Sa Dihang ang Tibuok Kalibotan Mahimong Usa ka Dangpanan
GUSTO ba nimong makita ang labing makahahadlok nga mananap sa kalibotan? Nan tan-aw diha sa salamin! Oo, kita, nga katawhan, ang labing daotang tigdaot sa yuta! Magpinatyanay gani kita nga tinagdaghan.
Aron ang yuta mahimong luwas alang sa ihalas nga kalalangan, bisan diha sa mga zoo—ilabina kon kini mahimong kataposang dangpanan—ang gubat, ang hampak sa katawhan, kinahanglang wad-on. Sa 12,000 ka mananap sa Berlin Zoo, 91 lamang ang nahibiling buhi panahon sa Gubat sa Kalibotan II. Ang daghang ubang mga zoo samang nag-antos. Sa dili pa dugayng gubat sa mga dapit sa Balkan, giebakwet sa maisog nga mga trabahante sa zoo ang daghang mananap sa luwas nga dapit; apan ang ginatos pang uban, lakip sa mga usa, mga iring nga dagko, mga oso, ug mga lobo, nangamatay. Dili pa dugay, sa kalasangan sa Cambodia, sumala sa mga opisyal nga gikutlo sa mantalaang The Australian, gipatay ug tuyo sa Khmer Rouge ang daghang talagsaong mga mananap. Ngano? Aron ang mga panit niini ug ubang mga produkto ibaylo ug mga armas!
Ang bandalismo sa ekolohiya, sama nianang gihimo sa hilit nga mga Isla sa Peron, sa habagatang-kasadpan sa Darwin, Australia, maoy laing daotan nga kinahanglang pagabuntogon aron maluwas ang mga mananap—sa sulod o sa gawas sa mga zoo. Duha ka beses sulod sa tulo ka tuig, ang itloganan sa mga pelican niining mga islaha gisunog, dayag nga ang katuyoan lamang mao ang pagpatay, sa labing mabangis nga paagi, sa libolibong mga kuyabog.
Ugaling, sa mga dekadang dili pa dugay, ang dakong kapildihan sa mga espisye dili maoy tungod sa tinuyong pagpangdaot; kini mao ang mangil-ad nga epekto sa nagsulbong nga populasyon sa tawo nga dako kaayog panginahanglag luna nga kapuy-an ug yuta nga pagatikaron. Tungod niining padayong pagsugok diha sa mga pinuy-anan sa mga mananap ug sa nagauban nga polusyon, ang The World Zoo Conservation Strategy nagpasidaan: “Ang palaaboton sa ika-21ng siglo alang sa tibuok natural nga sistema sa yuta mangiob. Wala gayoy timaan nga ang kalaglagan nga nagakahitabo halos sa tanang bahin sa kalibotan mohunong sa dili madugay.”
Tungod sa nagdakong kabalaka bahin sa umaabot sa yuta, ang panahon sa dihang ang tibuok planeta mahimong usa ka dangpanan daw sobra ra ka katingalahang pamation. Bisan pa, kana nga paglaom bug-os nga natukod, dili sa mga tawong mubog-abot ug panan-aw—kinsa sa dili pa kaayo dugayng 50 ka tuig sa miagi, sumala sa usa ka magsusulat sa siyensiya, walay ideya sa presenteng pagkalaglag sa ekolohiya—kondili sa usa nga nakakita nang daan niana, si Jehova nga Diyos. Kapin sa napulog-siyam ka gatos ka tuig kanhi, siya nagtagna nga ang katawhan, sa atong panahon, maabtan sa akto nga “nagagun-ob sa yuta.” (Pinadayag 11:18) Gisulti sa dihang diyutay pa ang tawo nga nagpuyo sa yuta, kadto nga tagna daw samag handurawan lamang sa kadaghanang buhi niadtong panahona, apan napamatud-an gayod kini nga tinuod!
Sa kabaliskaran, kining pagdaot nagakahitabo sa panahon sa dihang ang siyensiya ug teknolohiya daw halos may katakos sa paghimog mga milagro: gagming nga mga transmiter ug mga satelayt nga padayong nagsubay sa nameligrong mga espisye, pagkalaglag sa tropikal nga mga lasang ginasukod por kuwadrado metro gikan sa wanang, ug ang polusyon sa hangin ginasukod sa ginagmay kaayong mga bahin matag milyon. Apan, sa talagsaong mga eksepsiyon, ang tawo daw walay katakos sa paglihok niining hilabihan ka daghang impormasyon. Tingali ang tawo sama ra sa usa ka drayber sa nagdagang tren nga walay preno. Siya adunay panel nga puno sa modernong elektronikong mga instrumento ug mga gamit nga nagaaninaw nga nagpahibalo kaniya sa tanang butang nga nagakahitabo, apan dili siya makapahunong sa tren!
Nganong Nangapakyas ang mga Paningkamot?
Hunahunaa nga diha sa usa ka dakong pabrika, ang mapahitas-on, walay-prinsipyong manedyer nakadungog sa tag-iya nga nag-ingon nga siya dili hatagag taastaas nga puwesto apan papahawaon hinuon siya sa pipila ka bulan. Nasuko ug gustong manimalos, iyang gigamit ang pagpamakak, paghiphip, ug tanang matang sa panglimbong aron pahimoon ug kagubot ang daghang trabahante. Ilang gipahinabo nga madaot ang mga makina, mohinay ang produksiyon, ug madaot ang mga produkto—apan sa inabtik kaayo nga paagi aron dili mapasanginlan. Kasamtangan, ang matinud-anong mga empleyado, nga nahibalo sa nagakahitabo, naningkamot sa pag-ayo sa nangaguba; apan sa dugang nilang pagpaningkamot, misamot ka grabe ang mga butang.
Kining daotang “manedyer” sa kalibotan may samang laraw batok sa katawhan ug sa yuta. Apan niining higayona dili angay nga magpabilin kitang “walay-alamag sa iyang mga laraw,” kay ang Bibliya naglaksi sa iyang tabon ug nabutyag ang usa ka nasukong espiritu nga linalang—si Satanas nga Yawa—usa ka manulonda nga nadaot ang utok kinsa nagtuo nga makagagahom siya sa tanan ug nagtinguha nga pagasimbahon. (2 Corinto 2:11; 4:4) Gitambog siya sa Diyos gikan sa Iyang pamilya sa langit ug gihukman siya ngadto sa kalaglagan.—Genesis 3:15; Roma 16:20.
Sama sa daotang manedyer sa pabrika, kining “amahan sa bakak” nagagamit usab ug daghang malipotong mga paagi sa pagpahungaw sa iyang kasuko. Siya nagdumot kang Jehova nga Diyos ug buot nga daoton ang Iyang kalalangan. (Juan 8:44) Ang labing gamhanang mga hinagiban ni Satanas mao ang bakak nga propaganda, kahakog, materyalismo, ug makadaot nga relihiyosong mga pagtulon-an. Pinaagi niini siya ‘nakapahisalaag sa tibuok gipuy-ang yuta’ ug naghimo sa mga tawo—ang tigbantay unta sa yuta—nga mao ang labing mabangis nga mga tigdaot niini, sa ingon, mga tinun-an sa karaang Nimrod, “usa ka kusgang mangangayam nga nagabatok kang Jehova.”—Pinadayag 12:9, 12; Genesis 1:28; 10:9.
Ang Bugtong Tinuod nga Paglaom Alang sa Usa ka Yutan-ong Dangpanan
Ugaling, ang kadaogan batok sa tawhanon ug labaw-tawhanong mga puwersa nga maoy hinungdan sa pagkapuo dili imposibleng makab-ot. Ang labawng makagagahom nga Maglalalang sa tanang buhing mga butang makahaw-as kanato gikan niining makalilisang nga lilo, ug kini iyang gisaad nga pagahimoon pinaagi sa iyang langitnong kagamhanan. Siya nagsaad sa paglaglag niadtong mga tigdaot kinsa nagalaglag sa yuta. Kita nagaampo alang niini sa dihang kita moingon: “Umanhi ang imong gingharian. Matuman ang imong pagbuot dinhi sa yuta, maingon man usab sa langit.”—Mateo 6:9, 10, King James Version; Pinadayag 11:18.
Nakamatikod ka ba nga ang pag-abot sa Gingharian gilangkit sa pagkatuman sa kabubut-on sa Diyos dinhi sa yuta? Tungod kini kay ang Gingharian sa Diyos maoy kagamhanan sa Diyos ibabaw sa yuta. Ug sanglit usa ka gingharian, kini adunay hari—si Jesu-Kristo, ang “Hari sa mga hari ug Ginoo sa mga ginoo.” (Pinadayag 19:16) Kini usab adunay mga sakop. Sa pagkamatuod, si Jesus nag-ingon: “Malipayon ang mga malumog-buot, sanglit magapanunod sila sa yuta.” (Mateo 5:5) Oo, kining mga malumog-buot mao ang yutan-ong mga sakop niini, ug uban sa tabang sa Gingharian sa Diyos, mahigugmaon nilang atimanon ang ilang panulondon, himoon kini nga usa ka mausbawong paraiso nga puno sa kinabuhi. Makaiikag, ang Strategy nag-ingon: “Ang umaabot sa mga tawo ug sa kinaiyahan maseguro lamang kon ang tibuok nga katawhan magkinabuhi diha sa usa ka bag-ong panaghiusa uban sa kinaiyahan.”
Ang kasaysayan ug ang di-hingpit nga tawhanong kinaiyahan nagpakita nga imposible gayod nga ang “tibuok nga katawhan” karon mahimong magkinabuhi sa ingon niana nga “bag-ong panaghiusa” uban sa kinaiyahan, tungod kay gisalikway nila si Jehova. Ngani, ang pagpamatuod sa kakawangan sa kaugalingong-pagmando sa tawo mao ang usa ka katarongan kon nganong gitugotan sa Diyos kining kalibotana nga magpadayon sa dugay na kaayong higayon. Apan sa dili madugay, kadtong nagapangandoy sa pagmando ni Kristo makatagamtam ug tugob nga pakigdait. Gipamatud-an kini sa Isaias 11:9, ug kini nagpunting usab sa katarongan kon nganong kini lamang sila ang makahimo sa pagkinabuhi diha sa “bag-ong panaghiusa” uban sa kinaiyahan: “Dili nila pagadaoton ni pagagub-on ang tanan kong bukid nga balaan; tungod kay ang yuta pagapun-on gayod sa kahibalo ni Jehova sama sa mga tubig nga nagatabon sa mismong dagat.” Oo, ang diyosnong edukasyon mao ang yawi. Ug dili ba kana makataronganon, kay kinsa pa bay lain kondili ang Awtor sa kinaiyahan ang nakabaton sa mao nga kaalam?
Komosta kadtong kinsa magpadayon sa pagsalikway kang Jehova? “Mahitungod sa daotan, sila pagaputlon gikan sa mismong yuta,” nag-ingon ang Proverbio 2:22. Oo, ang ilang pagkagahig-ulo o ang ilang pagkawalay-pagtagad makakalas kanila sa ilang mga kinabuhi diha sa duol nang nagsingabot nga “dakong kasakitan”—ang paagi sa Diyos sa pagpakanaog sa hustisya ngadto sa tanan nga magpadayon sa mahakogong pagpahimulos ug pagdaot sa iyang kalalangan.—Pinadayag 7:14; 11:18.
Buot ka bang makigbahin sa programa sa pagbag-o-pag-usab sa yuta? Nan palihog sayra kon unsay gikinahanglan sa Diyos kanimo pinaagi sa pagtuon sa Bibliya. Kini lamang ang adunay gahom sa pagpahiangay sa imong panghunahuna uban sa Maglalalang. (2 Timoteo 3:16; Hebreohanon 4:12) Dugang pa, pinaagi sa pagpadapat sa imong nakat-onan, dili lamang nga mahimo kang mas maayong lungsoranon karon kondili imong pamatud-an usab nga ikaw gayod ang matang sa tawo nga pagapiyalan ni Jehova sa iyang duol nang nagsingabot nga “bag-ong yuta.”—2 Pedro 3:13.
Ang mga magmamantala niining magasina o ang kinadul-ang kongregasyon sa mga Saksi ni Jehova malipay sa pagtabang kanimo sa pagbaton ug libreng pagtuon sa Bibliya sa balay o dugang literatura sa pagpatin-aw niining mga butanga kon buot mo.