Usa ka Tibuok-Kalibotang Solusyon—Posible Ba?

ANG mga eksperto nagkauyon nga ang tesis (TB) maoy tibuok-kalibotang problema nga nagkinahanglag tibuok-kalibotang solusyon. Walay nasod ang makakontrolar sa TB nga mag-inusara, sanglit minilyong tawo nagtaboktabok sa mga utlanan matag semana.

Daghan ang nagtuo nga ang pagtinabangay sa mga nasod nagkinahanglan nga ang sapiang mga nasod motabang sa kabos nga mga nasod, nga maoy giigog dako sa TB. Sumala sa giingon ni Dr. Arata Kochi, “alang sa kaayohan sa sapiang mga nasod ang pagtabang sa dili-kaayo ugmad nga mga nasod aron sa pagpakig-away sa tesis, sa dili pa mahimong panggubatan ang ilang kaugalingong mga nasod.”

Apan ang sapiang mga nasod, napuno sa ilang giisip nga mas dinaliang butang nga angay unahon ug mga problema, wala molihok sa pagtabang. Kasagarang pasagdan sa ubang kabos nga mga nasod mismo ang pag-atiman sa panglawas, nga nagbubo sa kuwarta ngadto hinuon sa ilang mga hinagiban. Sa tungatunga sa 1996, 10 porsiyento lamang sa pasyenteng may TB sa kalibotan ang gitambalan pinaagi sa teknik sa DOTS, diyutay kaayo sa pagsanta sa epidemya sa paggrabe.

Ang WHO nag-ingon: “Ang kahibalo ug dili-mahal nga mga medisina sa pagtambal sa TB daghan nang dekadang mabatonan. Ang gikinahanglan sa kalibotan karon mao ang kusog nga paningkamot sa mga tawong may gahom, impluwensiya ug kaluoy sa pagtino nga kining mga medisinaha epektibong gamiton sa tibuok kalibotan.”

Ang Pagbuntog sa Umaabot

Makalantaw ba kita nga masaligon sa mga tawong may gahom ug impluwensiya sa pagsulbad sa problema? Ang dinasig nga salmista sa Bibliya nagsulat: “Ayaw pag-ibutang ang imong pagsalig sa mga prinsipe, ni sa mga anak sa tawo, nga kaniya walay kaluwasan.” Nan, kang kinsa kita makasalig? Ang kasulatan dugang nag-ingon: “Malipayon ang usa nga anaa kaniya ang Diyos ni Jacob alang sa iyang panabang, kansang paglaom anaa kang Jehova nga iyang Diyos, ang Magbubuhat sa langit ug yuta, sa dagat, ug sa tanan nga anaa niana.”​—Salmo 146:3, 5, 6.

Ingong Tigdisenyo ug Maglalalang sa yuta, si Jehova nga Diyos adunay gahom ug kaalam sa pagtapos sa sakit. Siya ba may kaluoy? Pinaagi sa iyang manalagna, si Jehova nagsaad: “Ipakita ko ang akong kaluoy diha [sa akong katawhan], sama sa usa ka tawo nga nagpakitag kaluoy sa iyang mga anak nga nag-alagad kaniya.”​—Malaquias 3:17.

Ang kataposang kapitulo sa Bibliya nagbatbat sa usa ka panan-awon nga gihatag ngadto kang apostol Juan. Siya nakakita ug “mga kahoy sa kinabuhi nga nagapatungha ug napulog-duha ka abot nga bunga, nga nagahatag sa ilang mga bunga matag bulan.” Kining simbolikong mga kahoy ug ang bunga nga ilang ihatag naglarawan sa mga tagana sa Diyos nga magpaarang sa mga tawong masinugtanon nga mahimong mabuhi sa walay kataposan dinhi sa yuta.​—Pinadayag 22:2.

Nagpadayon, si Juan nagsulat: “Ang mga dahon sa mga kahoy maoy alang sa pag-ayo sa kanasoran.” Ang simbolikong mga dahon naglarawan sa mga panalangin gikan sa Diyos nga mosangpot sa pagkaayo sa katawhan, sa espirituwal ug pisikal. Busa, kita makatino nga sa matarong nga bag-ong kalibotan ilalom sa pagmando sa Diyos, ang TB mabuntog sa bug-os ug sa walay kataposan.​—Pinadayag 21:3, 4.

[Hulagway sa panid 8, 9]

Ang Diyos nagsaad ug dumalayong pagkaayo sa katawhan