Gikinahanglan ba Gayod ang mga Pag-abonog Dugo?
SA MIAGING Nobyembre ang pangutana sa ibabaw gibangon diha sa usa ka artikulo sa mantalaan nga gisulat ni Dr. Ciril Godec, tsirman sa urology sa Long Island College Hospital, sa Brooklyn, New York. Siya misulat: “Karong adlawa ang dugo lagmit dili maaprobahan ingong usa ka tambal, sanglit dili kini makaabot sa mga sukdanan sa Food and Drug Administration. Ang dugo maoy organo sa lawas, ug ang pag-abonog dugo sa aktuwal maoy usa ka organ transplant.”
Si Dr. Godec nag-ingon: “Ang organ transplant mao ang kataposang kapilian sa pagtambal nga isugyot ngadto sa mga pasyente. Tungod sa kalagmitan sa grabeng segundaryong mga epekto, ang mga pasyente gipahibalo sa bug-os bahin sa tanang posibleng kapilian sa dili pa himoon ang transplant.” Mahitungod sa pag-abonog dugo, siya mihinapos: “Ang kaayohan kuwestiyonable kaayo nga daghang siruhano ang misagop sa pilosopiya nga ‘paglikay sa pag-abono’ dili lamang tungod sa medikal kondili sa legal usab nga mga hinungdan.”
Ang pangunang suliran sa pag-abonog dugo mao nga linibo ka tawo ang natakboyan sa makamatay nga mga sakit, nga naglakip sa AIDS. Bisan pag ang mga paagi sa pagsusi sa dugo miuswag sa daghang dapit, si Dr. Godec nagpatin-aw: “Ang posibleng kapeligrohan motungha gumikan sa dugo nga gidonar sa mga indibiduwal nga natakboyan apan wala pa makaugmad ug mga antibody nga mamatikdan pinaagi sa mga pagsusi.”
Sa pagtapos sa iyang artikulo, si Dr. Godec naghisgot sa pangutana nga gibangon sa ibabaw: “Samtang ang mga mananambal ug mga siruhano nag-ugmad ug mas maayong pagsabot sa pisiolohiya sa paghatod sa oksiheno ngadto sa lainlaing bahin sa lawas ug nag-ila nga ang mga lebel sa hemoglobin dili kinahanglang sama ka taas sa gihunahuna sa miagi, halos kanunayng posible alang kanila nga makakaplag ug mga kapuli sa pag-abono. Ingon ka sayo sa miaging tuig daghan kaayong dugo ang mawala sa malisod nga mga pagdisdis sa kasingkasing ug pag-transplant sa atay mao nga kini kanunayng gituohan nga kinahanglang pulihan ug daghan kaayong dugo. Karon, ang duha ka pamaagi ginahimo na nga walay pag-abono.
“Mahimong posible nga sa haduol nga umaabot ang pag-abono bug-os nang hanawon. . . . Ang pag-abono dili lamang gastoso ug peligroso; kini dili gayod magtaganag kinamaayohang kalidad sa pag-atiman nga angay sa mga pasyente.”