Ang Kababayen-an May Dakong Bahin

ANG hinungdanong papel sa Kristohanong mga babaye sa pagtukod sa sangang buhatan sa mga Saksi ni Jehova sa Zimbabwe gipasiugda panahon sa programa sa dedikasyon, nga gihimo sa Disyembre 12, 1998. Sulod sa upat ka tuig nga proyekto sa pagpanukod, ang mga boluntaryo gikan sa daghang nasod—lakip ang ginatos gikan sa Zimbabwe—naghatag sa ilang panahon, kusog, mga katakos, ug mga kahinguhaan aron sa pagtukod sa matahom nga pundok sa mga tinukod nga imong makita diha sa nag-ubang hulagway.

Imong makita ang unom ka residensiyal nga mga tinukod nga parehas ug gidak-on diha sa likod. Ang dakong tinukod nga kinadul-an niini mao ang nahimutangan sa lawak kan-anan, sa kosina, ug sa labhanan. Ang residensiyal nga mga tinukod adunay 61 ka lawak-katulganan, ug ang lawak kan-anan makapalingkod ug mga 200. Sa atubangan, pawala, mao ang tinukod nga buhatan. Diha sa sentro mao ang dawatanag bisita, ug patuo mao ang bodega, diin gihimo ang programa sa dedikasyon.

Kining nindot nga pasilidad sa sangang buhatan sa Zimbabwe, sa habagatang Aprika, maoy usa lamang sa daghan sa maong proyekto nga nakompleto sukad gisugdan ang internasyonal nga programa sa pagpanukod sa mga Saksi ni Jehova sa Nobyembre 1985. Ang Pagmata! sa Agosto 22, 1991, naghubit niining programaha diha sa usa ka artikulong may ulohang “Usa ka Butang Bag-o sa Internasyonal nga Pagtukod.”

Mahitungod sa papel sa kababayen-an nianang programaha, ang Pagmata! mitaho: “Daghan ang nabansay sa paghigot sa kabilya ug mga alambre sa pagpalig-on sa konkreto, sa pagbutang ug pagsemento sa baldosa, ug sa pagliha ug pagpintal. Ang uban nagaatiman sa kinahanglanong mga trabaho sa balay. Busa ang tanan kanila nakatabang sa maayong paagi sa pagtrabaho diha sa mga lugar sa konstruksiyon sa tibuok kalibotan.”

Panahon sa di pa dugayng programa sa dedikasyon sa Zimbabwe, si George Evans ug James Paulson, nga maoy nagdumala sa konstruksiyon, naghimog pagtandi tali sa papel nga nabatonan sa kababayen-an sa pagtukod sa sangang buhatan sa Zimbabwe ug sa papel nga nabatonan sa kababayen-an sa pagtukod sa karaang tabernakulo sa Israel. “Sila nangabot, ang tagsatagsa kansang kasingkasing nag-agda kaniya,” nag-ingon ang Bibliya bahin sa mga Israelinhon, “ug sila nangabot, ang mga lalaki kauban ang mga babaye.”—Exodo 35:21, 22.

Gigamit kining maong asoy sa Bibliya, gipasiugda ni Brader Evans ug Paulson ang kalidad sa kontribusyon sa kababayen-an. Ilang gikutlo ang asoy sa Bibliya: “Ang tanang babayeng maalamon sa kasingkasing nanagkalinyas sa ilang mga kamot, . . . ang tanang babaye kansang kasingkasing nag-agda kanila uban sa kaalam.” Sa pagkatinuod, ang kababayen-an nalakip niadtong kinabubut-ong mitanyag sa ilang kaugalingon sa paghimo sa buluhaton. “Tagsatagsa ka lalaki ug babaye kansang kasingkasing nag-agda kanila sa pagdala ug usa ka butang alang sa tanang buluhaton nga gisugo ni Jehova nga pagabuhaton pinaagi kang Moises naghimo niini.”—Exodo 35:25, 26, 29.

Kon mahitungod sa proyekto sa sangang buhatan sa Zimbabwe, ang mga magtatan-aw sa konstruksiyon miingon: ‘Gihimo sa mga babaye ang tanang trabaho nga gihimo sa mga lalaki.’ Kini naglakip sa pagbugkos ug kabilyang puthaw ug pagpadagan ug dagkong kasangkapan. Si Brader Paulson miingon nga ang mga babaye nagtipig sa ilang mga trak nga panghakot ug pangmikskla ug semento ug ubang dagkong kasangkapan sa sinaw, limpiyong kahimtang, diin, siya nakamatikod, dili kaayo gustong buhaton sa mga lalaki.

Walay duhaduha, kita mapasalamaton alang sa daghang linibong kababayen-an nga miduyog sa kalalakin-an diha sa tibuok-kalibotang konstruksiyon sa sangang mga buhatan ug mga Kingdom Hall sa mga Saksi ni Jehova!

[Hulagway sa panid 26]

Sangang buhatan sa Zimbabwe