Gikan sa Among mga Magbabasa
Nganong Pugngan ang Kasuko? Salamat sa artikulong “Nganong Pugngan ang Imong Kasuko?” (Hunyo 8, 1997) Gikan ako sa usa ka dakong pamilya, ug panahon sa akong pagkabata nakita ko ang daghang away sa akong panimalay. Ang akong mga ginikanan nagdiborsiyo, ug sukad niadto ako adunay panalagsang mga pagsilaob sa kasuko. Adlaw ug gabii ako miampo kang Jehova, nga naghangyo kaniya nga tabangan ako niini nga suliran. Pagkamakapahingangha ang pagbasa niini nga artikulo, nga morag nagtumong kanako! Akong gihatagag pagtagad ang mga kasulatan nga gikutlo—pananglitan, ang Efeso 4:26, nga nag-ingon: “Ayaw pasalopa ang adlaw nga kamo anaa sa suko nga kahimtang.” Ang akong bana ug ako mipadapat niini. Salamat kang Jehova ug niini nga artikulo, akong nabuntog ang akong suliran.
A. R. S., Tinipong Bansa
Pagsagubang sa mga Atake sa Kalisang Kinahanglan kong pasalamatan si Jehova nga kinasingkasing alang sa artikulong “Pagsagubang sa mga Atake sa Kalisang.” (Hunyo 8, 1996) Ang akong igsoong babaye dili pa dugay na-nervous breakdown. Wala kami mahibalo kon unsay nahitabo kaniya, tungod kay walay doktor ang nakadayagnos sa iyang kahimtang. Sa kadugayan, siya giadmit sa ospital ug nahibaloan gikan sa paghiling nga adunay nervous breakdown ug nga nag-antos gikan sa mga atake sa kalisang. Ang artikulo miabot gayod sa hustong panahon, nga nagpabati kanamo nga si Jehova nag-atiman kanamo. Ang akong igsoong babaye milingkod nga naghilak samtang iyang gibasa kini, kay tungod niadto iyang nasayran sa tinuoray nga si Jehova nakasabot gayod kon unsay iyang giantos. Ang mga pulong sa igsoong babaye nga gikutlo sa artikulo, nga nag-ingon nga kanunay niyang nakita si Jehova nga tinuod nga tinubdan sa kalig-on ug kahupayan, nagpakita kon unsa ka talagsaon gayod ang atong Diyos nga Jehova.
A. E. W., Habagatang Aprika
“Ngadto sa mga Dalunggan sa Usa ka Batang Gamay” Kini nga artikulo (Hunyo 8, 1997) nakatandog pag-ayo kanako. Diha sa ministeryo sa kanataran, kanunay kong mahibalag ang mga batan-on. Wala sayloi o pakamenosa sila, kanunay ko silang gisultihan mahitungod sa Paraiso. Daghang salamat sa pagpatik niini nga kasinatian, tungod kay nagdasig kini kanako nga magpadayon niini nga paagi. Kinsay nahibalo kon kansang mga dalunggan ang mahimong sunod nga “mga dalunggan sa usa ka batang gamay”?
M. O. U., Nigeria
Kining artikuloha nakaapektar gayod kanako! Dihang ako nakaabot sa bahin nga “Nakakat-on sa Kamatuoran sa Bibliya” ug nabasa ang gibati nga kakugang ni Louise sa pagkakita sa Salmo 37:9 mahitungod sa pagpanunod sa yuta—ug diha pa sa iyang King James Version!—ako nakahilak pag-ayo. Salamat alang niining mga sugilanon sa kinabuhi, ug palihog padayon sa pagpatik niini nga regular diha sa Pagmata!
P. C., Inglaterra
Gikan sa Among mga Magbabasa Gikalipay ko ang pagdawat sa tanang magasin. Nalingaw ako ilabina sa mga komento nga gikan sa mga magbabasa diha sa Hunyo 8, 1997, nga Pagmata! may kalabotan sa pagpalagpot. Napalagpot ako ug dayon napasig-uli sa pagkasunod tuig. Daghang tawo naghunahuna nga kini nga lakang maoy maharoson. Apan kini dili tinuod. Ang disiplina nga akong nadawat maoy dili sayon dawaton apan tino nga dili maharoson. Nahibalo ako nga ang mga ansiyano naninguha lamang sa pagtabang kanako. Ang akong pagsalikway sa ilang tabang ang nagpahinabo kanako nga mapalagpot. Sa dihang gipalagpot, akong naamgohan kon unsa ka mamingawon ang kinabuhi nga wala si Jehova. Adunay dakong haw-ang sa akong kinabuhi nga dili arang mapun-an hangtod nga ako magbag-o sa akong estilo sa kinabuhi ug mobalik kang Jehova. Ang pagkapinalagpot nagpaubos kanako ug nagpakita kanako nga akong gikinahanglan si Jehova ug ang iyang organisasyon.
A. C., Canada
Pagmata! Pasayloa ninyo ako sa paghikalimot sa pagbag-o sa suskrisyon alang sa maayong magasing Pagmata! Kini maoy matulon-anon, edukasyonal, ug nagsultig kamatuoran nga magasin uban sa makapadasig ug makapapukaw nga mga hilisgotan. Gusto kong mahuptan ang daang mga gula nga akong nasayloan. Dili ko buot masayloan ang bisan usa. Salamat sa inyong malahutayong pagtabang sa pagbuntog sa kawalay-alamag.
N. S., Sri Lanka