Gikan sa Among mga Magbabasa
Panaghigalaay Ako nagpadala kaninyo sa akong sinserong pasalamat alang sa artikulong “Mga Batan-on Nangutana . . . Nganong Dili Ako Makahupot ug mga Higala?” (Mayo 22, 1996) Dili ninyo mahubit kon giunsa niining artikuloha pagtabang kanako. Gipakita niini kanako nga, luyo sa mga kakulian, posible ang pagbaton ug dumalayong panaghigalaay. Popanahon, mawad-an kitag mga higala tungod kay giunya-unya nato ang paghusay sa mga di-pagsinabtanay. Kining artikuloha nakatabang kanako sa pagpakigbugno sa akong mga kahuyangan niining bahina.
A. M. P., Brazil
Ang artikulo midangat gayod sa hustong panahon. Tulo ka bulan kanhi ang akong gipanggang panaghigalaay sa laing babaye misugod sa pagkabugnaw; midangat kami sa punto nga dili na mag-estoryahay. Sa dihang midangat ang artikulo, among gibasa kana sa akong higala ug nakaamgo nga migawi kami sa binuang nga paagi. Among gihisgotan kadto ug nag-alim sa daghang serye sa di-pagsinabtanay. Karon ang among panaghigalaay milagsik na usab.
N. T., Italya
Pagbuto sa Bolkan Akong nahinumdoman ang mga taho sa pamantalaan sa pagbuto sa Bolkang Pinatubo balik pa niadtong 1991. Apan gikalimtan ko lang kadto hangtod akong nabasa ang artikulo nga “Lahar—Resulta sa Bolkang Pinatubo.” (Mayo 22, 1996) Wala ako sukad makadungog ug lahar kaniadto ug nakaplagang makapahinam ang artikulo. Ang kaisog ug kamatinabangon nga gipasundayag sa pamilyang Garcia, bisan tuod diha sa agianan sa lahar, maoy talagsaon.
S. F., Canada
Ang artikulo nakatandog pag-ayo kanako. Makapadasig ang pagbasa sa mga kasinatian sa Kristohanong mga igsoon nga naghupot sa ilang kasibot sa espirituwal nga mga butang, bisan tuod diha sila sa lisod nga mga kahimtang. Nagdasig kini kanako nga dili tugotan ang ginagmayng mga suliran nga makapugong kanako sa pagtambong sa Kristohanong mga tigom o did-an ako sa pagpakig-ambit sa buluhatong pagsangyaw. Salamat sa artikulo!
S. D., Italya
Kami sa akong bana wala sukad makadungog ug lahar, apan karon nakaamgo kami kon unsa ka seryoso ug ka peligroso kini. Buot namong masayod ang among mga igsoon sa Pilipinas nga kami nagaampo alang kanila ug niadtong nakatabang kanila.
C. A. B., Guatemala
Berdeng Kidlap Mao pay akong pagbasa sa artikulong “Nakakita Ka na ba Sukad ug Berdeng Kidlap?” (Mayo 22, 1996) Pipila ka tuig kanhi, samtang naglupad ibabaw sa kalasangan sa Alaska, nahingangha ako sa pagkakita sa asul-berdeng kidlap nga milungtad lamag tipik sa segundo. Wala ako sukad makakaplag ug artikulong nagsaysay niining hitaboa hangtod karon. Ako usahay namalandong nga basig hunahuna ra nako kadto!
G. C., Alaska
Mga Atake sa Kalisang Buot nakong ipahayag ang akong pasalamat sa artikulong “Pagsagubang sa mga Atake sa Kalisang.” (Hunyo 8, 1996) Giantos nako ang maong mga atake sulod sa unom ka tuig. Human makapayunir (bug-os-panahong ebanghelisador) ug usa ka tuig, kinahanglang moundang ako kay wala na akoy kusog sa pagsagubang sa mga atake. Pagkamakapaguol nga sanglit kay himsog man akong tan-awon, ang akong suod nga mga higala wala makasabot niini. Lisod ang paghubit kon unsa ako ka malipayon nga nagbasa niining artikuloha.
O. S., Ukraine
Nag-alagad ako ingong bug-os-panahong ministro sulod sa walo ka tuig. Apan sa daghang katuigan, may pagbati ako sa pagkawalay-bili ug giantos ko ang tumang kabalaka. Sa dihang gibasa ko kining artikuloha nga naghubit sa mga simtoma nga susama sa ako, akong gipadapat dayon ang gitambag niini. Misugod pagkaayo ang akong mga pagbati, ug mas kalmado ang akong kasingkasing.
K. M., Thailand
Nakapatambal na akog mga atake sa kalisang ug natabangan. Apan, sekreto akong gitulisok sa pangutanang, ‘Huyang ba ako sa espirituwal o tapolan?’ Ang pagbasa sa artikulo nagpagaan sa tumang kabug-at gikan sa akong mga abaga.
P. P., Pinlandia