Gikan sa Among mga Magbabasa

Kinaugalingong-Pagpanambal Ako nalipay sa pagkakita sa serye sa mga artikulong “Kinaugalingong-Pagpanambal—Kini ba Makatabang o Makadaot Kanimo?” (Hulyo 8, 1998) Maayo ang pagkasulat niini ug naghatag ug timbang mabug-osong panglantaw sa ulohan, nga mahimong praktikal sa kadaghanang nasod sa tibuok kalibotan. Maayo ang pagpasiugda sa kabililhon sa pagbaton ug personal nga responsabilidad sa atong panglawas pinaagig maayong mga estilo sa kinabuhi inay modangop sa usa ka ‘tambal alang sa tanang sakit.’

J. M. J., Inglaterra

Pagbirigbirig Salamat sa artikulong “Ang Hunahuna sa Bibliya: Unsay Daotan sa Pagbirigbirig?” (Hulyo 8, 1998) Ang akong pamilya nagpaalim pa gikan sa mga epekto sa akong mabirigbirigong kinabuhi. Gitugotan ko ang akong kaugalingon sa pagbalewala sa kasakit nga akong gipahinabo sa akong pamilya, ilabina sa akong mahigugmaong asawa. Kon ako makasultig bisan unsa sa akong Kristohanong mga igsoong lalaki ug babaye, kini maoy: “Palihog paminaw sa atong Amahan, si Jehova. Hunongi ang pagbirigbirig, pangayog tabang, pag-ampo kang Jehova, ug dagan, dagan, dagan gikan sa pagkadaotan.”

D. B., Tinipong Bansa

Alang kanako, kining artikuloha naglig-on sa kamatuoran nga ang pagbirigbirig dili gamayng butang. Ang among pamilya seryosong naapektohan diha sa dagway sa diborsiyo, ug ang maorag inosenteng komedya maoy pangunang hinungdan sa suliran. Ako naglaom nga kining tambaga magtabang niadtong kinsa sa ilang kaugalingon wala makapanglantaw kon sa unsang paagi ang ilang pamatasan, sinultihan, o linihokan makaimpluwensiya sa kaatbang nga sekso.

O. M., Republika sa Czech

Kadto nahisamag makapahupay nga haplas sa nagngutngot nga mga kasingkasing sa daghang sister. Pinaagi niining artikuloha, atong nakita nga si Jehova makamatikod ug magtagad sa atong kinasulorang mga pagbati.

A. M. P., Espanya

Ang parapo ilalom sa sub-ulohang “Emosyonal nga mga Relasyon” maoy usa ka pagpadayag kanako. Ang akong bana nakaugmad ug kasuod sa laing sister sa kongregasyon tungod sa pagkamanagsama sa ilang mga kagikan. Sa among 17 ka tuig nga kaminyoon, wala gayod siya maghatag kanakog bisan unsang rason nga dili mosalig kaniya, apan nagduhaduha na ako. Naglisod ako pagsulti sa akong bana. Nakurat siya sa sinugdan apan misulay pagsabot sa akong panglantaw. Matod niya nga dili siya buot mopasakit kanako o sa among tulo ka anak, ug iyang gihunong ang tanang pakigkontak dihadiha dayon. Nahupayan ako pag-ayo sa iyang sanong.

D. T., Canada

Kapeligrohan sa Nazi Akong gibasa ang artikulong “Mga Saksi ni Jehova—Maisogon Atubangan sa Kapeligrohan sa Nazi” uban ang dakong kaikag. (Hulyo 8, 1998) Sa Kristohanong ministeryo, sagad akong makahimamat ug mga tawo kinsa sinserong nagtuo nga sila husto ug ang uban sayop, nga nag-akusar sa mga Saksi ni Jehova sa pagkompromiso sa rehimeng Nazi. Ang impormasyon niining artikuloha makatabang kanako sa pagbulig sa sinserong mga tawo sa pagsabot sa makasaysayanhong kamatuoran luyo sa bakak nga mga akusasyon bahin kanato nga ginapakaylap.

A. F., Slovenia

Daghang salamat sa artikulo. Pipila ka bulan kanhi, ang akong bana, nga dili sama nakog pagtuo, nakakitag negatibong materyal nga gipatik sa mga apostata. Mapasalamaton kaayo ako sa artikulo nga nagtubag sa maong mga pamakak.

C. G., Alemanya

Pagpaniid-ug-Langgam Ako siyete anyos nga batang babaye. Nagustohan ko ang artikulong “Pagpaniid-ug-Langgam—Usa ka Makalingaw nga Pasatiempo Alang sa Tanan?” (Hulyo 8, 1998) Ang mga hulagway ug mga pagpatin-aw nakatabang gayod kanako sa pagsabot nga gihimo ni Jehova ang kalibotan sa kahibulongang paagi. Ang hayop nga akong naangayan pag-ayo mao ang black-crowned nga tikling gikan sa Aprika—tungod kay kini kahimut-anan tan-awon. Salamat sa panukiduki nga inyong gihimo.

F. C., Italya