Gikan sa Among mga Magbabasa

Mga Bihag Binilanggo ako nga may duha pa ka tuig nga nahibilin sa akong sentensiya. Kaduha nako basaha ang artikulo nga “Mga Bihag Kami Panahon sa Usa ka Pag-alsa sa Prisohan.” (Nobyembre 8, 1996) Matag higayon, ako mohilak sa kalipay ug matuk-an ako. Kanunay akong nagpaabot sa mga duaw sa mga Saksi ni Jehova niining bilanggoana. Sila makapalagsik pag-ayo!

J. K., Tinipong Bansa

Sukad wala ako mosulat kaninyo bahin sa usa ka artikulo kaniadto, apan ang artikulo bahin sa mga bihag makapalig-on pag-ayo sa pagtuo. Naghatag kini kanako ug nabag-ong pasalig nga si Jehova nagapalig-on gayod sa iyang katawhan sa dihang sila anaa sa kagul-anan.

K. D., Tinipong Bansa

Giya Gikalipay ko gayod ang artikulo nga “Ang Hunahuna sa Bibliya: Kansang Giya ang Imong Kasaligan?” (Nobyembre 8, 1996) Kadto makapahupay ug makapadasig kaayo kanako. Sama sa daghan pang uban, grabe kaayo ang akong kahiubos sa miagi sa dihang kadtong akong gisaligan sa paggiya nagpakyas kanako. Ang ilustrasyon sa usa ka bata nga nangupot sa kamot sa iyang amahan nakapahilak kanako. Pagkamakapadasig ang pagkasayod nga sa Isaias 41:​13, si Jehova nag-ingon nga iyang ‘kuptan ang kamot’ sa iyang katawhan.

M. S., Tinipong Bansa

Ako 17 anyos ug may daghan kaayong suliran dili pa dugay. Usa ka higala nagsulti kanako nga moampo ug mobasag basahong espirituwal. Human mabasa ang artikulo nga “Kansang Giya ang Imong Kasaligan?” mihukom ako nga dili mamuhi sa paglaom apan mangupot pag-ayo sa kamot sa akong langitnong Amahan!

C. G., Tinipong Bansa

Senyas nga Pinulongan Daghang salamat sa artikulo nga “Aron Makapakigsulti sa Akong Anak, Ako Nagtuon ug Laing Pinulongan.” (Nobyembre 8, 1996) Nag-inusara ako nga inahan nga adunay bungol nga anak lalaki nga 24 anyos na karon. Busa pinasukad sa personal nga kasinatian akong nasabtan ang naagian ni Cindy Adams, ug dako ang akong pagtahod sa iyang nalampos.

H. B., Alemanya

Ang artikulo nagtukmod kanako nga mosugod pagkat-on sa senyas nga pinulongan aron ikapaambit ko ang mensahe sa Bibliya sa mga bungol ug usab makapakigsulti sa mga igsoon sa kongregasyon nga may kakulian sa pangdungog.

B. L., Venezuela

Akong gitun-ag Bibliya ang usa ka bungol nga tin-edyer nga babaye. Daghan kamig nakat-onan sa usag usa, bisan pa sa kamatuoran nga kaming duha aduna lamay paninugdang kahibalo sa senyas nga pinulongan. Ang pagbasa sa determinasyon ni Cindy Adams sa pagtuon ug senyas nga pinulongan tungod ug alang sa iyang anak nga lalaki nagdasig kanako sa pagpauswag sa akong mga katakos niining matahom nga pinulongan aron akong ikapaambit ang maayong balita sa Bibliya ngadto sa bungol nga mga tawo sa akong komunidad.

S. T., St. Martin, Netherlands Antilles

Ako usab adunay anak nga may kakulian sa pangdungog, ug among gipili ang binaba nga paagi sa pagpakigsulti. Kining paagiha nagtumong sa pag-ugmad sa paglitok ug pagbasa sa ngabil. Kini napamatud-ang maayong pagpili alang sa akong anak nga lalaki. Sa sinugdan diyutay rag kaayohan ang iyang nakuha sa mga tigom sa kongregasyon. Apan karon masundan na niya pag-ayo samtang ako ug ang uban maghubad nga binaba alang kaniya. Mohatag siyag pakigpulong sa Tunghaan sa Teokratikanhong Ministeryo ug usa na ka di-bawtismadong magmamantala. Nagbunga ang daghang tuig sa paghago. Ang among kasinatian nagpakita nga bisan hain sa American Sign Language o sa binaba nga paagi mahimong makaayo basta ang mga ginikanan ug ang lokal nga kongregasyon maningkamot sa pagdasig sa bata ug makigsulti kaniya.

M. T., Tinipong Bansa