Gasa nga Musika
UNSA kaha ang kinabuhi kon walay musika? Walay mananoyng laylay. Walay romantikong harana. Walay bibo nga pop song. Walay makapatandog nga orkestra. Ug walay makapadasig nga honi. Para sa kadaghanan, laay ang kinabuhi kon walay musika.
Oo, ang musika makapukaw sa halos tanang emosyon sa tawo. Kini makapahupay, makapatandog, ug makapadasig. Kini makapalipay ug makapahilak. Dugang pa, ang musika gamhanan kay kini makatukbil sa atong emosyon. Nganong matandog kaayo kita sa musika? Simple lang ang tubag: Ang musika maoy maanindot nga gasa gikan sa Diyos. (Santiago 1:17) Tungod niana, kini kinahanglang pabilhan, kinahanglang maayog impluwensiya, ug kinahanglang mabatonan sa tanan—bata ug tigulang.
Dugay na nga dunay musika. Pananglitan, nakaplagan sa mga arkeologo nga gatosan ka tuig sa wala pa si Kristo, ang Aprikanong mga tribo duna nay mga tambol, budyong, ug mga kampanilya. Ang mga Insek sa karaang panahon dunay silindron ug plawta (panpipe). Ang mga tawo sa Egypt, India, Israel, ug Mesopotamia nagtugtog ug alpa. Lagmit ang labing espesipikong paghisgot sa musika diha sa kasaysayan mao ang narekord sa Bibliya sa Genesis 4:21. Kana nagtug-an kanato nga ang usa ka tawong ginganlag Jubal mao “ang mag-uugda sa tanan niadtong nagagamit sa alpa ug sa plawta.” Kasiglohan sa ulahi, si Haring Solomon sa Israel nainteres pag-ayo sa musika ug naggamit sa kinamaayohang matang sa kahoy sa paggamag mga alpa ug uban pang kinuldasang instrumento.—1 Hari 10:11, 12.
Siyempre, aron makapaminawg musika niadtong panahona, kinahanglang ikaw o ang uban motugtog ug instrumento. Apan karon, milyonmilyon ang makapaminaw niana pinaagig usa lang ka pagpislit sa boton o pag-click sa mouse. Gani, ang tanang matang sa musika mahimong irekord o i-download ug patokaron diha sa usa ka himan nga ikasulod sa bulsa. Gipakita sa usa ka surbi sa United States niadtong 2009 nga ang mga batan-ong nag-edad ug 8 ngadto sa 18 mogugol ug kapig duha ka oras matag adlaw sa pagpaminawg musika ug uban pang audio recording.
Tungod kay daghan ang mahiligon niini, ang musika ug ang teknolohiya nga nalangkit niini nahimong dakong negosyo. Apan nahibalo ka ba kon unsaon paghimog popular nga awit?
[Kahon/Hulagway sa panid 3]
Musika Diha sa Internet
DOWNLOADING: Ang usa sagad mobayad sa matag music file nga iyang i-download aron maiyaha kana. Ang uban mokuhag subscription—sagad duyog sa cell-phone contract o sa uban pang gipamalit—aron maka-download ug mga file ug makapaminaw niana sulod sa panahon nga gitakda sa kontrata.
STREAMING: Musikang mapaminaw nga dili na kinahanglang i-download. Kadaghanan niana walay bayad, apan ang uban kinahanglang i-subscribe.
[Chart/Mga hulagway sa panid 3]
(Alang sa aktuwal nga pagkahan-ay, tan-awa ang publikasyon)
Hinungdanong Kaugmaran sa Pagrekord ug Musika
Katuigan sa 1880
Ponograpo
Katuigan sa 1890
Steel wire
Katuigan sa 1940
Reel-to-reel tape
Katuigan sa 1960
Cassette tape
Katuigan sa 1980
Compact disc (CD)
Katuigan sa 1990
Digital audio file (MP3, AAC, WAV, ug uban pa)