Pagpaniid sa Kalibotan
Gipahigayon sa Italy ang unang divorce fair niini. Ang nanambong mikonsulta sa mga ahensiya sa kaminyoon aron makakitag bag-ong kapikas, ahensiya sa pagbiyahe aron maghikayg bakasyon alang sa mga tagsaanon, ug sa mga ahensiya sa diborsiyo aron makakitag abogado, accountant, sikologo, ug tig-areglo sa suliran sa pamilya.—CORRIERE DELLA SERA, ITALY.
Ang Simbahang Katoliko “nawad-ag kredibilidad” tungod sa “dili maayong pagdumala [niini] sa mga kaso sa seksuwal nga pag-abuso nga gihimo sa mga pari.” “Lagmit mao [kini] ang kinadak-ang problema nga giatubang sa simbahan sukad masukad.”—NATIONAL CATHOLIC REPORTER, U.S.A.
Ang mga siyentipiko nga nagtuon sa DNA gikan sa napreserbar-sa-yelo nga buhok sa taga-Greenland nga namatay mga 4,000 ka tuig kanhi nakahinapos nga “lagmit naggikan [siya] sa Siberia.”—REUTERS NEWS SERVICE, U.S.A.
Wala nay Pagsalig sa Simbahan
“Kadaghanan sa mga tawo wala nay pagsalig sa Simbahan [Katoliko],” nag-ingon ang ulohang balita sa The Irish Times. Sumala sa maong report, ang Simbahang Katoliko nalakip sa mga institusyon—sama sa gobyerno ug bangko—nga wala na saligi sa kadaghanan sa mga taga-Ireland. Bisag ang maong nasod nailhan nga maunongon sa simbahan, kapig katunga niadtong giinterbiyo di pa dugay miingon nga sila “wala gayod” (32 porsiyento) o “wala kaayo” (21 porsiyento) mosalig sa simbahan. Ang di pa dugayng mga eskandalo nga naglangkit sa simbahan maoy gituohang hinungdan kon nganong “wala nay” pagsalig niini ang publiko.
Graduwado sa Kolehiyo Apan Way Trabaho
Segurado bang makatrabaho ang nakahuman sa kolehiyo? Dili tanan, matod sa Manila Bulletin. Gikutlo niini si Herbert Bautista, nga mayor sa Quezon City, nga nag-ingon: “Kada tuig, minilyon sa mograduwar sa kolehiyo ang dili makatrabaho tungod kay ang ilang kurso dili haom sa bakanteng mga trabaho.” Daghan kanila ang manarbaho na lang ingong klerk o diha sa mga fast-food restaurant. Ang gobyerno nag-awhag sa mga graduwado sa hayskul nga mokuhag bokasyonal o teknikal nga mga kurso aron daling makakitag trabaho.
Tulay Gitaya Tungod sa Luwa
Sa Calcutta, India, ang 1,500 piye (457 metros) nga Howrah Bridge nameligrong maguba tungod sa luwa sa mga tawo. Ngano? Ang gutkha—nga hinimo sa buyo, bunga, ug apog nga mamaon ug iluwa sa mga tawo—grabeng makataya. Sumala sa mantalaan sa Calcutta nga The Telegraph, “ang luwa sa mga tawong tig-agian nakapanipis sa puthaw nga nagtabon sa haligi [sa tulay] gikan sa sayis [.24 pulgada] ngadto sa tres [.12 pulgada] milimetros sukad niadtong 2007.” Mga 500,000 ka tawo ug 100,000 ka sakyanan ang moagi niini kada adlaw.