Gikan sa Among mga Magbabasa

Mga Kalainan nga Makapabahin Buot namong ipahayag ang among pasalamat sa mga serye nga “Angay Bang Mabahin Kita Tungod sa mga Kalainan?” (Hulyo 8, 1996) Kami nagtrabaho ingong bahin sa usa ka tem sa internasyonal nga mga boluntaryo dinhi sa Mexico sa halos usa na ka tuig. Bisan human sa daghang bulan, kami nagpadayon sa pagkasinati ug mga kalisod sa pagpasibo, apan kami wala makasabot kon ngano. Ang mga artikulo nagtabang kanamo sa pag-ila sa problema ingong kalibog sa kultura. Among gibutang sa kasingkasing ang mga pulong nga “ang pagsabot sa ubang mga kultura makapatugob sa atong mga kinabuhi” ug nakakaplag na ug dugang kalipay sa among asaynment.

C. H. ug J. H., Mexico

Ako natandog sa paagi nga kining talagsaong ulohan gitanyag ug giugmad. Ang mga kalainan sa pagkatinuod nakapukaw gayod ug daghang pagdumot sa tawhanong kasaysayan. Kini nga mga serye karon motabang kanako sa paglantaw sa ubang mga kultura uban ang mas dakong pagsabot. Naglaom ako nga ang tanan sa kalibotan makabasa niining mga artikuloha ug mag-usab sa ilang negatibong mga panghunahuna sa uban!

G. O., Nigeria

Ang mga artikulo nagpahilak kanako. Ako may usa ka higala nga akong gipakigsandurotan kanunay. Apan gibati ko kanunay nga may usa ka dili-makitang babag tali kanamo. Akong naamgohan karon nga kami gikan sa lahi kaayong mga kultura. Kini nga impormasyon makahimog dakong kalainan sa akong pagpakiglabot kaniya sa umaabot.

A. F., Tinipong Bansa

Samtang nagdukiduki sa akong tesis sa kolehiyo bahin sa antropolohiya, gigugol nako ang daghang semana sa usa ka nasod sa Aprika. Nakaila ko ang daghang lokal nga mga Saksi ni Jehova ug nakatambong sa ilang mga tigom. Kadto maoy makapaukyab nga kasinatian! Sumala sa giingon sa artikulo, ang pakighimamat sa ubang mga tawo sa laing kultura makapatugob. Nakahimo ako sa pag-ugmad ug bag-o ug makahuloganong mga panaghigalaay.

S. B., Italya

Habu Ako nakadayeg pag-ayo sa artikulong “Habu​—Usa ka Halas nga Angayng Dili Hilabtan.” (Hulyo 8, 1996) Gisulat kana diha sa usa ka makaiikag nga paagi, ug maanindot kaayo ang mga letratro!

E. P., Ukraine

Ang artikulo matulon-anon ug masiawon. Apan usa ka punto ang mosupak sa akong gituohan. Kamo nagkutlo sa libro nga nagrekomendar sa pagsupsop sa lala diha sa dapit sa mga pinaakan. Hilwas ba gayod kini?

C. D., Nigeria

Ang kadaghanang medikal nga mga awtoridad daw mosupak sa reperensiya nga among gikutlo sa among artikulo. Sa pagkatinuod, ang pipila ka doktor mobating ang pagsulay sa pagsupsop sa lala mahimong peligroso alang sa usa nga nagtabang ug dili kaayo makatabang sa biktimang napaakan sa halas. Ang mga doktor miuyon nga ang labing importanteng pasiunang tabang mao ang pagdala sa napaakang biktima ngadto sa ospital nga labing dali kutob sa mahimo.​—ED.

Mga UFO Salamat sa artikulong “Ang Hunahuna sa Bibliya: Mga UFO​—Mga Mensahero Gikan sa Diyos?” (Hulyo 8, 1996) Sa among lugar daghang tawo ang nagtuo sa mga taho bahin sa mga dili-yutan-on. Nga naghunahuna nga ang Bibliya wala maghisgot niining butanga, sila may pagduhaduha bahin sa Bibliya. Ang artikulo nagtabang kanamo nga makitang si Satanas ug ang mga demonyo naningkamot sa pagpahisalaag sa mga tawo ug nga dili maalamon ang pagtuo sa walay-basehanang mga taho bahin sa mga dili-yutan-on.

A. W., Taiwan

Mga Tulip Salamat sa maayo kaayong artikulo nga nag-ulohang “Ang Tulip​—Usa ka Bulak nga May Gubot nga Kagahapon.” (Hulyo 8, 1996) Akong nakaplagan ang impormasyon bahin sa sinugdanan niini ingon man sa mga sekreto sa pagtanom ug mga tulip nga labing makaiikag.

D. G., Tinipong Bansa