikulo. Ang mga artikulo nga sama niini nagpasiugda ug kalulot ug pagsabot bisan sa daw dili-hinungdanong mga bahin.
G. A., Tinipong Bansa