Gikan sa Among mga Magbabasa

Pagtudlo sa mga Bata sa Paghigugma sa Kalalangan Ingong bahin sa pagbansay sa among mga bata, kami naningkamot nga maugmad nila ang pagpabili sa kinaiyanhong katahom nga mahigugmaon kaayong gitagana ni Jehova. Buot namong gamiton ang mga artikulo nga regular nga mogula sa Pagmata!, sama sa “Jenny Wren—Gamayng Langgam, Kusganong Awit.” (Septiyembre 8, 1998) Ang among mga bata madasigong misanong! Usa ka kalipay nga ipaambit kining impormasyona kanila.

K. A., Tinipong Bansa

Makahahadlok nga mga Damgo Gipabilhan ko gayod ang mga sugyot diha sa “Pagpaniid sa Kalibotan” nga balitang “Makahahadlok nga mga Damgo sa Kabataan Kasagaran.” (Septiyembre 8, 1998) Ang akong mga bata may makahahadlok nga mga damgo, apan kanunay ko silang gisultihan sa dili paghisgot bahin niini kondili mobalik lamang sa pagkatulog. Karon, uban sa mga sugyot nga gihatag, ako mas makasagubang niining problemaha. Palihog ayaw hunonga ang pagpatik nianang makatabang nga impormasyon.

R. N., Zimbabwe

Mamumuno nga mga Leyon Nalingaw gayod ako sa artikulong “‘Binuang nga Transportasyon’ sa Silangang Aprika.” (Septiyembre 22, 1998) Apan kamo nasayop sa paglista sa mokaog-tawo nga mga leyon ingong usa ka laki ug usa ka baye. Sila parehong mga laki.

K. B., Tinipong Bansa

Ang “Pagmata!” nasayop niining puntoha, ug among gipabilhan ang katin-awan.—ED.

Sakit nga Alzheimer Nangulo ako sa usa ka tem sa mga tigdukiduki bahin sa sakit nga Alzheimer alang sa usa ka dakong kompaniya sa parmasiyotika. Busa akong gibasa uban ang maidlot nga interes ang inyong talagsaong serye nga “Sakit nga Alzheimer—Pagpaalibyo sa Sakit.” (Septiyembre 22, 1998) Nakadayeg gayod ako pag-ayo sa pagkadetalyado sa inyong pagkobre niining kaylap nga publikong problema sa panglawas. Ug ingong ansiyano sa kongregasyon, akong nakaplagan ang praktikal nga tambag niini nga mga artikulo nga bililhon kaayo.

S. S., Tinipong Bansa

Ang mga artikulo nakatandog sa akong kasingkasing tungod kay ang akong inahan nag-antos sa Alzheimer kapin na sa napulo ka tuig. Kinasingkasing akong nagpasalamat kaninyo tungod sa paghisgot niini nga ulohan uban ang taktika ug pagtahod alang niadtong nag-antos niini.

E. M., Italya

Usa ka kauban sa trabaho nga nagsuskribir sa Pagmata! nagtunol kanako sa isyu tungod kay ang akong amahan adunay Alzheimer. Ako ilabinang natandog sa artikulong “Pagpatunhay sa Dignidad sa Pasyente.” Wala nako hunahunaa nga ang usa mahimong maghinobra sa pagpasiugda niining puntoha. Salamat sa tukma-sa-panahon nga mga sugyot. Nakaseguro ako nga kining artikuloha nakatabang sa daghang tawo.

M. P., Canada

Buot kong magpasalamat kaninyo gikan sa kinahiladman sa akong kasingkasing tungod sa mga artikulo. Sukad nga ang akong inahan nadayagnos nga may Alzheimer sa 1986, kami nakabasa na ug daghang literatura bahin niini. Apan, ang inyong mga artikulo milabaw sa tanan namong nabasa bahin sa kainit, pagbati, ug empatiya. Husto gayod kamo sa dihang kamo miingon nga kadtong naapektohan sa Alzheimer nagkinahanglan ug gugma ug mabinationg pag-atiman, hangtod gayod sa kataposang yugto. Ang akong inahan dili makakaon o makasulti. Apan ang artikulo naghatag kanamo sa kalig-on nga ipakita ang mas pang gugma ug pagmahal kaniya.

H. E., Austria

Ingong presidente sa Brazilian Alzheimer’s Association, buot kong pahalipayan kamo bahin sa mga artikulo. Inyong gihulagway ang Alzheimer ug ang epekto niini sa mga pamilya diha sa tin-aw nga paagi. Kamo mainampingon sa pagtahod sa nag-antos ingong usa ka indibiduwal, ug kamo nagpresentar sa direktang mga asoy nga nagpakita nga ang gugma mao gihapon ang kinamaayohang tambal.

V. C., Brazil