Gikan sa Among mga Magbabasa
Pagpanghunaw Ako 11 anyos ug buot ko kamong pasalamatan sa artikulong “Hunawi ug Trapohi ang Imong mga Kamot!” (Nobyembre 22, 1998) Kini nagdasig kanako nga manghunaw sa dili pa mokaon ug human sa pagpangasilyas. Sa akong lungsod, komon ang impeksiyon, busa mapuslanon kaayo ang artikulo.
M. F., Italya
Yanong mga Kalingawan Salamat sa taho nga “Kabataan Mas Gustog Yanong mga Kalingawan” diha sa “Pagpaniid sa Kalibotan.” (Nobyembre 22, 1998) Nagpuyo akong bulag sa akong mga anak, ug ako gitugotan lamang sa pagpakigkita kanila kausa sa matag tulo ka bulan. Wala ako masayod kon unsay buhaton panahon sa among panag-uban, busa dakong pagplano ang akong himoon, kay nahadlok nga sila laayan. Sa wala pa gayod moabot ang adlaw sa among panag-uban, akong nabasa kining tahoa. Kini midangat sa tukmang panahon!
M. Y., Hapon
Mga Bitin Daghang salamat sa inyong artikulong “Kasagarang Kabakakan Mahitungod sa mga Bitin.” (Oktubre 22, 1998) Ang pito ka puntos nga inyong gihisgotan nagtin-aw sa dakong pagkaignorante sa katilingban bahin niining makapahinam, apan nasaypan-pagsabot, nga mga mananap.
R. K., Tinipong Bansa
Paglikay sa mga Pagkapaso Nabalaka ako sa dihang akong gibasa ang taho nga “Mga Panagana Samtang Nagluto,” diha sa “Pagpaniid sa Kalibotan.” (Disyembre 8, 1998) Nagtumong kini sa usa ka sulat-balita nga nagsugyot sa pagluto diha sa atubangan nga mga sug-angan sa kosinilya. Ugaling lang, sukwahi kini sa tambag nga akong nadunggan nga gihatag ngadto sa mga ginikanan—nga kinahanglang mogamit sila kanunay sa likod nga mga sug-angan nga dili maabot sa mga bata.
M. B., Inglaterra
Among gipabilhan kining pahinumdom sa kahilwas. Ang tambag nga among gitaho gitumong ilabina ngadto sa mga tigulang, nga ang uban naduktag kalayo ang mga bukton sa sinina samtang nagkab-ot sa mga kulon nga anaa sa likod nga sug-angan. Apan, sa mga inahan nga dunay gagmayng mga anak, natural lamang nga ipalayo kanila ang lutoanang mga kulon.—ED.
Kon Unsay Hitsura ni Jesus Daghang salamat sa seryeng artikulo nga “Jesus—Unsa man Gayoy Iyang Hitsura? Unsa Siya Karon?” (Disyembre 8, 1998) Si Jesus kasagarang gihulagway sa sayop nga paagi diha sa mga simbahan, mga larawan, ug mga pelikula. Ako ilabinang nakaangay sa pagbasa bahin sa papel nga gidula ni Jesus karon ug dulaon sa umaabot. Dili siya usa ka masuso lamang diha sa pasungan.
M. W., Austria
Nakaangay kaayo ako sa artikulo! Ako kombinsido nga kining seryeha magtabang sa daghang tawo sa pagsalig sa mga Saksi ni Jehova ug sa atong mga magasin.
B. D., Yugoslavia
Makapalipay ang pagbasa nga si Jesus dili luyahon ug nga wala siyay panagway nga kanunayng nagminghoy, sama sa gihulagway diha sa popular nga dibuho. Hinunoa, siya maoy usa ka tinuod nga lalaki ug himsog nga tawo nga nagsundog sa iyang Amahan, ang “malipayong Diyos.”—1 Timoteo 1:11.
R. O. R., Brazil
Sa panid 8, kamo nag-ingon nga “gibalhin sa Diyos ang kinabuhi ni Jesus ngadto sa tagoangkan sa usa ka Hudiyong ulay.” Sanglit si Jesus hingpit, nagpasabot ba kini nga wala siyay tipik sa mga gene ni Adan?
J. G., Tinipong Bansa
Una pa sa pagpanamkon kang Jesus, ang manulondang si Gabriel nag-ingon kang Maria: “Kunsaran ka sa balaang espiritu, ug pagalandongan ikaw sa gahom sa Labing Hataas. Tungod nianang katarongana usab ang matawo pagatawgong balaan, Anak sa Diyos.” (Lucas 1:35) Tin-aw, ang balaang espiritu sa Diyos nagpaturok sa binhi diha sa tagoangkan ni Maria, nga nagbalhin sa kinabuhi sa panganay nga Anak sa Diyos gikan sa espiritung dominyo nganhi sa yuta. Ang balaang espiritu sa walay duhaduha nagseguro nga kining iya sa Anak nga hingpit nga puwersa sa kinabuhi sa lalaki magneyutralisar sa bisan unsang Adanikong pagkadi-hingpit sa binhi ni Maria, samtang nagbilin sa pipila ka henetikong mga hiyas. Lagmit, si Jesus liwat ni Maria.—ED.