Pagsuhid sa Karaang Katahom sa Kahoy

Sinulat sa koresponsal sa “Pagmata!” sa New Zealand

ANG kahoy, ilabina kanang lumad nga mga klase, kusog nga nagkanihit. Ang mga lasang nagakahanaw sa makapakulbang gikusgon sa daghang bahin sa kalibotan. Ang kakulang sa mga abiyo sa linaras miresulta sa mahal kaayong mga presyo sa kahoy, usa sa panguna ug kanhi abundang manggad sa kalibotan.

Dili katuohan nga dinhi sa New Zealand, dunay malamboong mga plantasyon sa pino nga radiata, nga gipailaila sa mga tuig 1930, apan ang grupo sa lumad nga mga kahoy, sama sa rimu, kauri, beech, ug kahikatea, nagkahurot.

Ang Walay Kinutobang Pangdani sa Solidong Kahoy

Sulod sa linibong katuigan, ang tawo nagpahimulos sa pagporma sa kahoy ngadto sa tanang matang sa mapuslanong mga butang. Ang bulok, talagsaong grano, ug bisan ang baho nga gipatungha sa kadaghanang mga tipo sa kahoy kasagarang nakapalipay sa mga tawo. Ang mga butang nga may nagkadaiyang kapuslanan nakapatagbaw sa daghang tuig ug, sa pipila ka kahimtang, sa daghang siglo.

Gikan pa sa unang mga panahon, ang muwebles nga solidong kahoy gigamit diha sa mga puloy-anan. Nga naggamit ug yanong mga himan, ang mga lalaki ug babaye nagpasundayag ug katakos ug kahanas sa paggama sa pangunang mga gamit sama sa mga lamesa, panaksan, tungtonganan, baril, kaban, ug mga lingkoranan.

Ang modernong teknolohiya nagpatulin sa gikusgon sa paggama sa maong mga butang karong adlawa. Ang de-koryenteng mga himan, sama sa mga gabas, barina, sepilya, ug mga liha, makahimo nga episyente, bisan kon saba, sa paggama sa linaras nga mahimong solidong kahoy nga muwebles. Ang kadaghanang nasod makapasigarbog mga pabrika sa kahoy nga de-makinang makapatungha ug dinaghang muwebles sa makataronganong mga presyo.

Apan ang maong muwebles sagad dili molahutay tungod kaha sa (1) mga kapuli (bener, chipboard) nga maoy giilis sa solidong kahoy o (2) mga teknik sa pagpilit nga nag-agad sa paspas nga pagbuhat, nga naggamit sa mga de-makinang panglansang o suylas o mga lansang.

Paggamit Pag-usab sa Aswela

Agig pagsulay pagbuntog sa daw kakulang sa modernong teknolohiya, ang uban nangita sa mga kalaki sa karaang himan sa paggama sa kahoy​—ang aswela. Gihubit kini ingong “pangputol nga himan nga may nipis binawog nga sulab nga gipahiluna sa right angle tumong sa pul-an ug ilabinang gigamit sa pagporma sa kahoy.” Sa New Zealand, ang mga tawong Maori naggamit ug berdeng bato (jade) nga mga aswela sa pagsapsap ug mga bangka ug sa pagpormag mga poste aron kuliton. Apan, ang kadaghanang mga aswela karong adlawa maoy metal.

Sa nangaging mga siglo, ang mga panday naggamit ug aswela sa paglebel ug pagtul-id sa gambalay sa pagtukod ug balay ug barko. Ilang hinloan ang mga tabla nga giipit tali sa ilang mga tiil, nga naggamit sa bawog nga sulab sa aswela sa pagsalsal ug mga scallop o inukit nga mga buho nganha sa nawong sa kahoy.

Ang Kauban Niini​—Ang “Drawknife”

Nagpauswag sa yanong pagkamadanihon sa butang nga gikamulo paghimo ug isip kauban sa aswela mao ang laing hinungdanong himan, ang drawknife. Gigamit kini sa pagkorte sa mga kilid o nawong sa kahoy. Ang aswela ug ang drawknife kinahanglan nga huptang hait kaayo.

Inigkabaton na nimo niining mga himana, ang sunod nga mga tikang mao ang pagpangita sa angayng gam-onong materyal ug, dayon, himoon kana ngadto sa bisan unsang muwebles nga buot nimong buhaton. Dinhi niini, sumala sa mga panday, nga ang kinaraan, yanong estilo sa pagpanghimog muwebles may dagkong mga bentaha kay sa mas naandang mga teknik sa paggama.

Ang gansangong pagkagabas nga mga tabla, basta kini uga ug dili baliko o bawog, mahimong gam-ong muwebles nga lig-on ug nindot. Ang paggamag tabla mahimong mabatonan gikan sa nagkadaiyang mga tinubdan: linabayng muwebles (aparador, mga ulohan sa katre, mga ibabaw sa lamesa), daang mga kahon, mga sagbayan sa ginubang mga tinukod, ug daang mga poste sa koral.

Ginamit Pag-usab nga Kahoy​—Gigamit sa Bag-ong Paagi

Ang guwang nga kahoy nga wala ulora o madugta mahimong mogilak ug monindot diha sa mga kamot sa usa ka haniti.

Ang mga lama, mga linansangan, ug mga lupyak mahimong talagsaong mga bahin sa ginamit pag-usab nga kahoy nga gigamit alang sa muwebles. Pasagdan lang sa natural nga porma niini o koloran o pasinawan, ang imong gidemano paghimong butang maghatag ug katagbawan ug kalipay ingong butang nga maayong pagkahimo ug dumalayon.

Sama sa hardinero nga nagbugwal ug yuta, sa magkukulon nga nagmasa ug kulonon, ug sa maghahabol nga naghabol ug natural nga lanot, ang panday nga naghulma ug nagporma sa usa ka pirasong kahoy ginamit ang aswela o ang drawknife makakaplag niini nga labing magantihon. Oo, hago kini nga trabaho. Oo, mas dugay kini kay sa modernong mga paagi. Bisan pa niana, ang pagkaamgo nga ang imong mga paghago mahimong tinubdan sa katagbawan alang kanimo ug nga ang imong ginamang muwebles magdalag katuigan sa pagkamapuslanon sa modawat niini mag-amot sa kanhiayng kalipay nga nalangkit pag-ayo sa pagtrabaho ug kahoy.

Mga Ideya Maylabot sa Teknik

Ang aswela dili maayong gamiton sa tanang kahoy. Ang mga grano nga anaa sa tropikal nga gahing mga kahoy kasagarang moalkontra sa agi sa sulab sa aswela. Sa kasagaran, ang mas humok nga kahoy mas maayong gamitag aswela. Dili problema ang mga buko. Ginamit ang lukob (de-kurbang tigib), imo kining maukit o mabuhoan, busa magmugnag usa ka espesyal nga bahin sa nawong sa kahoy nga imong ginaandam.

Ang pipila sa labing maayong kolor kasagarang makaplagan diha sa mga tabla nga gigabas gikan sa subok sa usa ka kahoy. Ang muwebles nga gigama gikan niini talagsa rang magkinahanglag tina. Apan, kon buot mong mogilak ug monindot ang ordinaryong kahoy, dunay daghan kaayong tina nga mohaom sa imong kaugalingong gusto.

Bisan kini nga proseso dili kinahanglan nga dakog gasto. Ang pipila nagbagnos ug grasa sa awto ngadto sa luspad o pughaw nga kahoy ug nakakaplag niini nga nagpanindot pag-ayo sa hinimong butang.

Sa pag-aplay ug pangataposang retoki sa imong hinimo, dunay daghang polyurethane o mga barnis nga mahimong iwisik o ibrutsa sa muwebles. Alang sa mas natural nga pagretoki nga magmentinar sa kahoy inay takpan ang mga bangag niini, pahiri ang kahoy ug pangpasinaw nga lana nga hinimo gikan sa mosunod: lima ka bahin nga suka, upat ka bahin nga salong, duha ka bahin nga lanang linasa, ug usa ka bahin nga likido nga sinambogag methyl. Itunaw ang diyutayng talo diha sa imong sinagol, ug tugoting mohunob kana sa kahoy sulod sa daghang adlaw.

Kahanas nga Makapatagbaw

Ang muwebles nga solidong kahoy nga talagsaon kaayong ginama sa imong kaugalingong mga kamot kanunay gayong magmadanihon samtang kini ipahiluna diha sa imong kinaham nga bahin sa imong balay, bisan unsa pa tingali ka kabos niana. Sa tibuok kalibotan, diha sa mga mansiyon ug mga payagpayag, ang usa makakaplag ug daghang makapahinam nga mga pananglitan, usahay pinetsahag kasiglohan kanhi, nga ginama sa hanas nga mga magbubuhat ug muwebles. Kini gayod maoy tinuod nga pamatuod sa katakos, kakugi, ug pailob sa maong mga tawo. Ilang nabatonan ang katagbawan ug kalipay sa paggamag mga butang nga tungod kay mahigugmaong natipigan, magpatunghag praktikal nga bili ug katahom. Kini makaamot ug usa ka sukod sa pagkatalagsaon sa mga puloy-anan nga gidayandayanan niini.

Niining panahona, nga kusog kaayong nalukop sa plastik ug hinulmang mga produkto sa salong, ang gasa nga kahoy sa atong Maglalalang nagsilbi pa gihapon ug daghang mapuslanong mga katuyoan. Usa sa labing talagsaon niini mao ang pagtaganag wala pa gam-ang kahoy nga nagdani sa masibotong hanas nga magbubuhat sa paghimo niini ngadto sa maanindot nga kahoyng muwebles.

[Mga hulagway sa panid 23]

Rimu

Tawa

Tugas

Bukohon nga radiata pine

Binarnisan nga pino

Gigrasahan nga pino

Tininag-itom nga pino

[Mga hulagway sa panid 24]

Paggamit sa aswela

ug sa drawknife

[Hulagway sa panid 25]

Ginama-sa-kamot nga tokador

[Hulagway sa panid 25]

Estante