“Dili Tanan Gidapit Ngadto sa Parti”
ANG Human Development Report 1998, usa ka tinuig nga taho nga gitigom sa UN Development Programme, o UNDP, nagtagad sa wala-pa-hitupnging pag-usbaw sa pagkonsumo. Kini nagbutyag nga, sa tibuok kalibotan, kita karon naggastog unom ka pilo nga mas dako sa mga manggad sa ekonomiya kay sa atong gihimo sa 1950 ug duha ka pilo nga mas dako kay sa atong gihimo sa 1975. Bisan pa niining pagsulbong sa pagkonsumo, ang ehekutibong direktor sa UNDP, si James Gustave Speth, nag-ingon: “Dili tanan gidapit ngadto sa parti.”
Sa pag-ilustrar: Ang labing dato nga 20 porsiyento sa populasyon sa kalibotan mokaon ug pito ka pilo nga mas daghang isda kay sa labing kabos nga 20 porsiyento sa mga tawo sa kalibotan. Ang labing dato nga 20 porsiyento mokonsumo usab ug 11 ka pilo nga mas daghang karne, mogamit ug 17 ka pilo nga mas daghang sugnod, dunay 49 ka pilo nga mas daghang linya sa telepono, mogamit ug 77 ka pilo nga mas daghang papel, ug manag-iya ug 149 ka pilo nga mas daghang kotse kay sa labing kabos nga 20 porsiyento sa kalibotan.
Nagkomento pinasikad niining maong mga kaplag, ang UN Radio nag-ingon nga aron mohinay ang pag-us-os sa kinaiyanhong mga kahinguhaan sa yuta, ang industriyalisadong kalibotan kinahanglang magbag-o sa mga paagi niini sa pagkonsumo. Sa samang panahon, ang mas datong mga nasod kinahanglang mopaambit ug dugang pa sa ilang kabtangan ngadto sa mga kabos sa kalibotan aron sila usab makabenepisyo sa dugang pa sa mga kahinguhaan sa kalibotan. Unsa ka dakong pagbahinbahin sa bahandi ang kinahanglanon?
Si Gn. Speth nagbanabana nga kon ang industriyalisadong mga nasod magdoble sa ilang presenteng lebel sa tabang alang sa kalamboan—gikan sa $50 bilyones ngadto sa $100 bilyones sa usa ka tuig—ang tanang kabos sa tibuok kalibotan makapahimulos ug pagkaon, maayong panglawas, edukasyon, ug puy-anan. Karon ang $50 bilyones kon paminawon maorag daghang salapi. Apan, pahinumdom pa ni Gn. Speth: “Mao kana ang kantidad nga gigasto sa Uropa kada tuig diha sa tabako, ug kini maoy katunga sa gigasto karon sa TB diha sa alkoholikong mga ilimnon.”
Nan, tin-aw nga ang hiniusang paningkamot sa pagbahinbahin sa mga kahinguhaan niining planetaha nga mas parehas makatabang ug dako sa pagtapos sa masakit nga kakabos. Unsay gikinahanglan aron kini mahitabo? Usa ka opisyal sa HK miingon: “Ang gikinahanglan sumala sa kataposang pagtimbangtimbang mao ang pagbag-o sa mga kasingkasing, hunahuna, ug kabubut-on.” Kadaghanang tawo mouyon apan usab nakaamgo nga ang tighimog-polisa nga mga organisasyon karon, bisan pa tingalig unsa ka maayo ang ilang tuyo, dili makahimo sa maong mga kausaban, labi na gayod sa pagluka sa mga hiyas sama sa kadalo.
Bisan pa niana, adunay paglaom alang sa mga tawo nga nabalaka bahin sa umaabot sa tawhanong pamilya ug sa atong planeta. Makapadasig ang pagkahibalo nga ang Maglalalang sa yuta misaad sa pagdumala sa epektibong paagi sa mga suliran sa tawo. Ang salmista nagtagna: “Ang yuta magapatungha gayod sa iyang abot; ang Diyos, ang atong Diyos, magapanalangin kanato. Daghan na unyay mga lugas sa ibabaw sa yuta; sa tumoy sa kabukiran adunay kadagaya.” (Salmo 67:6; 72:16) Oo, ang tanan unyang molupyo sa yuta ‘dapiton ngadto sa parti’!