Kalibotan nga Walay Relihiyon—Mas Maayo Ba?

ANG bag-ong mga ateyista naghanduraw ug usa ka kalibotan nga walay relihiyon—walay suicide bomber, walay gubat tungod sa relihiyon, ug walay ebanghelisador sa telebisyon nga manguwarta sa ilang mga membro. Gusto ba nimo ang maong kahimtang?

Sa dili pa nimo kana tubagon, pangutan-a ang imong kaugalingon, ‘May pamatuod ba nga kon ateyista ang tanan moarang-arang ang kalibotan?’ Tagda kini: Mga 1.5 ka milyong taga-Cambodia ang nangamatay sa paningkamot sa Khmer Rouge (komunistang kalihokan) sa pagpatunghag walay-Diyos Marxist nga estado. Ug sa ateyistikong USSR, ang pagmando ni Joseph Stalin miresulta sa kamatayon sa tinagpulo ka milyong tawo. Tinuod, ang maong daotang mga buhat dili direktang nalangkit sa ateyismo. Apan kana nagpakita nga ang ateyistikong pagmando dili makapatunghag kalinaw ug kaharmonya.

Daghan ang mouyon nga ang relihiyon nakapahinabog grabeng pag-antos. Apan mabasol ba ang Diyos niana? Dili gayod, sama ra nga ang tiggamag awto dili mabasol sa usa ka aksidente nga gipahinabo sa drayber nga naggamit ug cell phone samtang nagmaneho. Ang pag-antos sa tawo daghag hinungdan, ug ang usa niana mas grabeg epekto kay sa relihiyon. Ang Bibliya nagtawag niana ingong kinaiyanhon nga pagkadili-hingpit. “Ang tanan nakasala ug wala makaabot sa himaya sa Diyos.” (Roma 3:23) Kining kiling sa pagpakasala maoy hinungdan sa kahakog, garbo, pagbatog kaugalingong moral nga sukdanan, ug kapintasan. (Genesis 8:21) Tungod usab niini, gipakamatarong sa mga tawo ang ilang daotang mga buhat ug gipili ang mga tinuohan nga nagkonsentir niana. (Roma 1:24-27) Husto gayod ang giingon ni Jesu-Kristo: “Nagagula gikan sa kasingkasing ang daotang mga pangatarongan, mga pagbuno, mga pagpanapaw, mga pakighilawas, mga pagpangawat, bakak nga mga pagpamatuod, mga pasipala.”—Mateo 15:19.

Kinahanglang Maila ang Matuod Gikan sa Bakak

Kinahanglang maila ang kalainan tali sa matuod nga pagsimba—ang pagsimba nga dalawaton sa Diyos—ug sa bakak nga pagsimba. Ang matuod nga pagsimba motabang sa mga tawo sa pagpakigbisog sa pagkadili-hingpit. Kini modasig kanato sa pag-ugmad sa mga hiyas sama sa nagsakripisyo-sa-kaugalingong gugma, kalinaw, pagkamaluloton, pagkamaayo, kalumo, pagpugong-sa-kaugalingon, pagkamaunongon sa kapikas, ug pagtahod sa uban. (Galacia 5:22, 23) Sa laing bahin, ang bakak nga relihiyon mopahiuyon sa kon unsay popular—nga ‘naggitik sa mga dalunggan sa mga tawo’ matod pa sa Bibliya—pinaagi sa pagkonsentir sa pipila sa daotang mga buhat nga gihukman ni Jesus.—2 Timoteo 4:3.

Dili kaha nga ang ateyismo nakapasamot usab sa kalibog maylabot sa moralidad? Ang pagkawalay-Diyos nagpasabot nga “wala kitay tulubagon kaniya, ug walay mga prinsipyo nga angayng sundon,” miingon ang propesor sa balaod nga si Phillip Johnson. Busa ang moralidad nahimong relatibo, nga ang matag tawo maoy mopili sa iyang sundon nga mga sukdanan—kon gusto niya. Sa walay duhaduha, mao kanay hinungdan kon nganong ang pipila ka tawo nadani sa ateyismo.—Salmo 14:1.

Apan, ang tinuod mao nga dili tugotan sa Diyos nga magpabilin hangtod sa hangtod ang sayop nga mga ideya o pagtulon-an—ateyistiko man o relihiyoso—maingon usab ang nagpasiugda niana.a Siya nagsaad: “Ang mga matul-id [sa moral ug espirituwal] mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.” (Proverbio 2:21, 22) Ang resulta niana mao ang usa ka kahimtang nga dili gayod ikapatungha ni bisan kinsang tawo, sa bisan unsang tawhanong pilosopiya, ug sa bisan unsang institusyon—ang kalinaw ug kalipay sa tibuok uniberso.—Isaias 11:9.

[Footnote]

[Kahon sa panid 6]

HUNAHUNA SA DIYOS SA KAPINTASANG GIBUHAT SA RELIHIYON

Ang yuta nga gihatag ngadto sa karaang Israel gipuy-an sa mga Canaanhon, mga tawo nga imoral kaayog binuhatan—nga naglakip sa pag-unay, homoseksuwalidad, ug bestialidad—maingon man naghalad ug mga bata. (Levitico 18:2-27) Ang librong Archaeology and the Old Testament nag-ingon nga ang mga arkeologo “nakadiskobreg nagtipun-og nga abo ug mga bukog sa mga masuso diha sa mga sementeryo palibot sa halaran sa mga pagano, nga nagpaila nga kaylap kaayo ang [paghalad ug mga bata].” Ang mga Canaanhon nagsimba sa ilang mga diyos pinaagig imoral nga mga buhat ug naghalad usab sa ilang mga panganay sa maong mga diyos, matod pa sa usa ka basahon bahin sa Bibliya. Kini midugang: “Ang mga arkeologo nga nagkalot sa mga kagun-oban sa mga siyudad sa Canaan nahibulong kon nganong wala dayon sila laglaga sa Diyos.”

Ang paglaglag sa Diyos sa mga Canaanhon maoy makapahinuklog nga pahinumdom alang kanato nga dili niya tugotang magpabilin hangtod sa hangtod ang pagkadaotan nga gihimo sa ngalan sa relihiyon. “[Ang Diyos] nakatakda na ug adlaw aron iyang pagahukman ang gipuy-ang yuta subay sa pagkamatarong,” nag-ingon ang Buhat 17:31.

[Mga hulagway sa panid 7]

Ang mga relihiyoso ug dili-relihiyoso parehong nakahimog kabangisan

Gipaluyohan sa simbahan si Hitler

Kalabera sa mga biktima sa Khmer Rouge, Cambodia

[Credit Line]

AP Photo