Kon Nganong Daghan ang Dili Magpaabonog Dugo
SA GITAWAG nga usa ka talagsaong desisyon, usa ka korte sa Ontario mihukom nga ang Canadian Red Cross maoy manubag sa HIV nga impeksiyon sa duha ka giabonohan ug dugo—silang duha nakadawat ug gitakboyang dugo gikan sa samang tigdonar. “Sa dihang ang butang nga malaglagon nga sama sa pagpameligro sa nahugawang dugo sa mga kinabuhi sa mga giabonohan,” matod ni Huwes Stephen Borins, “ang dinaliang sanong gikinahanglan.”
Sulod sa katuigang 1980, mga 1,200 ka Canadiano natakboyan ug HIV, ug ang dugang 12,000 nakakuhag hepatitis C—tanan gikan sa nahugawang dugo ug mga produkto sa dugo. Sa pagtabang nga makunhoran ang gidaghanon sa mga impeksiyon, ang mga tigdonar ginasusi nga labi pang maampingon. Apan dili tanang tigdonar ang matinud-anon bahin sa ilang kaagi sa pagpakigsekso. Pananglitan, usa ka surbi sa Tinipong Bansa nagpadayag nga 1 sa 50 ka tigdonar wala magtaho sa mga hinungdan sa risgo, sama sa buhat nga homoseksuwal o pakigsekso uban sa usa ka pampam.
Nakadugang sa suliran mao ang kamatuorang ang pagsusi sa dugo dili ingong dili masayop. Sumala sa magasing New Scientist, “kon ang usa ka tawo mohatag ug dugo nga walay tulo ka semana human hitakboyi sa HIV, ang mga pagsusi sa maong panahon dili makatiktik sa mga kagaw. Alang sa hepatitis C, kining yugtoa mahimong molungtad ug kapin sa duha ka bulan.”
Sa katuigang bag-o pa, may dakong pag-us-os sa gidaghanon sa mga Canadiano nga andam mohatag—o modawat—ug dugo. Ang kolumnistang si Paul Schratz misulat: “Tungod sa pagmenos sa interes nga modonar, ug pagtubo sa gidaghanon nga dili makadonar, salamat sa Diyos nga ang mga Saksi ni Jehova maoy nanguna sa pagdukiduki sa mga kapuli sa dugo.”
Makaiikag, ang The Toronto Star nagtaho nga sulod sa usa ka bag-o pang tuig, mga 40 ka tawo “misulod sa Canadianhong mga ospital nga nangangkong binakak nga mga Saksi ni Jehova tungod kay dili nila gusto ang mga abono sa dugo.” Ang mga surbi nagpailang duolag 90 porsiyento sa mga Canadiano mopalabi sa kapuli inay sa gidonar nga dugo. Busa, ang pag-abono ug dugo dili na usa ka relihiyosong isyu lamang.