Gikan sa Among mga Magbabasa
Radyo Salamat kaayo sa maayong pagkasulat nga artikulong “Radyo—Usa ka Imbento nga Nag-usob sa Kalibotan.” (Oktubre 8, 1996) Ako 18 anyos, ug ako gustong mamati kanunayg radyo. Akong nakita ang paghisgot bahin sa kaugmaran sa radyo nga makaiikag kaayo. Ilabinang makaiikag ang pagkasayod nga sa miagi ang mga Saksi ni Jehova migamit ug radyo sa pagpakaylap sa maayong balita sa Gingharian.
F. B., Italya
Mga Alibangbang Nag-inusara akong nagsangyaw sa usa ka umahan ug midesisyon sa pagpasiugda sa artikulong “Mahuyang Apan Anad nga Biyahedor.” (Oktubre 8, 1996) Nakahibalag akog mag-uuma, dako kaayo siya nga tawo—dili ang matang sa tawo nga normal nga pakigsultihan nako bahin sa mga alibangbang! Apan, human nga nakita niya ang maanindot nga mga larawan, iyang gikuha ang magasin ug miingon nga daghang talagsaong mga espisye sa mga alibangbang ang makita sa iyang uma. Sa dihang milakaw ako, nalinga kaayo ang iyang asawa sa pagbasa sa magasin. Busa, sama sa alibangbang, ako mobalik—ug pakitaan sila ug dugang pa bahin sa Gingharian sa Diyos!
B. B., Inglaterra
Usa kini sa labing makalingawng mga artikulo nga akong nabasa. Sa pipila lang ka adlaw human miabot ang magasin, akong namatikdan nga ang among mga punoan sa kahoy napuno sa mga monarch! Gipasalamatan ko ang Diyos alang sa iyang katingalahang kalalangan.
S. M., Tinipong Bansa
Pagkadaotan Gitugotan Salamat kaninyo alang sa artikulong “Mga Batan-on Nangutana . . . Nganong Gitugotan sa Diyos nga Mahitabo ang Daotang mga Butang?” (Oktubre 22, 1996) Human nag-antos sa kamingaw, kaulawan, ug grabeng kaguol sa 18 ka tuig sa kaminyoon sa usa ka maluibong bana nga walay pagtahod sa mga babaye, ang pagkabasa nga si Jehova maoy usa ka mahigugmaong Diyos nga nahingawa kanato nahisama sa usa ka makaayong balsamo. Morag si Jehova mismo ang naglipay kanako.
H. T., Tinipong Bansa
Sigarilyo Buot kong mokomento bahin sa artikulong “Sigarilyo—Ginadumilian ba Nimo Kini?” (Oktubre 22, 1996) Pagkaalaot nga wala nako kini mabatoni sa mga katuigang nanglabay! Ang akong bana namatay sa kanser sa baga karong tuiga. Hinabako kaayo siya sulod sa 50 ka tuig. Ako mismo wala mahibalo nga ang mga sigarilyo adunay ingon niana ka malaglagong epekto.
H. G., Alemanya
Akee Ang inyong artikulong “Akee—Nasodnong Pagkaon sa Jamaica” (Oktubre 22, 1996) maayo kaayo. Ingong lumad sa Jamaica, wala gayod ako makadalit ug akee kang bisan kinsa nga moingon nga wala sila lamii niana. Gidasig ko ang tanan nga moadto sa Jamaica sa pagtilaw sa akee!
E. B., Tinipong Bansa
Pagkamaayong makakita ug laing diskusyon bahin sa mga binuhat sa atong Maglalalang! Daghan kaayong kahoyng akee dinhi sa Ghana ug nagsilbing silonganan sa pipila ka lungsod ug mga baryo. Sa lasang, sila motaas kaayo. Ang mga kuwaknit, mga periko, ug ubang mga langgam mamatog sa ilang mga sanga. Ang kahoyng akee maoy laing kahibulongang gasa gikan sa Diyos.
P. A. E., Ghana
Mga Kabayo Kinahanglang mosulat ako sa pagpahayag sa akong apresasyon sa artikulong “Ilang Ginatikad Gihapon ang Yuta Pinaagig mga Kabayo.” (Oktubre 22, 1996) Mahigugmaon ako ug mananap, ug may nakapukaw niini sulod sa akong kasingkasing. Nakaangay ako sa paagi sa inyong pagpresentar sa relasyon nga maangkon sa tawo uban sa mga mananap, ilabina ang bahin sa kalipay sa “pagpakig-estorya” sa imong mga kabayo.
V. H., Tinipong Bansa
Sa akong tibuok nga kinabuhi ako nagpuyo sa siyudad, ug ang akong pangandoy nga masuod sa mga kalalangan ni Jehova pagatagbawon pa sa umaabot. Pinaagi sa pagbasa sa inyong artikulo, ako makatrabaho uban sa mga kabayo diha sa akong handurawan. Salamat kaayo sa maong makalingawng mga artikulo.
L. A. D., Tinipong Bansa