Ang Hunahuna sa Bibliya

Angay Bang Makigbahin ang mga Kristohanon sa Kasadyaan sa Bag-ong Tuig?

“MALINAWON kaayo ang hapon sa dili pa ang Bisperas sa Bag-ong Tuig,” matod ni Fernando, usa ka medikal nga doktor sa Brazil. “Dayon mga alas-11 sa gabii, sila magsugod sa pagpangabot​—way-putol ang pag-abot sa mga pasyente nga gidunggab o gipusil, mga tin-edyer nga nangaangol sa mga aksidente sa awto, ug gikulata nga mga asawa. Ang alkoholikong ilimnon halos mao kanunay ang hinungdan.”

Kon palandongon ang ibabaw, dili ikatingala nga gitumong sa usa ka mantalaan sa Brazil ang unang adlaw sa tuig ingong internasyonal nga adlaw sa mga nangaluya tungod sa sobrang pag-inom ug alkoholikong ilimnon. Usa ka ahensiya sa balita sa Uropa nag-ingon nga ang “Bag-ong Tuig gipahiangay alang sa mapatuyangong katilingban,” ug midugang nga kini maoy “laing hugna sa way-kataposang bugno sa tawo batok sa alkoholikong ilimnon.”

Tinuod, dili tanang tawo ang mosaulog sa Bag-ong Tuig pinaagig sobrang pag-inom ug paghimog mapintas nga mga buhat. Ngani, daghan ang dunay makapalipayng handomanan sa maong okasyon. “Sa bata pa, naghinamhinam kaayo mi sa pag-abot sa Bisperas sa Bag-ong Tuig,” matod ni Fernando nga gikutlo ganina. “Aduna kanunay daghang dula, pagkaon, ug ilimnon. Inigkatungang-gabii among halogon, halokan, ug timbayahon ang usag usa nga ‘Malipayong Bag-ong Tuig!’”

Sa susama, daghan karon ang mibati nga sila nakigbahin sa kasadyaan sa Bag-ong Tuig nga walay paghinobra. Bisan pa niana, ang mga Kristohanon angayng mosusi sa sinugdanan ug kahulogan niining popular nga selebrasyon. Ang kasadyaan ba sa Bag-ong Tuig kasumpaki sa mga pagtulon-an sa Bibliya?

Mga Kamatuoran Gikan sa Nangagi

Ang kasadyaan sa Bag-ong Tuig dili bag-o. Ang karaang mga kinulit nagpakita nga kini gisaulog na sa Babilonya ingon ka sayo sa ikatulong milenyo W.K.P. Ang selebrasyon, nga gisaulog sa tungatunga sa Marso, maoy hinungdanon. “Nianang higayona ang diyos nga si Marduk maghukom sa dulnganan sa nasod alang sa umaabot nga tuig,” nag-ingon ang The World Book Encyclopedia. Ang kasaulogan sa bag-ong tuig sa Babilonya dangtan ug 11 ka adlaw ug naglakip sa mga halad, prosesyon, ug mga rituwal sa pertilidad.

Sulod sa usa ka panahon, gisugdan usab sa mga Romano ang ilang tuig sa bulan sa Marso. Apan sa 46 W.K.P., si Emperador Julio Cesar nagpakanaog ug balaod nga kini angayng magsugod sa unang adlaw sa Enero. Kanang adlawa gipahinungod nang daan kang Janus, ang diyos sa mga sinugdanan, ug karon kana magtimaan usab sa unang adlaw sa Romanhong tuig. Ang petsa nausab, apan ang espiritu sa hudyaka nagpabilin. Sa unang adlaw sa Enero, ang mga tawo “nagpahinunot sa pagkamapatuyangon,” nag-ingon ang Cyclopedia ni McClintock ug Strong, “ug sa nagkalainlaing matang sa paganong mga patuotuo.”

Bisan karon, ang mga rituwal sa patuotuo adunay bahin diha sa kasadyaan sa Bag-ong Tuig. Pananglitan, diha sa pipila ka dapit sa Amerika del Sur, daghan ang mosugat sa Bag-ong Tuig nga tuong tiil lamang ang gamiton sa pagtindog. Ang uban magturotot ug magpabutog lebentador. Sumala sa usa ka kostumbre sa Czech, ang Bisperas sa Bag-ong Tuig maoy panahon sa paghigop ug sabaw sa lentihas, samtang sa tradisyon sa Slovak ang mga tawo magbutang ug kuwarta o mga himbis sa isda ilalom sa mantel. Ang maong mga rituwal, nga gituyo aron abogon ang daotang kapalaran ug igarantiya ang kauswagan, nagpatunhay lamang sa karaang pagtuo nga ang pagsugod sa tuig maoy panahon sa paghukom sa mga dulnganan.

Ang Hunahuna sa Bibliya

Ang Bibliya nagtambag sa mga Kristohanon sa ‘paglakaw nga may kahapsay, dili sa hudyaka ug sa paghuboghubog.’a (Roma 13:12-14; Galacia 5:19-21; 1 Pedro 4:3) Sanglit ang kasadyaan sa Bag-ong Tuig sagad nailhan pinaagi sa mismong mga pagpatuyang nga gihukman sa Bibliya, ang mga Kristohanon dili makigbahin niana. Wala kana magpasabot nga ang mga Kristohanon dili buot maglipaylipay. Sa kasukwahi, sila nahibalo nga ang Bibliya sublisubling nagsulti sa mga magsisimba sa matuod nga Diyos nga magmaya​—ug kana tungod sa daghang katarongan. (Deuteronomio 26:​10, 11; Salmo 32:11; Proverbio 5:15-19; Ecclesiastes 3:22; 11:9) Ang Bibliya usab nag-ila nga ang pagkaon ug ilimnon maoy sagad nga bahin sa pagmaya.​—Salmo 104:15; Ecclesiastes 9:7a.

Apan, sumala sa atong nasabtan, ang mga selebrasyon sa Bag-ong Tuig naggikan sa paganong mga kostumbre. Ang bakak nga pagsimba mahugaw ug dulumtanan sa mga mata ni Jehova nga Diyos, ug ang mga Kristohanon magsalikway sa mga selebrasyon nga dunay paganong mga sinugdanan. (Deuteronomio 18:9-12; Ezequiel 22:​3, 4) Si apostol Pablo misulat: “Aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit? Dugang pa, aduna bay panag-uyon tali kang Kristo ug Belial?” Tungod sa maayong katarongan, si Pablo midugang: “Hunong na sa paghikap sa mahugaw nga butang.”​—2 Corinto 6:14-17a.

Naamgohan usab sa mga Kristohanon nga ang pagpakigbahin sa mga rituwal sa patuotuo dili mogarantiya ug kalipay ug kauswagan​—ilabina kay ang pagpakigbahin sa maong mga kasadyaan dili moresulta sa pag-uyon sa Diyos. (Ecclesiastes 9:11; Isaias 65:​11, 12) Dugang pa, ang Bibliya nag-awhag sa mga Kristohanon nga magmakasaranganon ug magmapugnganon-sa-kaugalingon diha sa ilang panggawi. (1 Timoteo 3:​2, 11) Tin-aw nga dili angay alang sa usa nga nag-angkong nagsunod sa mga pagtulon-an ni Kristo nga makigbahin sa usa ka selebrasyon nga nailhan pinaagi sa pagkamapatuyangon.

Bisag unsa pa ka madanihon ug ka nindot ang kasadyaan sa Bag-ong Tuig, ang Bibliya nag-ingon kanato sa ‘paghunong sa paghikap sa mahugaw nga butang’ ug sa ‘paghinlo sa atong kaugalingon sa tanang kahugawan sa unod ug sa espiritu.’ Alang niadtong mga masinugtanon, si Jehova naghatag sa makapadasig nga garantiya: “Pasudlon ko kamo. . . . Ako mahimong inyong amahan, ug kamo mahimong akong mga anak nga lalaki ug mga anak nga babaye.” (2 Corinto 6:17b–​7:1) Gani, siya nagsaad ug dumalayong mga panalangin ug kauswagan ngadto kanilang maunongon kaniya.​—Salmo 37:​18, 28; Pinadayag 21:​3, 4, 7.

[Footnote]