Estrok!

USA ka pangunang hinungdan sa kamatayon ug dugay nga pagkainutil sa industriyalisadong kalibotan sa Kasadpan mao ang estrok. Ang pulong mismong “estrok” nagpasabot sa kakalit sa pagkahitabo sa “atake sa utok.” Sa usa ka gutlo, basin maayo ang imong pamati sa lawas, ug sa sunod gutlo, mobati kang morag naigo ka sa liti​—ang grabeng estrok sa hinanali ug sa dakong paagi makapausob sa imong kinabuhi. Nga sa mapintason grabeng magdaot ug magpainutil kanimo, kini basin maghimo kanimong di-makasulti, mogun-ob sa imong mga emosyon, magpausob sa imong personalidad ug sa mga katakos sa pag-ila ug panghukom, ug magpahamtang kanimo sa morag way-kataposang pakigbisog aron mapasig-uli ang normal nga pagkinabuhing nasinati nimo ug sa imong pamilya sa nangagi.

Tagda si Ellen Morgan.a Sa Miyerkoles, si Ellen maoy mahimsog, aktibong 64-anyos. Sa Huwebes, samtang namalit uban sa iyang bana, si Ellen kalit nawad-ag katakos sa pagsulti, ug ang iyang nawong nahiwi. Ang iyang lawas naluya, ug siya nagsusapinday nga daw hubog. Naagoman ni Ellen ang seryosong estrok!

Ingong resulta sa estrok, si Ellen nainutil pag-ayo nga siya dili makabuhat sa labing yanong mga butang, sama sa pagkaligo o pag-ilis sa iyang kaugalingon. Kay dili makahimo sa pagsulat, pagniting, o pagtahi, nag-antos siya sa mga atake sa di-kapugngang mga paghilak ug labihang kakapoy. Sa tibuok panahon, ang mga proseso sa panghunahuna ni Ellen wala madaot; ugaling lang, ang mga pagbati sa kaulaw motungha sa dihang bation niyang ang uban tingali nag-isip kaniyang kulangkulang. Sa ulahi, si Ellen mipatin-aw: “Pipila ray nakaamgo sa pagkadako sa epekto sa kakurat sa maong kalit nga kausaban diha sa emosyon ug sa pangisip sa usa. Halos gibati ko nga kadto na ang kataposan sa akong kinabuhi ingong usa ka tawo.”

Unsay magpahinabo sa estrok? Ang tanang naestrok maapektahan ba sa samang paagi? Giunsa pagsagubang sa mga nakaagi ang maong sakit? Sa unsang paagi nakasagubang ang mga pamilya sa mga nakaagig estrok? Unsay mahimo natong tanan aron itagana ang pagpaluyo? Gituki sa Pagmata! ang maong mga pangutana ug gipaamgo kaninyo ang mga kinabuhi sa mga nakaagig estrok ug ilang mga pamilya nga nakig-ambit sa ilang pakigbisog.

[Footnote]