Pagkanatural

ANG pagpahayag sa imong kaugalingon sa natural nga paagi makatabang kanimo nga makaangkon sa pagsalig sa uban. Mosalig ka ba sa butang nga gisulti sa usa ka tawong nakigsulti kanimo nga nagmaskara? Mas mosalig ka ba kon ang nawong sa maskara mas ambongan kay sa nawong mismo sa mamumulong? Lagmit dili. Busa inay kay mogamit ug takoban, ipakita ang pagkanatural.

Ang pagkanatural dili pagasaypon nga pagkadanghag. Dili angayan ang dili hustong gramarya, sayop nga paglitok, ug giugom nga sinultihan. Ang sinultihang pangkalye kinahanglang likayan usab. Buot natong ipadayag sa kanunay ang nahiangayng kaligdong, diha sa atong sinultihan ug sa atong pamatasan. Ang usang nagpakita sa ingon niana nga pagkanatural dili sobra ka pormal ni sobra ka mabalak-on nga magpadayeg sa uban.

Diha sa Pag-alagad sa Kanataran. Sa dihang mopaduol ka sa usa ka balay o mopaduol sa usa ka tawo sa publikong dapit nga naghunahuna sa pagsangyaw, nerbiyoson ka ba? Nerbiyoson ang kadaghanan nato, apan ang pagbati mas magdugay sa pipila kay sa uban. Tungod sa kahigwaos ang tingog mahimong dili natural o kurog, o ang pagkaginerbiyos basin maila diha sa salikwaot nga mga lihok sa kamot o sa ulo.

Ang usa ka magmamantala mahimong makasinati sa maong suliran tungod sa ubay-ubay nga hinungdan. Mahimong naghunahuna siya bahin sa impresyon nga iyang igahatag o naghunahuna kon molampos ba ang iyang presentasyon. Kini sila kasagaran lamang, apan ang mga suliran motungha kon hatagan ug sobrang pagtagad kanang mga butanga. Kon nerbiyoson ka sa dili pa mosangyaw, unsay makatabang? Ang mainampingong pagpangandam ug tim-os nga pag-ampo kang Jehova. (Buh. 4:29) Hunahunaa ang dakong kaluoy ni Jehova diha sa pagdapit sa mga tawo aron makapahimulos sa hingpit nga panglawas ug sa kinabuhing walay kataposan diha sa Paraiso. Hunahunaa kadtong gipaningkamotan nimo nga tabangan ug ang panginahanglan nga sila makadungog sa maayong balita.

Hinumdomi, usab, nga ang mga tawo adunay kagawasan sa pagpili, busa sila makadawat o makasalikway sa mensahe. Kana matuod usab sa dihang misangyaw si Jesus ngadto sa karaang Israel. Ang imong asaynment mao lamang ang pagwali. (Mat. 24:14) Bisan kon ikaw dili pasultihon sa mga tawo, ang imong presensiya mismo maoy usa ka pagpamatuod. Ikaw magmalamposon kay gitugotan nimo si Jehova sa paggamit kanimo aron ang iyang kabubut-on matuman. Sa mga panahon nga ikaw makahigayon sa pagsulti, unsay magtimaan sa imong pagpanulti? Kon ikaw nakakat-on sa pagtumong sa imong hunahuna nganha sa mga panginahanglan sa uban, ang imong pagpanulti mahimong madanihon ug natural.

Sa dihang magasangyaw, kon ang imong panglihok ug paagi sa pagsulti maoy sama sa imong ginabuhat kada adlaw, kini makaparelaks sa imong mga tigpatalinghog. Sila mahimong mas madinawaton sa Kasulatanhong mga panghunahuna nga buot nimo nga ipaambit kanila. Inay kay magpakigpulong nga pormal kanila, makigkabildohay kanila. Magmahigalaon. Magpakitag interes kanila, ug hatagi silag kahigayonan sa pagkomento. Hinuon, kon gikinahanglan sa pinulongan o sa lokal nga kultura ang tino nga mga gawi aron ipakita ang pagtahod kon makigsulti sa mga estranyo, buot nimong sundon kini. Apan andama kanunay ang tam-is nga pahiyom.

Diha sa Plataporma. Sa dihang makigsulti ka sa grupo sa mga tawo, ang natural, kabildohay nga estilo sa pagsulti kasagarang maoy labing maayo. Hinuon, kon daghan ang mamiminaw, kinahanglang pakusgan ang imong tingog. Kon ikaw mosulay pagsag-ulo sa imong pakigpulong o kon ang imong nota detalyado kaayo, lagmit nga sobra kang mabalaka sa eksaktong kahan-ayan sa mga pulong. Hinungdanon ang angayang kahan-ayan sa mga pulong, apan kon masobrahan pagtagad kini, ang pagsulti mahimong dili relaks ug pormal. Mawala ang pagkanatural. Ang imong mga ideya kinahanglang abante nga nahan-ay, apan hatagig labaw nga pagtagad ang mga ideya, dili ang eksaktong kahan-ayan sa mga pulong.

Tinuod usab kini sa dihang ginainterbiyo ka panahon sa usa ka tigom. Mangandam pag-ayo, apan ayawg basaha o sag-uloha ang imong mga tubag. Isulti kana uban ang natural nga pag-usab-usab sa tingog aron ang imong mga komento mahimong kinaiyanhon nga makapadani.

Bisan ang maayong mga hiyas sa pagpanulti nga pinasobrahan basin pagasabton sa mamiminaw ingong pagkadili-natural. Pananglitan, angay kang mosulti nga tin-aw ug gamiton ang hustong paglitok apan dili sa paagi nga daw mapagarbohon o artipisyal paminawon ang imong sinultihan. Ang mapasiugdahon o mabatbatong mga kompas, kon maayong pagkahimo, makapabuhi sa imong pakigpulong, apan ang mga kompas nga dili natural o hingapin makapadaot sa imong ginasulti. Sulting may igong gidak-on sa tingog, apan ayaw pasobrahi ang gikusgon. Maayo nga magmainiton usahay sa imong pakigpulong, apan kinahanglang imong likayan nga mahimong mapangandakon. Ang pag-usab-usab sa tingog, kadasig, ug pagbati kinahanglang gamiton tanan sa paagi nga dili magdani sa pagtagad nganha sa kaugalingon o gil-asan ang mamiminaw.

Ang pipila ka tawo sa kinaiyanhon adunay eksaktong paagi sa pagpahayag sa ilang kaugalingon, bisan kon wala sila magpakigpulong. Ang uban mas inato sa ilang pagsulti. Ang hinungdanon mao ang pagsultig maayo kada adlaw ug ang paggawi sa imong kaugalingon uban ang Kristohanong kaligdong. Unya kon anaa sa plataporma, ikaw mas daling makasulti ug makalihok uban ang kinaiyanhong pagkamadanihon.

Sa Dihang Magabasa sa Publiko. Ang pagkanatural diha sa publikong pagbasa nagkinahanglag paningkamot. Aron makab-ot kini, ilha ang pangunang mga ideya diha sa materyal nga imong pagabasahon, ug panid-i kon giunsa paghan-ay kini. Ibutang kining tin-aw sa hunahuna; kay kon dili, ang imong ginabasa maoy mga pulong lamang. Susiha ang paglitok sa dili-sinating mga pulong. Bansaya ang pagbasag kusog aron makuha ang hustong kausaban sa tingog ug mahugpong ang mga pulong sa paagi nga tin-awng magpasabot sa mga hunahuna. Balikbalika kini paghimo hangtod malarino ang imong pagbasa. Sabta pag-ayo ang materyal aron sa pagbasa nimog kusog niini, ang imong pagbasa mahisamag bibo nga kabildohay. Kana maoy pagkanatural.

Hinuon, kadaghanan sa atong publikong pagbasa maoy gikan sa atong pinasukad-sa-Bibliya nga mga publikasyon. Dugang pa sa mga asaynment sa pagbasa sa Teokratikanhong Tunghaan sa Ministeryo, kita magabasag mga kasulatan diha sa pag-alagad sa kanataran ug sa dihang magahatag ug mga pakigpulong sa plataporma. Ang mga igsoong lalaki ginaasayn sa pagbasag materyal nga ginatun-an sa Pagtuon sa Bantayanang Torre ug sa Pagtuon sa Libro sa Kongregasyon. Ang pipila ka igsoong lalaki nga kuwalipikado makadawat ug mga asaynment sa pagbasag mga manuskrito atubangan sa mga mamiminaw panahon sa kombensiyon. Magabasa ka man sa Bibliya o sa ubang mga basahon, basaha ang mga bahin nga nasudlan ug mga kinutlo sa paagi nga makapabuhi sa maong materyal. Kon daghang indibiduwal ang gikutlo, usba ang imong tingog alang sa matag usa. Usa ka pahimatngon: Ayaw pagkahimong sobra ka dramatiko, apan butangig kinabuhi ang pagbasa sa natural nga paagi.

Ang pagbasa nga natural maoy inato nga pagpakigkabildo. Dili kini artipisyal nga paminawon kondili adunay kombiksiyon.