Nagakausab nga mga Tinamdan Nagbangon ug Bag-ong mga Pangutana
“SEKSUWAL NGA REBOLUSYON,” “seksuwal nga pagbuto,” “moral nga rebolusyon.” Kini nga mga termino nagamantala sa nagakausab nga mga tinamdan sa seksuwalidad, ilabina sa tungang bahin sa katuigang 1960 ug padayon. Daghan ang misagop sa panultihong “librelibreng gugma,” nga nagpaila sa usa ka estilo-sa-kinabuhi diin ang mga indibiduwal nagasalikway sa kaminyoon ug sa pagkaulay.
Ang pahayag sa awtor nga si Ernest Hemingway, “Ang butang moral maoy butang nga maayo ang imong pamati human niana, ug ang butang imoral maoy butang nga dili-maayo ang imong pamati human niana,” maoy haom kaayong pagkapadayag sa tinamdan sa mga tawong nalamat sa mga pagdahom sa seksuwal nga kagawasan ug katagbawan. Ang pagdawat niini nga pilosopiya nagpakamatarong sa tiawtiaw nga seksuwal nga mga relasyon uban sa lainlaing mga paris nga pinaagi kanila gidiskobre sa mga indibiduwal, lalaki ug babaye, ang ilang kaugalingong seksuwalidad. Ang seksuwal nga “katagbawan” walay giilang utlanan. Ang kontraseptibo nga pildoras, nga gipailaila sa mao gihapong katuigan, nakapasamot sa walay-pugong nga seksuwal nga pag-eksperimento.
Hinunoa, ang AIDS ug ubang mga sakit nga napasa sa pagpakigsekso nahimong kabilin niining mahilayong estilo-sa-kinabuhi. Ang seksuwal nga mga tinamdan sa haluag nga kaliwatan nauyog. Sa pipila ka tuig sa miagi, gipakita sa magasing Time ang ulohang “Sekso sa Katuigang 1980—Ang Rebolusyon Human Na.” Kining maong pahayag gipasikad ilabina sa pagdagsang sa mga sakit nga napasa sa pagpakigsekso nga nagaapektar sa daghang Amerikano. Sa pagkakaron, ang gidaghanon sa mga kaso sa AIDS sa tibuok kalibotan miabot sa makalilisang nga mga 30 milyones!
Ang kahadlok sa mga sakit nga napasa sa pagpakigsekso nakatukmod sa dugang pagliso sa tinamdan sa daghan labot sa tiawtiaw nga seksuwal nga mga relasyon. Ang 1992 nga isyu sa US, usa ka magasin sa kalingawan, nga nagtaho bahin sa usa ka surbi sa kagamhanan, nag-ingon: “Mga 6.8 milyong walay-banang mga babaye nagbag-o sa ilang seksuwal nga panggawi agig pagsanong sa AIDS ug ubang sakit nga napasa sa pagpakigsekso.” Sumala sa artikulo, ang mensahe maoy tin-aw: “Ang sekso maoy usa ka seryosong butang. Pakigbahin sa imong kaugalingong kapeligrohan.”
Sa unsang paagi kining magubot nga mga dekada nakaapekto sa mga tinamdan bahin sa seksuwal nga mga relasyon? May mga leksiyon ba nga makat-onan gikan sa walay panaganang pagpatuyang nga maoy timaan sa librelibreng gugma niining dili pa dugayng mga dekada ug sa makasubong mga kamatuoran sa mga sakit nga napasa sa pagpakigsekso sa katuigang 1980? Ang pagpailaila ba sa edukasyon sa sekso diha sa publikong mga tunghaan nakatabang sa batan-ong mga lalaki ug babaye sa malamposong pagsagubang sa ilang seksuwalidad? Unsay labing maayong paagi sa pag-atubang sa hagit sa nagkausab karon nga mga tinamdan sa seksuwalidad?