Pagpaniid sa Kalibotan

Ang surbi nga gihimo sa British Broadcasting Corporation sa 13,000 ka tawo sa 26 ka nasod nagpakita nga ang “korapsiyon mao ang kanunayng gihisgotan nga problema sa tibuok kalibotan.” Apan, ang kakabos mao ang kinadak-ang problema sa kalibotan.—BBC NEWS, BRITAIN.

“Ang mga simbahan sa U.S. nagbutang ug mga aparato nga GPS diha sa mga imahen sa masusong si Jesus nga anaa sa belen. Sa nanglabayng katuigan, sa tibuok nasod, midaghan ang pagpangawat sa mga imahen sa belen.”—THE WEEK, U.S.A.

“Usa ka komite sa [U.S.] Food and Drug Administration nagsugyot nga ang mga tawong may chronic fatigue syndrome dili pwedeng makadonar ug dugo, kay basig retrovirus ang hinungdan nianang sakita.”—THE WALL STREET JOURNAL, U.S.A.

Kahayag Makapatayg Isog nga mga Kagaw

Usa ka bag-ong teknolohiya, nga naggamit ug high-intensity nga kahayag sa pagpatayg isog nga mga bakterya diha sa mga ospital, ang nahimo sa University of Strathclyde, sa Glasgow, Scotland. Ang maong bag-ong pamaagi mas epektibo sa pagpatayg kagaw kay sa paglimpiyo ug paggamit ug disinfectant.

Malarya ug Pagpuril sa Kalasangan

Ang pagpuril sa kalasangan gituohan nga maoy nakaingon sa halos 50 porsiyento nga pagdaghan sa mga gimalarya. Mao kanay giingon sa mga tigdukiduki nga nagtuon sa mga impormasyon gikan sa 54 ka health district sa Brazil ug sa mga hulagway sa pagpamutol ug kahoy nga nakuha sa satelayt. Ang pangunang nagdalag malarya sa maong dapit mao ang lamok nga gitawag ug Anopheles darlingi. “Ang napuril nga kalasangan, nga mas dagko nag hawan ug may mga danaw nga dili kaayo madan-agan sa adlaw, morag paboritong puy-anan niining lamoka,” miingon si Sarah Olson, ang pangunang awtor sa maong report. Ilang nakita nga midaghan ang gimalarya diha sa mga dapit nga grabe ang pagpuril sa kalasangan.

Molupad nga Nukos

Ning bag-o pa, may mga hulagway nga nagpamatuod nga ang pipila ka matang sa nukos molupad pinaagig jet propulsion. Naobserbahan sa mga biologo sa dagat nga dunay “nukos nga bisag otso pulgadas lang makasulpot ug dos metros ibabaw sa tubig ug makalupad kutob sa gilay-ong 10 metros pinaagi sa pagkapa-kapa sa ilang kapay ug pagpatuyok sa ilang mga gaway,” nag-ingon ang Scientific American. Pinaagi sa pagsuyop ug tubig ug dayon pagbugag kusog niana, ang nukos mosulpot gikan sa tubig. Makita sa mga hulagway nga sa paglupad, daw gigamit sa nukos ang mga kapay niini ingong pako.