‘Wala na Nako ni Lung-ig Basa!’
● Ang mga batan-on sa tibuok kalibotan nagpahayag sa ilang apresasyon sa librong Mga Pangutanang Gisukna sa mga Batan-on—Mga Tubag nga Mosaler, Tomo 2.a Tagda ang pipila ka pananglitan:
“Giganahan kaayo ko sa libro kay gipasiugda niini ang kahinungdanon sa pagpakigkomunikar sa among ginikanan. Akong gisunod ang mga sugyot niini, ug karon aduna kami mas maayong komunikasyon sa akong ginikanan.”—Roberto, Mexico.
“Sa dihang gisugdan nakog basa ang libro, wala na nako ni lung-i! Nagustohan nako ang bahin nga ‘Ang Akong Planong Himoon!’ nga anaa sa hinapos sa matag kapitulo ug ang panid nga ‘Akong Notahanan’ nga anaa sa kataposan sa matag seksiyon. Kining libroha naghatag kanakog kaisog sa pagdepensa sa akong pagtuo diha sa eskuylahan.”—Joelah, United States.
“Sa pagsige nakog basa, mas natandog ang akong pagbati. Naapresyar nako ang gisulti sa daghang batan-on, maingon man ang bahin nga ‘Nahibalo Ka Ba?’ ug ang mga kahon nga ‘Sugyot.’ Gipatin-aw niining libroha nga ang Nagamandong Lawas sa mga Saksi ni Jehova interesado sa mga batan-on!”—Hui-won, South Korea.
“Sa tanang basahon nga gipatik sa mga Saksi ni Jehova, kini ang akong giganahan pag-ayo. Nahibalo gyod mo kon unsay gihunahuna sa mga tin-edyer ug sa mga problema nga ilang giatubang diha sa pamilya, eskuylahan, ug sa mga higala.”—Shana, Canada.
“Sa matag higayon nga maglalis ang akong ginikanan, moadto ko sa akong kuwarto ug mohilak. Apan human nako mabasa ang kapitulo 24, nga nag-ulohang ‘Unsay Akong Himoon Kon Maglalis ang Akong Ginikanan?,’ nakahimo ko sa pagpakig-estorya kang Mama ug Papa bahin niana. Natingala sila sa pagkahibalo nga ang ilang mga panaglalis nakaapektar pag-ayo nako. Gibasa usab nila ang maong kapitulo. Karon mas masabtan nila ang akong gibati, ug panagsa na lang silang maglalis.”—Mariana, Czech Republic.
“Ang mga panid nga ‘Maayong Panig-ingnan’ nakatandog pag-ayo nako ug nakatabang nako sa pagbuntog sa akong mga kahuyangan. Pananglitan, nalisdan ko sa pagpakigsuod sa mga igsoon sa kongregasyon nga bag-o lang nakong nakaila. Apan ang panid 97 naghisgot nga si Lydia nasuod kang Pablo ug sa iyang mga kauban pinaagi sa pag-abiabi kanila. Karon gipaningkamotan nako nga masundog ang iyang panig-ingnan.”—Mónika, Hungary.
[Footnote]
a Gipatik sa mga Saksi ni Jehova.
[Kahon/Hulagway sa panid 25]
“PAGPAKIGSEKSO SA DILI PA MAGMINYO—NGANONG SAYOP KINI?”
Si Katrina, nga usa ka 16 anyos nga dalagita sa United States, naasayn sa paghatag ug oral report bahin sa ulohan nga iyang napili alang sa ilang speech class. Gamit ang librong Mga Pangutanang Gisukna sa mga Batan-on—Mga Tubag nga Mosaler, Tomo 2, iyang gipili ang topikong “Pagpakigsekso sa Dili pa Magminyo—Nganong Sayop Kini?” Ang iyang ginikanan miasoy: “Sa report ni Katrina, iyang gipatin-aw ang termino nga ‘paghupot sa kaputli,’ nga nagsaysay sa mga kapeligrohan sa pagpakigsekso sa dili pa ang kasal ug sa dili maayong resulta sa paglapas sa moral nga sukdanan sa Diyos. Si Katrina mikutlo usab sa libro, nga nagpakita kon unsay gibati sa pipila ka batan-on human nila malapas ang sukdanan sa Diyos. Dayon, giawhag niya ang klase sa pagpatunghag mga pangutana, nga iya ra pong gitubag. Human sa iyang presentasyon, ang maestra ni Katrina naghatag kaniyag mubong sulat, nga sa bahin nag-ingon: ‘Salamat sa pagsulti sa kamatuoran ug sa paghatag ug kalamdagan. Magmalig-on sa imong pagtuo.’”