Mga Saksi ni Jehova Nabayaw sa Gresya

SINULAT SA KORESPONSAL SA PAGMATA!

ANG Ortodoksong pari sa balangayng Gazi sa Creta mipahayag panahon sa usa sa iyang mga sermon: “Ang mga Saksi ni Jehova adunay tigomanan dinhi mismo sa atong balangay. Gikinahanglan ko ang inyong suportar aron pagpapahawa kanila.” Usa ka gabii pipila ka adlaw sa ulahi, ang mga bentana sa Kingdom Hall gibuak ug girakrakan sa wala-mailhi nga mga tawo. Sa ingon mibutho na usab ang isyu bahin sa kagawasan sa relihiyon sa Gresya.

Kadtong mga panghitaboa mitukmod sa upat sa lokal nga mga Saksi, si Kyriakos Baxevanis, Vassilis Hatzakis, Kostas Makridakis, ug Titos Manoussakis, nga mopetisyon sa Ministro sa Edukasyon ug Relihiyosong Kahikayan alang sa permiso nga makahimog relihiyosong mga tigom. Sila naglaom nga ang pagkuhag permiso sa ngadtongadto makabaton sa panalipod sa kapolisan. Ugaling lang, kana dili ingon ka sayon.

Ang pari nagpadalag sulat ngadto sa hedkuwarter sa polisya sa seguridad sa Heraklion, nga nagtumong sa pagtagad sa mga awtoridad nganha sa Kingdom Hall sa mga Saksi ni Jehova sa iyang parokya ug mihangyo nga ipahamtang ang mga restriksiyon ug idili ang ilang mga tigom. Miresulta ang usa ka imbestigasyon ug mga sukitsukit sa polisya. Ngadtongadto, gipasakaan sa piskal ug mga sumbong ang mga Saksi, ug gidala ang kaso ngadto sa hukmanan.

Niadtong Oktubre 6, 1987, gihukman sa Korte Kriminal sa Heraklion nga dili sad-an ang upat ka sinumbong, nga miingon nga “wala sila makabuhat sa butang nga giakusar kanila, kay ang mga membro sa usa ka relihiyon libre man sa paghimog mga tigom . . . , nga dili na kinahanglanon ang permiso.” Bisan pa niana, giapelar sa piskal ang desisyon duha ka adlaw sa ulahi, ug ang kaso gidala atubangan sa mas hataas nga hukmanan. Sa Pebrero 15, 1990, ang maong hukmanan nagsentensiya sa mga Saksi sa pagkapriso sa duha ka bulan ug sa multang mga $100. Busa, ang mga akusado miapelar ngadto sa Gregong Korte Suprema.

Sa Marso 19, 1991, gidismis sa Korte Suprema ang apelasyon ug gituboy ang hukom nga sad-an. Kapig duha ka tuig sa ulahi, sa Septiyembre 20, 1993, sa gipahibalo ang desisyon sa Korte Suprema, ang Kingdom Hall gisirhan sa mga polis. Sumala sa gipadayag sa usa ka dokumento sa polisya, ang Ortodoksong Iglesya sa Creta mao ang nagpaluyo sa maong buhat.

Kining kahimtanga nahitabo tungod kay ang pipila ka balaod, nga gipasa sa 1938 sa tuyo nga piotan ang relihiyosong kagawasan, balido pa sa Gresya. Kana sila nagbaod nga kon ang usa ka tawo buot nga magpahigayon sa usa ka dapit sa pagsimba, ang permiso kinahanglang makuha gikan sa Ministeryo sa Edukasyon ug Relihiyosong Kahikayan ug gikan usab sa lokal nga obispo sa Ortodoksong Iglesya. Sulod sa ubay-ubayng mga siglo, kining hupas nang mga balaod nagpahinabog daghang suliran alang sa mga Saksi ni Jehova.

Kagawasan sa Relihiyon, ug Tawhanong mga Katungod

Sa pagkahibalo nga ang ilang pagkanahukmang sad-an gituboy sa Korte Suprema, gisubmiter sa upat ka Saksi ang usa ka aplikasyon ngadto sa Uropanhong Komisyon sa Tawhanong mga Katungod, sa Strasbourg, Pransiya, niadtong Agosto 7, 1991. Ang mga aplikante miangkon nga ang ilang pagkanahukmang sad-an naglapas sa Artikulo 9 sa Uropanhong Kombensiyon, nga nanalipod sa kagawasan sa paghunahuna, konsensiya, ug relihiyon, ingon man sa katungod nga tumanon ang relihiyon sa usa nga kinaugalingon o nga may mga kauban ug sa publiko o sa pribado.

Niadtong Mayo 25, 1995, 25 ka membro sa Komisyon midangat sa nagkausang desisyon nga niadtong kasoha gilapas sa Gresya ang Artikulo 9 sa Uropanhong Kombensiyon. Ang ilang pahayag mao nga ang desisyon nga gibangian wala mauyon sa diwa sa kagawasan sa relihiyon ug dili kinaiyanhon diha sa demokratikanhong katilingban. Ang maong desisyon kon bahin sa pagkabalido sa kaso nagpahayag usab: “Ang mga aplikante . . . maoy mga membro sa usa ka organisasyon kansang relihiyosong mga rituwal ug mga tulumanon kaylap nga nailhan ug giawtorisar sa daghang nasod sa Uropa.” Sa kataposan, ang Komisyon nagpasaka sa kaso ngadto sa Uropanhong Korte sa Tawhanong mga Katungod.

Ang mga Saksi ni Jehova Dili Mapahunong

Ang husay gitakda sa Mayo 20, 1996. Dihay kapig 200 sulod sa korte, lakip ang mga estudyante ug mga propesor gikan sa lokal nga unibersidad, mga magsusulat, ug ubay-ubayng Saksi ni Jehova nga gikan sa Gresya, Alemanya, Belgium, ug Pransiya.

Si G. Phédon Vegleris, propesor emeritus sa University of Athens ug abogado sa mga Saksi, nagtuo nga ang polisa nga gigamit ug ang mga hukom nga gipakanaog sa nasodnong mga awtoridad naglapas dili lamang sa Uropanhong Kombensiyon kondili hasta sa Konstitusyon sa Gresya. “Busa nasodnong balaod ug ang pagpadapat niana ang gihisgotan sa Korte.”

Ang abogado sa Gregong gobyerno maoy usa ka huwes gikan sa Konseho sa Estado, kinsa, inay hisgotan ang tinuod nga mga hitabo, mihisgot sa baroganang gikuha sa Ortodoksong Iglesya sa Gresya, sa suod nga kalangkitan niini sa Estado ug sa katawhan, ug sa gipatuo nga panginahanglan nga pig-otan ang ubang mga relihiyon. Dugang pa, siya mipahayag nga sukad sa 1960, ang mga Saksi ni Jehova milampos sa pagpauswag pag-ayo sa ilang gidaghanon. Sa laing mga pulong, ang Ortodoksong monopoliya malamposon nga gisupak!

Relihiyosong Kagawasan Gituboy

Ang hukom gipakanaog sa Septiyembre 26. May kahinam, ilabina sa mga Saksi ni Jehova. Ang Presidente sa Kamara, si G. Rudolf Bernhardt, nagbasa sa desisyon: Ang Korte, nga gilangkoban ug siyam ka huwes, nagtuo nga nagkausa nga nalapas sa Gresya ang Artikulo 9 sa Uropanhong Kombensiyon. Gigantihan usab ang mga aplikante sa kantidad nga mga $17,000 aron makabayad sa gastos. Labing hinungdanon, ang desisyon naglakip sa daghang dalayegong mga argumento pabor sa kagawasan sa relihiyon.

Ang Korte miingon nga ang Gregong balaod nagtugot sa “layog-abot nga paghilabot sa politikanhon, administratibo ug eklesiastikanhong mga awtoridad aron gamiton ang kagawasan sa relihiyon.” Midugang kini nga ang paagi nga gibaod nga mokuhag permiso gigamit sa Estado “aron ipahamtang ang estrikto, o sa tinuoray nagdili, nga mga kondisyon aron tumanon ang relihiyosong mga tinuohan sa pipila ka dili-ortodoksong mga organisasyon, ilabina ang mga Saksi ni Jehova.” Ang mabangis nga mga taktika nga gigamit sa Ortodoksong Iglesya sulod sa daghan kaayong mga dekada giyagyag sa maong internasyonal nga korte.

Ang Korte nagpasiugda nga “ang katungod sa kagawasan sa relihiyon sumala sa gigarantiya sa Kombensiyon wala maglakip sa katungod sa bahin sa Estado nga mohukom kon angay ba ang relihiyosong mga pagtuo o ang paagi nga gigamit aron ipahayag ang maong mga pagtuo.” Nagpahayag usab kini nga “ang mga Saksi ni Jehova mohaom sa kabatbatan sa ‘iladong relihiyon’ sumala sa gikondisyon sa Gregong balaod . . . Kini giuyonan pa sa Gobyerno.”

Dili Lamang Komedya

Sa misunod nga pipila ka adlaw, kadaghanan sa dagkong Gregong mga pamantalaan nagmantala sa maong kaso. Sa Septiyembre 29, 1996, ang edisyon sa Dominggo sa Kathimerini mikomento: “Bisan pag giunsa pagsulay sa Gregong Estado nga dili tagdon kini kay kono ‘komedya lamang,’ ang ‘sagpa sa nawong’ nga nadawat niini gikan sa Uropanhong Korte sa Tawhanong mga Katungod sa Strasbourg maoy tinuod nga hitabo, usa ka hitabo nga nahitala sa tibuok kalibotan. Ang Korte nagpahinumdom sa Gresya sa Artikulo 9 sa Kombensiyon sa Tawhanong mga Katungod, ug kini nag-usa pagsaway sa Gregong pamalaod.”

Ang pamantalaan sa Atenas nga Ethnos misulat sa Septiyembre 28, 1996, nga ang Uropanhong Korte “nagsaway sa Gresya, nga nagmando nga kini mobayad sa iyang mga lungsoranon nga nakaagom sa kaalaotan sa pagkahimong mga Saksi ni Jehova.”

Usa sa mga abogado sa mga aplikante, si G. Panos Bitsaxis, giinterbiyo sa usa ka programa sa radyo ug miingon: “Nagkinabuhi kita sa tuig 1996, nga hapit na sa ika-21ng siglo, ug dayag nga nahiangay nga walay pagpihigpihig, panghasi, o panghilabot sa bahin sa administrasyon kon bahin sa paggamit sa paninugdang katungod sa kagawasan sa relihiyon. . . . Maayong higayon karon nga ang gobyerno magtuki pag-usab sa polisa niini ug mohunong niining walay-buot nga pagpihigpihig, nga wala gayoy pulos niining modernong kapanahonan.”

Ang desisyon sa kasong Manoussakis and Others v. Greece nagpatungha sa paglaom nga ang Gregong Estado magpahiuyon sa iyang pamalaod nganha sa hukom sa Uropanhong Korte, aron ang mga Saksi ni Jehova sa Gresya makapahimulos untag kagawasan sa relihiyon nga dili manghilabot ang administrasyon, kapolisan, o iglesya. Dugang pa, kini maoy ikaduhang hukom nga gipakanaog sa Uropanhong Korte batok sa Gregong hudisyaryo sa mga butang maylabot sa kagawasan sa relihiyon.a

Kaylap nailhan nga ang mga Saksi ni Jehova masinundanon sa kagamhananong “labaw nga mga awtoridad” sa tanang butang nga dili supak sa Pulong sa Diyos. (Roma 13:​1, 7) Dili gayod sila hulga sa kahusay sa katilingban. Sa kasukwahi, ang ilang mga basahon ug publikong ministeryo nagdasig sa tanan nga mahimong masinundanon-sa-balaod nga lungsoranon ug magkinabuhig malinawong kinabuhi. Sila maoy matul-id ug establisado kaayong relihiyon, ug dakog gikaamot ang ilang mga membro sa kaayohan sa ilang mga silinganan. Ang ilang pagkadesidido nga ituboy ang hataas nga mga sukdanang moral sa Bibliya ug ilang gugma sa silingan, ingong gipahayag ilabina diha sa ilang edukasyonal nga buluhaton maylabot sa Bibliya, adunay maayong epekto diha sa kapig 200 ka nasod nga ilang gipuy-an.

Gilaoman nga ang mga desisyon nga gipakanaog sa Uropanhong Korte magpatunghag mas dakong kagawasan sa relihiyon alang sa mga Saksi ni Jehova ug sa tanang ubang relihiyosong mga minoriya sa Gresya.

[Footnote]

[Hulagway sa panid 15]

Ang orihinal nga Kingdom Hall gisirhan sa mga polis niadtong Septiyembre 20, 1993

[Hulagway sa panid 15]

Ang Uropanhong Korte sa Tawhanong mga Katungod, Strasbourg

[Hulagway sa panid 16]

Mga Saksing nalangkit: Si T. Manoussakis, V. Hatzakis, K. Makridakis, K. Baxevanis